بابكر سلك

ده قون ولا لقيمات يا أوكرا؟!


> شفتوا قون اوكرا ؟؟؟
> شفتوهو كويس ؟؟؟
> محمد عبد الماجد
> الكلام ليك يا المنطط عينيك
> شفت قون اوكرا كويس؟؟؟
> قلت لي شيخ منو !!!!!!
> قون اوكرا ده لو دايرين نحكيهو للناس
> داير ليهو ستة حلقات
> لكن نحاول نختصر الروايه
> ونحكي عن الهدف
> شفتوا صاج اللقيمات ؟؟؟
> قول ده المرمي
> شفتوا الكمشه البتقلب اللقيمات؟؟
> قول دي كراع اوكرا
> لكن ياتو كراع ؟؟
> اليمين ولا الشمال ؟؟؟
> الزول ده شاتها بالكراعين
> حجله بس
> اها
> شفتوا اللقيمات ؟؟؟
> قول دي الكوره
> سمعتوا شخخخخخ في الشبكه ؟؟
> قول دي طششششششششش بتاعت اللقيمات
> يعني اوكرا زي البحمر في لقيمات
> جدع اللقيمات في الصاج بالكمشه
> مغراف يشيل اللقيماته ويخلي الزيت
> شفتوا الزيت ؟؟؟
> العالم كلو بتكلم عن هدف اوكرا
> خشوا اليوتيوب وشوفوا يا روشا
> فطومه شفتي ليك زول برمي لقيمات احسن من اوكرا؟؟؟
> وابشرك يوم كورتكم قال داير يفتح الفطير
> ويقطع السامبوكسا
> ويرمي المشبك
> فطور عريس عدييييييييييييييييل كده
> ايها الناس
> الابداع ابداع
> والابداع امتاع
> والامتاع استمتاع
> والاستمتاع في رمي اللقيمات في الصاج
> وانصاف المواهب يا روشا لا ترمي اللقيمات ولو كان الصاج بحر
> ايها الناس
> قون اوكرا زي ضربة برج التجاره
> بالجمبه
> لا فوق شديد
> ولا تحت شديد
> بالجمبه دي
> البعض يقول بانو ما شاهد قون زي ده قريب ده
> خلوها قريب ده
> بعيد ده شفتوا قون زي ده ؟؟؟
> تقول لي ميسي !!!!
> ايها الناس
> اوكرا موهوب ولكنه عدو نفسه
> يجب الاخذ بيده وافهامه انه موهبه نادره
> وان الجديه والحفاظ علي اللياقه البدنيه هي من اهم مميزات المحترف
> عشان خاطروا في الاول
> المهم
> نحله جات مع الجماعه
> شافت قون اوكرا
> قالت بري بري بري
> جن زي ده اصلو ما شفناه
> المهم
> الشفوت ما قصروا
> كلهم حضروا
> وحضروا الجرتق وكأس الوصيف المفرتق
> وصدقني يا روشا
> اخير تنسحبوا من اسي
> جنس اللقيمات ده ما بتقدروا عليهو
> وصاج مكسيم اكبر من صاج السمك
> من بعيد اللقيمات ما بتختاهو
> تتذكر سمكة علولو المن جامعة النيلين ديك ؟؟؟
> صاج مكسيم مع لقيمات اوكرا وكترت الزيت دي بتجيب الانسحاب
> لكن بصراحه
> مدافع اللعب النضيف والسلوك القويم بتاع الهلال الجديد ده
> براحه بشتغل مع اوكرا مويه
> مويه يبل فيها اوكرا يدو ويرمي
> عشان العجين ما يتلصق
> انا غايتو لو محل الاتحاد
> من اسي بدي اوكرا هداف الممتاز
> لانو قونو ده بي تلاته واربعين قون
> زول يشوت الكورة بي رجلينو الاتنين ؟؟؟
> ياخ ناس بويا لي اسي بطلعوا في الكورة ويقعوا
> يا ارض احفظي ما عليك
> يا ربي تكفينا شر العين
> وشر حاسد اذا حسد
> انا متاكد انو حسد
> مجرد ما اوكرا جاب القون
> حسد طوالي
> ومن شر النفاثات في العقد
> ابو ماسوره الله يكفينا شرك
> المهم
> قصة تقديم محمد موسى لاستقالته ما عجبتني
> الصاح ما بعالجوهو بالغلط يا كابتن
> وكيان المريخ يساندك لهذا المنصب
> فلماذا الاعتذار ؟؟؟
> فكر من جديد يا محمد موسى
> والمريخ يحتاجك
> بشده بشبط بكداره
> يحتاجك
> المهم
> اموت واعرف مجلسنا بعمل في شنو بخصوص الاستثمار
> لاني واثق من ان ملف الاستثمار عندهم الآن على الطاوله
> وانه همهم الاكبر
> بي راحتكم يا ونسي
> بس فاجئونا شديد عليك الله
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الناس كلها تكورك معانا ولينا
> جد لينا جد لينا جد لينا
> البرلمان حاسي بينا
> رفض زيادة اسعار الغاز يا والينا
> وقال الزياده مجحفه لينا
> طيب رأي البرلمان شنو في باقي الزيادات يا والينا؟
> ولا الاجحاف ما بقع علينا
> الا في الغاز يا والينا ؟؟؟؟
> بطلوا نقه وختوا الستين يا برلمانيينا
> وشوفوا ليكم موضوع تاني ناقشوهو لينا
> قول ليهم صدقناك يا والينا
سلك كهربا
ننساك كيف والكلب لما شاف شفعنا في صفوف الغاز قال اطفال الانابيب بقوا واقع لدينا
والى لقاء.
سلك