فطومة رداااااااحة
> فطومة اختي ردااااااااحة
> بالله من يوم مهند قلب ابو عاقلة قليب اللقيمات في الصاج
> فطومة تردح لي أسي
> ما خلت لي وردة غصن يتكي عليهو
> البقرا كلامها يقول توابو عاقله لي اسي راقد في الواطه
> ابو عاقلة يا فطومة اتحاور وقام فات
> صحيح لسه الفلايت عندو
> لكن البقت بقت
> بطلي ردحي
> ما تبقي رداااااحة للدرجة دي
> لكن بيني وبينك قليب اللقيمات ده حار شديد
> لو مهند كمل مية سنة
> وقابل ابو عاقلة
> تاني بحاورو مية مرة
> الفنان لا يشيخ يا فطومة
> وانصاف المواهب لابد من تساقطهم كأوراق الخريف بالطريقة دي
> او كأوراق اللقيمات امام شاي لبن
> وهو لبن ساي؟
> مهند قننو
> المهم
> الرداحين كتاررر
> وبدا الردحي في كاريكا
> ومن خلال الردحي بانت حقائق
> اعترف الرداحون بان كاريكا تلاتة سنين قاعد ساي
> قاعد عالة
> اي كورة تصلو بفقدها
> طيب
> زول بالاوصاف دي معقولة يكون من افضل تسع لاعبين في افريقيا موسم 2015؟
> يشتلوا
> ويشتلن
> وينسوا
> وينسن
> ولمن يجوا يردحوا
> ولمن يجن يردحن
> يمرقوا الحقائق
> والحقائق براهن بمرقن
> كاريكا يا ناس من مشى الحج
> الجسم صدق انو كبر
> وجلس
> لذا كان بكري من افضل عشرة لاعبين في افريقيا موسم 2015
> جاب سبعة أقوان
> وجهز ستة
> وعشان هذا التألق
> شتل الشتالون قصة نجومية كاريكا
> ورجع الشتالون حينما ردحوا لحقيقة انو كاريكا جلس
> ايها الناس
> الردحي شمل الشغيل جمل الشيل
> قالوا اي كورة تصلو بتتقطع منو
> ووصل بشة
> قالوا مابتم الكورة
> ووصل نزار
> قالوا تقيل
> وواحدين قالوا ثقيل
> وروشا ردح في الثنائي موكورو وايشيا
> والرحي طال مساوي
> ووليد علاء ضعيف البنية
> وجمعة طبعاً شبع ردحي من بدري
> اما بويا فوصفوهو بالاشتر
> والكيشة
> والمامركز
> الكورتو قديمة
> ايها الناس
> الردحي فات مدرب اللياقة
> ووصل للمدرب
> حتي سيدا جاهو طرف الردحي
> يبقى بتشجعوا في شنو يا الرداحين؟؟
> تيمكم كعب
> انا شخصياً لو بشجع فريق فيهو زول بتحاور جنس محاورة ابو عاقلة دي
> علي الحلف اخليهو واتابع الدوري التشادي
> ايها الناس
> شفتو قون اوكرا؟
> ناس حاج كاريكا والشغيل الشكروهو برك وبويا الاشتر وبشة النفسو ضيق وموكورو وايشيا المقلب
> ديل جيبوهم كورس تقوية في القلعة الحمراء
> التسجيل عند دوحيه
> من تسعة لي اطناشر يومياً عدا الجمعة
> واتردحي
> الموسم ده يا فطومة الا تأجروا نسوان يحررن ليكم البكا
> المهم
> الشفوت في المريخ هم الساس والراس
> وهاهي مجلة ستموني الرياضية بالفيس والواتس (برغم التسعيرة الجديدة)
> هاهم يلتزمون بتكلفة إعادة تأهيل النجيل
> بواسطة شركة متخصصة
> والمواد مستوردة
> ومقبلين على النادي
> شفوت زي الشفوت
> ولسه
> يا ما نشوف من القروبات
> شفوت بهناك وبي جاي ومابنعرف النوناي
> ايها الناس
> الصورة ناقصة كوفي
> ورمضان
> لكن برغم ذلك تبدو جميلة
> فقط وقوفنا خلف الكيان
> تفعيل 2875 باصرار
> وعلي المجلس ايجاد مشاريع الاستثمار
> قصير الاجل سريع العائد
> وطويل التيلة
> المهم
> الردحي لايغير ما بالصفر حتي يغير الصفر ما بانفس ناس الردحي
> ايها الناس
> «إن تنصروا الله ينصركم»
> اها
> نجي لي شمارات والي الخرتوم
> كان شفت يا والينا
> يزيد الغاز ولا هامينا
> يتظلل ويترفع القزاز ولا هامينا
> يترفع الدعم ( هو في) ولا هامينا
> نقعد عطالة ولا هامينا
> تكتر البطالة ولا هامينا
> تبتسموا لينا ولا بحوق فينا
> بس كل الهامينا يا والينا
> سؤال واحد بحير فينا
> البرلمان ده شغلوا شنو ورينا؟
سلك كهربا
ننساك كيف والكلب بفتكر الحكم يحكم ومافي داعي لمراقب المباراة طالما ماعندو صفارة
والي لقاء
سلك
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
أستاذ سلك تعيش و حتشوف الدوري الشادي افضل من السوداني ،، كل افريقيا كرتها اطورت إلا نحن لأنه ما عندنا غير الكلام الكتير و الردحي البتحكي عليه و شاد عندنا لاعب او اتنين محترفين في اوربا لكن اذكر لي لاعب سوداني واحد محترف حتي في جنوب السودان ( مش استخفافا ) لكن لأنه عمرها خمس سنوات ، و بكره حتبقي اقضل مننا و زيد اردح هلال مريخ او مريخ هلال و الله كلهم لا علاقة لهم بالكورة و كذلك انت و فطومة ،،
العقرب المقطوع ضنبه أقوانه كلها بلنتات مشكوك في صحته، وباقي الضنب قطعوهو في ممباشي يا أحمد بدير