زواج سوداناس

كلو من (الكسكتة) !



شارك الموضوع :

* إذا كان المستوى الباهت الذي شاهدناه للهلال أمام قورماهيا الكيني يمثل حصيلة معسكر سوسة بتونس فإننا نطالب لجنة التسيير منازلة الوصايفة بالرديف ..!
* مؤسف حقاً أن يبدأ الوصايفة نزيف النقاط منذ أول أسبوعين، فبعد منازلة هلال الجبال سيتوجه الوصايفة للأبيض لمقابلة هلال الرمال و(كان الله في عون الكاردينال) ..!
* صرف كردنة على الهلال صرف من لا يخشى (الصفر)، وهاهو يتجرع كؤوس الحنظل منذ بداية الموسم وقورماهيا يحمل كأس السياحة (جواً) ويتجه لنيروبي ..!
* لم يتبق لكردنة غير أن يخلع (الكسكتة) ويدخل الملعب ليقف في وجه هجمات الخصوم .!
* بالمناسبة : كردنة كان يلعب (محور) طبقاً لحديثه للحبيب ضياء الدين بلال في حلقة برنامج (فوق العادة) التي لم تر النور ..!
* قال كردنة انه (ارتكاز) كنصر الدين الشغيل تماماً، مع العلم بأن المريخ لم يشطب كردنة ذات يوم فكيف أصبح الرجل كالشغيل ..؟
* إذا كان كردنة (ارتكاز) بحق وحقيقة فعليه أن (يركز) ويعد نفسه هذا الموسم لسلسلة نكبات جديدة ففريقه سيكون (محور) هزائم دائم ..!
* الذين استغربوا لخسارة الهلال ببورتسودان وقالوا إن لاعبيهم خذلوهم و(لم يراعوا) إلى أنهم يلعبون بأرضهم ليس لديهم حق في دهشتهم تلك لأن الأمر ليس بجديد عليهم، فالوصايفة خسروا نهاية الموسم الماضي أمام التطواني المغربي والاتحاد الليبي بإستادهم ولكن الفرق أنهم هذه المرة سقطوا ببورتسودان و(لم يراعوا فروق الوقت) .!
* راعي حرماني وأخشى عامل (الصفر) .!
* إذا كان هذا هو مستوى الهلال طبيعي جداً أن يتأمر الاتحاد العام على المريخ ويُجدِّد وزير الشباب والرياضة بولاية الخرطوم اليسع صديق للجنة التسيير ..!
* معقولة يا اليسع .. خمسة شهور مرة واحدة ..(مازيمبية) واللجنة عايشة أزمة مالية ..!
* الواحد خايف من لجنة التسيير و(يدو في قلبو) لكن مستوى الهلال ضخ الطمأنينة في الأجساد و(يا برنس سلامة الإعداد) ..!
* يبدو أن لاعبي الهلال تم إعدادهم في تونس على الطريقة المثلى لتقبل الهزائم ..!
* الواحد كل ما يتذكر قرار الوزير والتمديد للجنة التسيير يمشي يفتح قناة البحر الأحمر يصبِّر نفسو بإعادة مباراة الهلال وقورماهيا ..!
* لو ما مستوى الهلال دا مفروض ناس الطاهر هواري ديل دقيقة ما يقعدوا معانا ..!
* الطاهر هواري قال خمسة شهور شوية علينا .. و(دا الكلام البجيب لناس التسيير سخط الجماهير) ..!
* يجب على الطاهر هواري إدراك حقيقة أن خمسة أشهر كفيلة بالقضاء على أحلام الصفوة لولا مستوى الهلال الذي أسعد القاعدة المريخية ولم يخيب الآمال ..!
* قالوا الهلال دخل إعداد نموذجي من بدري ..(غايتو لما تجوا من الأبيض عشان تلعبوا أول كورة في الخرطوم بتكونوا فقدتوا الدوري) ..!
* يجب على كردنة الذي يشغل نفسه ببناء الجوهرة أن يعمل أولاً على (بناء فريق كرة محترم) ..!
* إذا سلمّت الشركة الصينية الجوهرة لكردنة في ميقاتها فمن أين سيأتي باللاعبين الذين يستحقون اللعب فيها ..!
* ناسك ديل يا كردنة ما ناس جوهرة عشان كدا حقو تقع بيهم ميدان (عقرب) ..!
* عارف سيرة (العقرب) دي بتنرفزك يا (أبو الكرادن) عشان كدا أمشي بيهم ميدان (المولد) ..!
* مولد وصاحبو ما (غالب) ..!
* غايتو يا محمد عبد الماجد أشرف ما قصر معاكم لكن المرة دي الطيران من الدور الأول منتظركم ..!
* ليس مهماً أن يقوم الهلال بتغيير مدربه كل شهرين، ولكن المهم حقاً تغيير أسلوبه في تقبل الهزائم تباعاً ..!
* عدد مدربي الهلال في الموسم الماضي كان أكثر من عدد لاعبيه ..!
* قال مدرب الهلال الفرنسي ميشيل كافالي قبل مباراة قورماهيا إن تجربة بورتسودان سيرى فيها الجمهور خلاصة وثمرة الإعداد؛ و(إذا كانت دي ثمرة ميشيل فلسه منتظركم كتير) ..!
* غايتو مستوى الهلال الشوفناه دا محتاج ليه لجنة تسيير ..!
* طبيعي أن يتم إيقاف حلقة الكاردينال مع ضياء الدين بلال طالما أن هذا هو مستوى فريقه ..!
* واضح انو المسؤولين شافوا الهلال في مباراة قورماهيا وعرفو كردنة دا بتكلم ساي ..!
* لو دا فريقك يا كردنة مفروض ما تتكلم في التلفون سيبك من التلفزيون ..!
* مستواكم دا يوقف القناة من البث خليك من ايقاف حلقة ..!
* يعني باختصار الحلقة دي تم إيقافها بواسطة مدافع الهلال الغاني ابيكو ..!
* نتمنى أن يحافظ ابيكو على شهادة السلوك التي منحتها له اللجنة المنظمة لمباراة بورتسودان فهي كل ما يمتلكه ..!
* الجمهور في قمة الغليان وأبيكو جاي الخرطوم ب(سلوك) الغفران ..!
* لو ابيكو دا قاطع الفيافي من غانا وجاي ساكي جائزة السلوك مفروض يرجع بلدو طوالي .!
* (ابيكو) في غربة لا النفس راضية بها، ولا عمار الدمازين شاعر بالغلابة المساكين ..!
* ابيكو ذنبو شنو إذا كان الكاردينال قال حيحتفل بالجوهرة السمراء في بورتسودان ..(انتو كردنة “العامل فيهو ارتكاز” دا يا قبل كدا ما شاف كورة يا لما مشى سوسه ما شاف الفريق) ..!
* انت يا كردنة مشيت تطمئن على الإعداد ولا تعديها ونسة مع سادومبا ..!
* سادومبا دا لما يجيك شهر خمسة بتكون انت برا المنافسة ..!
* إتسندمبي ..!
نقوش متفرقة
* المجهود الذي يبذله أشرف في أختيار الكسكتات لو بذلوه في فريقه لحمى نفسه من الهزائم والنكسات ..!
* هسه بصراحة يا أشرف دا فريق تلبس ليهو كسكتة ..!
* نحنا يا كردنة لو فريقنا بمستوى فريقك المتواضع دا كان رئيس النادي حلق صلعة (انت لابس كسكتة وحائم وتستقبل في الهزائم) .!
* ويا أب كسكتة كورتكم حتة ..!
نقش أخير
* يا ونسي الهلال دا الفيهو اتعرفت من الإعداد .. سيبوا المجاملة وركزوا مع قضايا المريخ في الاتحاد ..!

شارك الموضوع :

تعليقات الفيسبوك

تعليقات


6 التعليقات

إنتقل إلى نموذج التعليقات

      1. 1
        الواضح

        دا مستوي النقاد الرياضيين عندنا . الكورة تتطور من وين ؟؟ رحم الله عبد المجيد عبدالرازق اخر ناقد رياضي في السودان . والباقين مشجعين مساطب زي كابو دا

        الرد
      2. 2
        mofez

        لا حول ولا قوة الا بالله. دا مستوى الصحافة عندنا . لو سألنا الصحفي دا ما هو موضوعك وما الفائدة التي يجنيها القارئ من هذا المقال اذا صحت التسمية.

        الرد
      3. 3
        عمر

        انتو الممسح ده علاقتو بالكورة شنو , ياخي روح أكتب عن انصاف مدني والدلوكة مع احترامنا للدلوكة يادلوكة.

        الرد
      4. 4
        سوداني وافتخر

        ياخ الحشرونه الاسمه منو كابو دا والله مكجنوا كجينه شديده خلاص صحفي شنو وناقد شنو طاحونه ما بتقيف بس يسئلوا ربع سؤال تعال شوف لو وقف تاني من النقه ورررررررررررررررررررررررررررررررررررررررررررررر ورررررررررررررررررررررررر وييييييييييييييييييييييييييك لكلكلكلكلكلكلكلكلكلكلكلك وجك وجك وجك وجك وجك الكنترول ينوم ويصحى يلقى الطاحونه لسه مدوره !

        الرد
      5. 5
        اكرم حسن

        من دلائل بوس السودان ان يكون مثلك صحفى
        فانت وضيع الشخصية تافه العقل وهذا ليس تجنيا عليك بل لمعرفتى اللصيقة بك

        الرد
      6. 6
        الفكي أبو عصايه

        إنتو كابو دا من أي منطقة بالسودان، الأسم دا ما غريب علي.

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *