زواج سوداناس

أعز مكان ..وطني السودان



شارك الموضوع :

الان و بعد ان تقاصر العمر واستطال ظل الماضي .. (رحم الله الطيب صالح )..ووجدنا اننا قد تجاوزنا عمر النبوة بقليل.. (قليل دي تحتها خطين ) ..اود ان انقل خبرتي للأجيال القادمة التي يقدر لها الله سبحانه وتعالى العيش في (اعز مكان ..وطني السودان )….اعلم يا بني انك ان:
1- صحيت من الصباح ..لقيت موية في الحنفية (دا اسمها ولو نزل منها موية ..لو اصدرت شخير ..تبقى ماسورة )..طوالي استحم ..بدون تردد ..الدنيا ما معروفة ..والله عالم تلقى تاني موية في الحنفية متين.
2- وجدت الكهرباء شغالة ..أشحن الموبايل ..والبطارية التي تعمل بنظام الشحن ..هذه الوصية سارية حتى يرث الله الأرض ومن عليها ..لا تستمع لمقولات مثل السد الرد ..وكهرباء التصدير .وايه ..مش عارف ايه …اشحن بطاريتك ساااي يا زول .
3- طلعت الشارع لقيت محل الغاز فاتح وبه اسطوانات غاز …ارجع الى البيت واملا (الفاضي) …ولو لقيت طريقة تمتلك كل انواع اسطوانات الغاز فافعل ..فانها يا بني تتداولنا مثل الايام بين الناس ..يوم النيل موجود ..ابرسي مافي ..يوم ابرسي متوفر ..امان مختفي ..فليكن شعارك كما الكشافة ( كن مستعدا دائما ).
4- لو لميت ليك شوية قريشات ..ووجدت فرصة لشراء قطعة أرض ..في أي مكان …صحراء العتمور ..جبال تقلي …الانقسنا …اي بقعة ..اشتري .. …ثم ارجع الى بيتك ..فان بعتها فستاتيك بالخير الوفير ..وان مكثت بدون بيع ..سيأتيك قرار النزع الحكومي عاجلا او اجلا ..اصلا الحكومة عينها في الاراضي الفاضية ..تجي تنزع حق المواطنين …المهم لا تحزن ..فنزع الحكومة فيه خير كثير ..ما عليك الا ابراز الاوراق الثبوتية ..يتم تعويضك في منطقة المجاهدين ..محلية (ارقد قفا ) .
5- الامر يسري ايضا علي السيارات ..لو وجدت أي فرصة لشراء سيارة ..ان شا الله لعبة ..اغتنمها ..فالسودان هو البلاد الوحيدة التي تعمل بالمثل القائل (الدهن في العتاقي ) ..والشجر الكبار فيهو الصمغ …سيارتك مهما كان نوعها ..عمرها ..درجة عطبها ..سيزيد سعرها اضعافا مضاعفة وهي جاثمة امام منزلك مكتوب فيها للبيع .
6- لا ترهق نفسك في البحث عن وظيفة ..اشتر تلفون حديث ..اجمع بعض المعلومات عن الشقق الخالية ..والاراضي الموجودة في الاحياء المجاورة ..ثم ابدأ العمل فورا (سمسرة ) …اسمع كلامي ولا تضيع في الاوهام عمرك يا بني ..فهي دنيا ..اغني اهليها ..سادتها السماسرة .
7- ان لم تستطع ان تكون سمسارا ..فعليك بالسياسة ..وهي ان لم تكن سهلة كالسمسرة ..فهي اقل وعورة من دروب العلم ..ولكي تسلك هذا الدرب ..ما عليك الا الرجوع الى مقالتنا السابقة في هذا الشأن بعنوان .. (خد لك بريك ..خد لك كيت كات) .
هذه الوصايا السبع..هناك من طبقها وعمل بما فيها فصار سمسارا ..طبقت شهرته الافاق ..وهناك من تجاهلها ..فدرس ..ودرس ..ثم عاد لممارسة السمسرة ..فانطبق عليه المثل القائل (الفرق بين الناجح في الشهادة السودانية والراسب ..ان الراسب يدخل السوق مباشرة ..اما الناجح فيقضي خمسة سنوات في الجامعة ..ثم يتخرج ..ويدخل السوق)…الا هل بلغت ..اللهم فاشهد.

د. ناهد قرناص

شارك الموضوع :

تعليقات الفيسبوك

تعليقات


1 التعليقات

      1. 1
        شوقى يعقوب

        الاخت ناهد ابدعت فى هذا المقال ونعم الوصايا وماتتعلموا ابدا عشان تقصروا السكة

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *