زواج سوداناس

شاي صاموتي ..ياخ



شارك الموضوع :

أسؤأ شئ ..انك تصحى من الصباح تلقى الغاز خلص ….بدون اي انذار …يعني هم ناس الغاز ديل لما رفعوا قزازهم كدا وظللوه ..مش كان يجيبوا لينا انابيب عندها عداد الجمرة الخبيثة ؟؟ عداد ناطق يقول ليك (ليس لديك غاز يكفي لعمل الشاي غدا صباحا …نرجو التعبئة ..نكرر ..الرجاء التعبئة)..يمكن بالليل كنت مشيت صراف الي وصرفت اخر ما تبقى من خميرة نقود ..ذلك اننا وبحمد الله الى الان لم نصرف راتبا ..واخر مبلغ نزل في الحساب كان قبل (تصفير ) خزنة السودان يوم 25 ديسمبر العام الماضي ..المهم ما علينا …لا يوجد غاز ..يعني لا يمكن عمل شاي صاموتي ..وهو في اعتقادي احد الاسباب الرئيسية التي تجعلك تخرج من تحت البطانية هذه الايام ..لا يقترح علي احدكم عمل شاي بالغلاية الكهربائية ..دا اسمه شاي نئ …نعم ..الشاي لو لم يتم غليه مع الحليب في نار هادئة ..وشاهدت لون الحليب يتغير من الأبيض الى البيج ثم الى بني خفيف …ورأيت بام عينيك الحليب وهو يرتفع رويدا ..رويدا حتي يقارب ان يتدفق خارج (الحلة) ..ثم انزلته وتمت تصفيته حتى بانت له رغوة في حافة الكوب …هذا هو الشاي الصاموتي الأصلي ..غير ذلك لا تحكي لي عن أي شئ …ماذا افعل الان ؟؟ …اطرق باب جيراني ..في هذا الصباح الباكر ؟؟ أقول ليهم شنو؟؟ عايزة أعمل شاي صاموتي عندكم؟؟ الانبوبة قطعت؟؟ عاد دا كلام في زول بستلف غاز الايام دي ؟؟ …المزاج اتعكنن من الصباح …ابني الصغير ….قال لي (يا ماما انت مالك ؟؟ زي الما نمتي كدا ؟؟) ..لا والله يا بني ..انا نمت لكن ما صحيت حتى الان …يبدو ان المتحكمين في امر الغاز هذا لم يتذوقوا هذا الشعور ولم يمروا بهذه المواقف قبل الان ..يا ربي كل زول فيهم عنده انبوبة كبييييرة بتاعة غاز؟؟ ولا عنده خط ساخن موصل بالمصفاة ..اول ما الغاز يبدأ ينقص ..طوالي تتم تعبئته؟؟ …اكيد لو مروا بموقف مثل موقفي هذا الصباح لما فعلوا فعلتهم التي فعلوها وهم من المتكبرين ؟؟ …قالت لي ابنتي (عشان كدا يا ماما ..دايما بابا كان…) ..سارعتها بالرد بعصبية قبل ان تتم جملتها ..(عارفة ..حتقولي لي ..بابا قال ما تتعودي علي الشاي والقهوة والمكيفات ..وايه مش عارف ايه …هسع انا عايزة حل لي مشكلتي ..) هزت كتفيها وحملت حقيبتها وغادرت …عيال اخر زمن …لا احد يفكر معك …شكيتكم علي الله يا ناس الغاز ..دي عملية تعملوها …الغاز يبقى غالي لدرجة انو نحتاج لي ختة عشان نملأ الانبوبتين؟؟ ..طيب نملأ الغاز ..ونطبخ شنو؟؟ …لا يوجد في العالم كله مثل هذا الامر ..ان يرتفع سعر سلعة ما بدون اضافة أي تحسين فيها او في مستوى خدماتها …دا أسمه قانون (كان عجبكم)…ارجع تاني لي مشكلتي ..القى شاي صاموتي وين ؟؟ …اعتقد ان افتقاد الشاي قد بدأ يظهر تأثيره خاصة في هذا المقال المتخبط …خرجت من البيت بعد ان أسلمت امري الى الله وشكيت ناس الغاز لرب الانام ..اللا نام ولا اكل الطعام …ولكن ربي الكريم ..فتح علي فتحا مبينا ..اذ انني ما ان مررت على دكان ادم ..حتى وجدته هو واسحق ويعقوب جالسين في مجموعة من (البنابر) متحلقين حول (كانون ) متوهجة ناره ..عليه (حلة )شاي اصلي …لمعت عيناي بقلوب حمراء كما في اضافات مواقع التواصل ..هتف ادم (هاجة ام عبد القادر ..اتفضل معانا شاي ) ..عاد دا كلامك …جريت بنبري وقعدت …اخيرا ..شاي صاموتي ياخ ..ومعاهو اغنية (براد ما بكفيني ..القريافو راميني ).

د. ناهد قرناص

شارك الموضوع :

تعليقات الفيسبوك

تعليقات


1 التعليقات

      1. 1
        ساخرون

        شايفة الناس تفاعلت كيف مع شاي عمك ” آدم ” ؟

        راجعي عدد القراء

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *