أبرز العناوينمنوعات

صورة حرق شريحة زين تتصدر فيسبوك وناشط.. ألقيت بشريحة زين في مجاري الصرف الصحي.. وشركة زين “السودان” ترد على الهجوم


“شركة زين إستغلالية وانتهازية لأبعد الحدود وتمارس اللصوصية في أبشع صورها في بلد لاتتوفر فيه الحماية للمستهلك المغلوب علي أمره.. قاطعوا هؤلاء اللصوص وأنا شخصيا ألقيت بشريحة زين في مجاري الصرف الصحي”. هكذا كتب أبوعلي عمر على صفحة زين الرسمية على فيسبوك تعليقاً على أسعار خدمات الأنترنت “البرودباند” الجديدة التي أعلنتها شركة زين.

وتداول نشطاء على نطاق واسع صورة تظهر أصابع تشعل النار من قداحة “ولاعة”على شريحة زين تعبيراً عن الغضب الشديد بعد أن أعلنت شركة زين “السودان” زيادات غير متوقعة في أسعار خدمات الإنترنت وبدأت تطبيقها من يوم الخميس 28 يناير 2016.

وبررت شركة زين الخطوة أنها تمهيد لخدمات الجيل الرابع وقالت الشركة بحسب ما نقل عنها محرر موقع النيلين (نود أن نوضح أن التغيير الجديد في أسعار خدمات البرودباند جاء على أساس توفير باقات مختلفة متميزة بسعات كبيرة وصغيرة تناسب كل مشترك على حسب حوجته ,بالإضافة لإيقاف سياسة الإستخدام العادل التي تم ايقافها بناءا على الشكوى المتكررة من أغلب المشتركين والتى بإيقافها تم توفير سرعة تصل حتى 42 بالتساوى لكل المشتركين ,هى تعتبر تمهيد لنزول خدمة الجيل الرابع ,لذا نأمل شاكرين من كل الزينين تجربة الخدمة أولا ومن ثم الحكم عليها سلبا أو إيجابا).

ورغم التبرير الذي ذكرته الشركة إلا أنها واجهت سيل من الإنتقادات العنيفة وكتب عملاء الشركة ألاف التعليقات تعبر عن سخطهم من خطوة الشركة وعدم إقتناعهم بتبريرها.

ومن التعليقات على صفحة زين الرسمية على فيسبوك
Hiba Al-Fadil
رفعتوا السعر وعملتوه محدود وتجوا تقولوا شلنا الاستخدام العادل؟ طيب من سيئ لي أسوأ يعني؟

Hassan Ibrahim
عريان و لابسلو صديري،، انتو نافعين في ال 3G عشان تمتعونا بال 4G.
( شين موبايل انترنت.. سرقة جديدة.. معطة فريدة)
وداعاً يا سراب خداااع..
نقطة سطر جديد
MTN

Osman Sanhouri
ده حنكم يا مستهبلين والله نحن زمن صابرين علي استهبالكم ده اصلا دي بلد اي واحد عايز الغف فيها وخلاص ياخ ارباحكم في السنه تتجاوز المليار دولار عايزين شنو اكتر من كده اذا عايزين تمنو علينا بي شبكه الجيل الرابع ماعاوزنها زاتو البتعملو في ده اسمو جشع ما اكتر من كده الله اكبر عليكم وده طرفنا من زين انا شخصيا شريحتي دي خط من زمن ضارب ضاربين ليك محسوب عليك وكنت بعتقد انكم شركه مميزة وطلعتو مجرد ناس اكتر من جشعين ياخي الفينا مكفينا حتي النت البنهرب بيو من بلاويينا اليوميه ده كرهتونا ليو وان شاءالله قراراتكم دي ح تندمو عليها بلا زين بلا زفت بكرة ما تصبح ح اتخارج منكم انتو طفشو الناس من شبكتكم واقعدو والحكومه تتطفش الناس من البلد وتقعد اصلو انتو اللتنين وجهان لعمله واحده وهي الجشع

وجنحت بعض التعليقات حول زيادة أسعار النت من شركة زين نحو السخرية مع الإشارة للزيادة الكبيرة التي حدثت في الأيام الماضية بزيادة أسعار غاز الطهي في السودان.

Mohamed Elgily
الشركه دي تكون اصلا شغاله بالغاز ووقت الغاز بقي بي 75 جنيه قامت هي رفعت اسعارها (فهم برضو)
اختصار الموضوع انا مقاطع وانتو

Osman Alhaseen
بقت غاز ونت ارحمو من في الارض يرحمكم من في السماء . الناس بفتشو لي حق الاكل والغاز وانتم جاين تزيدو النت . النت عندنا هو الحاجه البتصبر الشعب الواحد لو زهجان بخش النت عشان يفرفش شويه انتم خربتوها ما صلحتوها . حته لو عملتوها 4G الشعب مسكين والله اشتري غاز ولا اخش النت والله حرام عليكم .

الخرطوم/معتصم السر/النيلين


‫24 تعليقات

  1. كل مره انا بقول الشعب السوداني ما بيفهم في سياسه المقاطعه مع انها هي سهله قاطع الجشعين

    1. ليتني سجلت لنفسي سبق مقاطعة زين

      فمنذ الإعلان عن مجانية المكالمات ومش عارف شنو ….قلت فلنجرب ….وجربت وفي وقته تماما عرفت الحرمنة

      ولم أشترك غير تلك المرة ، وبعيييييدا رميت شريحة ” زن زن زن ” ….ولعلمكم ” زن ” رياضة عقلية يمارسها بعض اليابانيون

      down >>>down

      مافي تهاون ..مافي تهاون

      مافي توازن …مافي توازن

      غايتو أنا بس مشاركة وجدانية مع مشتركي زين ….ولأني أكره الاستغلال الابتزازي …والابتزاز الاستغلالي

      …لكني شخصيا ما رابطني بيهم حبل

  2. شركتين فقط للاتصالات بالسودان مافى منافس لهم عشان كدا بضحكوا على الناس …واصحح معلومة للكل ماتسمعوا الكضبه بتاعت السودان له احدث اتصالات فى العالم صاحب العقل يميز هل السودان نفسه دولة مصدرة للهواتف او الكابلات للدول المتقدمة تكنولجيا

  3. الخم في كل شيئ ليس النت فقط وذلك لغياب التمثيل النيابي الحقيقي .. التلاعب والجشع في الغار وتوريعه وكذلك التلاعب بالصف

  4. اولا الشكر لادارة موقع النيلين لاتاحتها لى فرصة التعليق
    زين عبارة عن مافيا حتى فى تنزيل الرصيد توجد خصومات غير مبررة والمشترك لا ينتبه لها , شغل احتيال.
    انا شخصيا مقاطع زين منذ العام2005

  5. وهل النت ضرورة من ضروريات الحياة لذلك اتركو لهم بضاعتهم حتي تكسد ومن بعد ذلك سوف ترخص لامحالة لذلك عليكم بسوداني وخليك سوداني ……..!!!

  6. سبحان الله .. طيب لمن زادو سعر الغاز ليه الناس ما قاطعت ؟! و لمن زاد سعر اللحمه ليه الناس ما قاطعت ؟! .. النت دا كماليات بينما تلك التي كانت تستحق المقاطعه هي اساسيات و ضروريات حياة انسان ، عجيب امرنا نحنا الشعب السوداني .. انا شخصياً بتمنى النت يكون كده فاشل وتقيل في السودان ألا يتطور نسبة لما رايته في الخليج من تاثير النت السريع والمواكب السلبي على اغلب الناس ياخ الواحد 24 ساعه طالما هو صاحي تلقاهو ماسك تلفونو في يدخل ويتصفح دي ما حياه .

  7. ارجو من الحكومة فتح عطاءات لمنح شركات جديدة رخص لتشغيل الهاتف السيار وارجو منح شركة كنار واتصالات وهنالك شركات عالمية تتمني أن تدخل الي السوق السوق السوداني وبالتالي وبالتالي يتم فك الاحتكار من هذه الشركات وشركة زين زين باعت كل حصتها في أفريقيا لأن الأفارقة عرفوها شركة محتالة وماقدرت عليهم الا نحن نحن السودانيين مصتنا مص.

    1. لو فتحوا عطاءات لمنح شركات جديدة حتكون بتاعت الكيزان والمؤتمر الوطني مش؟؟

  8. شركة سوداني وام تي ان عندهم عرض ظريف للشريحة.. ممكن تستخرج شريحة بنفس رقمك الحالي في زين.. لما يمشي ايي زول يحول شريحة زين لي ايي شبكة تانية بكون ساهل علي الناس التأقلم وبي كدا مافي رقم بضيع .. ونخلي ناس زين ونقول ليهم (ياناس زين… انتو حتروحو من ربنا فين)

  9. ياجماعة لو فعلا شركة زين زادت الاسعار لانها حا تشغل
    خدمة الجيل الرابع 4G والله مفروض تفرحوا ما تزعلو . .لان هذه الخدمة بتوفر
    سرعات انترنت عالية السرعة تصل إلى 100 ميجابت/ثانية
    وبيكون فى فرق كبييير ونقلة حقيقية مقارنة بى الشبكة الهباب الشغالين بيها الان
    بس هذه الخدمة بتطلب من مزود الخدمة “زين” تركيب اجهزة اضافية
    فى الابراج القديمة الموجودة حاليا , وهى عملية مكلفة فى الشراء
    وفى التركيب وفى التشغيل حسب معرفتى . .
    يعنى هم ذاتهم حا يخسرو . .ولذلك اجد لهم العذر
    اذا هم فعلا حا يقدموا لينا خدمة الجيل الرابع ,
    بس اطمئنو فى المستقبل القريب سيخفضوا الاسعار اذا ظهر
    منافس او رجعوا خسارتهم .

    1. انت مش انت وانت وجعان
      100 ميجا مين والناس نايمين
      اصحى ياعمي

  10. السلام عليكم موقع النيلين الرائد
    زين زادت اشتراكها في النت الحكومه زادت كل حاجه الشعب ناقص كل حاجه يحلها الشربكا الشربكا الحكومه زين

  11. زين ديل انا شخصيا مقاطعهم منذ العام 2010 تقريبا لابفعل انترنت عندهم و لازفت اصلا عالم حرامية وجشعين ومصاصين دماء وحرامية انتو بالله هو وينو الجيل الثالث عشان تقول لينا الجيل الرابع ياحرامية يالصوص وبعدين انتو اصلا يازين ياحرامية سرعاتكم كلها سرعات وهمية وخيالية لاتوجد الا في دعاياتكم البائسة التافهة وعلي الرغم من سرعات زين التافهة مطبقين مايسمي بسياسة الاستخدام العادل الهي يخسف بيكم انتو وعمر البشير في سافل ارضين ياحرامية يااكلي اموال الحرام…ووينها وزيرة الاتصالات الطرطورة القاعدة زي الهبنقة تتفرج بس زي الشافع الادوه حلاوة حربة الله لاكسبها الكضابة المحتالة

  12. انا من يوم الخميس لي الجمعه خسران اكثر من 30 جنيه وكلا 5 ساعات وانتهت ياحراميه تف عليكم وعلي شريحتكم حراميه كفايه الغلا النحنا فيها دي بلاش زين بلاش قيامه تبا لكم يالصوص

  13. والله يا ناس زين حراميه ومحتالين وبتاكلو عرق المساكين والغلابه وانشاء الله يبقي ليكم ورد مفروش يأدي لي جهنم تبا لكم يالصوص في يومين خسران ما يقارب الثلاثون جنيه او اكثر يبقي ليكم بي جحيم في كروشكم الكبيره دي باي يازين ياحراميه

  14. الناس ماشه لي قدام والعالم في تطور وانتو لسه خدماتكم القديمه اخير عدمها قال تعملو 4g قال ما تتهربو بي خدمات الجيل الرابع خدماتكم لحدي 121 بالتفعيل كنا معاكم وزاد الطمع بقه اكتر من 200 و300 عديل ياخ خافوا الله كدا الدول الخارجيه ح تستهتر بالسودان والبلاوي الفيهو بلا زين ولاشي يلا خلينا ليكم التلفونات زاتو انشاء الله تغنو بس وما عافي ليكم لي وجه الله ????

  15. هااااااااااااااااااااااااااااااادا طرفنا من زين الله يخرب بيتهم بلا غاز بلا زفت نرجع لزبل الغنم وما احلي الفولة بالزبل

  16. بدت شركة زين ميتة وماتت وهي اصلا ميتة ..
    زين خارجيا خسرانة ولا ترفع اسعارها بل تقدم عروض ومكافأت لزبائنها ولجلب المزيد .. وفي السودان تربح ومع هذا تصر وتزيد اسعار الخدمة وتنصب على المشتركين لانه مافي واحد بيسالهم ليه رافعين الاسعار طالما انتم ربحانين ..
    زين استولت على خدمة موجودة وهي موبي تل ولم تزد اي شيء على ما كان موجود .. تخيلوا في الشمالية وفي منطقة الدبة بالذات لا توجد مطلقا خدمة زين واستحالة تلاقي شبكة تكلم ناهيك من ننت وزيها وزي سوداني الا ان ام تي ان شوية فيها الحيل .. ولكن لا تساوي اي شيء ليسمى خدمة ..
    قاطعوا واستعملوا هذا السلاح فهو يطوع رقابهم غصبا عنهم ..

  17. تحذير هام للمغتربين
    هذه آخر مرة لتوضيح كيفية سرقة أموال وعرق جبين المغتربين:
    (1) انشاء أي شركة إستسمار في السودان خاصة أو حكومية هي بدعة
    المقصود منها نهب أموال المغتربين.
    (2) لا توجد في السودان أى أمانة أو قوانين تحمي المغتربين.
    (3) في حالة سن قوانيين لإجبار المغتربين لتحويل العملة الصعبة
    وصرفها في بنوك اللصوص نلجأ مباشرةً للطريقة الحرة للتبادل
    بتسليم العملة في الخارج وإستلامها في السودان بالمحلي وهي
    الأفضل لضمان إستمرار تصاعد سعر العملة.
    أخيراً إلى الجحيم جهاز المغترين.

  18. ليه سكتوا عندما أعلن زيادة الغاز؟؟؟؟ زادوا ليكم النت لأنكم شغالين كلام فارغ مع البنات والمواقع الإباحية والصعلقة وقلة الأدب. جيل فاشل سكر وعربدة ومخدرات وعفن وغباء وبلاده ، إلا من رحم ربي.

  19. الشعب السودانى مابيعرف لغة المقاطعة لو عندو ثقافة المقاطعه كان البلد مشت تمام المقاطعة فى كل شى تزيد عن حدها تحصل الوفره وترخص الاسعار اللهم لانسالك رد القضاء والقدر ولكن نسالك اللطف فيه

  20. صدقت يا الفكي ابو عصاية. الناس ديل ما عملوا العمايل دي لما زادوا الغاز وشغالين بالفارغة . نت شنو واتصالات شنو هو الناس ما لاقية تاكل وتسكن كويس كمان عايزين نت وونسة انصاص الليالي مع النسوان شاحد الله كل الشركات تزيدوا اضعاف اضعاف الرسوم الحالية عشان نشوفكم ح تموتوا ولا بتعملوا شنو. البلد لي رقبتا ماشة لي ورا والحرامية بقوا بالرسمي وعديل نهبوا البلد. النت ليكم شنو ؟؟؟؟
    شوفوا المواضيع المهمة المعايش والصحة والالاف المهاجرة من شباب البلد واولادها البقوا لا شغل لا مشغلة غير الفارغة والنت والواتساب والكلام الما عندو معني دا. البلد فضت من الاولاد الكويسين فضلوا فيها الصعاليق والسكرجية وبتاعين المخدرات. غلبوا اهلهم وجابوا ليهم الفضائح والكلام ومرضوهم مرض وجابوا روسيهم في الواطة. بالله كانت أسر ليها وزنها وشنة ورنة بقوا بسبب اولادهم الطايشين وشهم يلعن قفاهم وأغلب الفساد دا من النت الدايرين يرخصو ليكم .
    جزا الله زين خيرا عن كل رب أسرة وكل شخص حاسي بالمسؤلية ولا عزاء للعطالي والفارغين وعديمي الشغلة.

  21. اصلا انا م بستخدم شريحه زين للانترنت بس لما سمعت ب الخبر دا جربتو ولقيتو ناجه و ب الجد جميل والشبكه مئه في المئه بس الباقات شويه غاليه مع تحيات احمد بسيوني