الفيفا دي بتاعت لقيمات ولاشنو

* من اجمل ماقدمه السودان شعبا وحكومه هو استضافة اخوتنا من سوريا
* بل واعتبارهم مواطنين سودانيين
* وبالمناسبه دي
* واحد بلدياتنا صعب شديد
* مشي حوض السباحه
* لقي الحوض مليان شفع سوريين بجلبغوا ساااااكت
* تلقي الشافع نصو جوه المويه والنص التاني بره المويه
* والمويه بيناتم فااااااايره
* قام بلدياتنا ده مشي ليهو مشوار ساعتين ورجع تاني لي حوض السباحه
* لقي نفس المشهد
* قال اللقيمات ده لي اسي ما نجض???
* بمناسبة اللقيمات
* الفيفا دي بتاعت لقيمات ولاشنو
* موش اتحادنا رفع ليها موضوع شيبوب وموضوع الوك مع بعض?
* طيب كيف تفتي في موضوع شيبوب وتسكت في موضوع الوك??
* اللقيمات ده اترمي في صاجكم مع بعض
* ليه تنجض لقيماته واللقيماته التانيه لسه مانجضت?
* ولا ده من الزيت?
* بسخن في نص الصاج الشمالي وببرد في نص الصاج الجنوبي ?
* يادكتور عامر
* انت متأكد لقيماتنا ده اترمي جوه الصاج???
* ايها الناس
* في امور كده لو المجلس ما سكاها صاح
* الزيت مابجي
* حقو مجلسنا يجيب الزيت ويمشي الفيفا
* يقول ليهم وين لقيماتتنا
* اذا لقوها بره الصاج يرموها جوه الصاج
* واذا لقوها جوه الصاج والفيفا قالت دايره الزيت
* يقولوا ليها ده الزيت
* اهمال هكذا امور بخلي اللقيمات يبور
* ايها الناس
* اليوم يشرف الزعيم فاشر السلطان
* الزعيم بطل النسخه الماضيه رغم انف اجعص كسكته
* وبطل هذه النسخه الي الآن
* وغيرنا اربعه
* محمد عبد الماجد يا اربعه
* ولذا يجب علينا ان نعود من فاشر السلطان متزعمين الروليت
* السنه دي دايرين الانسحاب من الدوره الاولي
* اصلو ناس ايشيا والشيخ ديل بتخارجوا افريقيا بدري
* معقوله الزول فيهم مايدق الكوره هد الا تجيهو ارضيه!
* لاعب ولا شيخ ارانب
* لذا ولذلك يجب ان يعد لوك فرسانه للصداره
* المهم
* مايقدمه علي جعفر من مستويات طيبه
* في الاساس سببه الجمهور الذي ساند علي جعفر
* ثم اصرار علي جعفر
* وده درس من الجماهير لبعض الجماهير
* ومن علي جعفر لبعض اللاعبين
* ايها الناس
* قون اوكرا خرااااافي
* ياخ زول يضرب الكورة بطريقة رقيص الدينكا ??
* يعني الزول ده ممكن يجيب قون عشره بلدي
* وممكن يجيب قون دبكه
* وممكن يجيب قون مردوم
* وممكن يجيب قون بطان
* وممكن يجيب قون عرضه
* وممكن يجيب قون ترتره
* فنون شعبيه يا اوكرا
* حفظك الله
* ناس روشا ديل فيهم بلدياتنا كتاااار
* مايقوموا يلحقوك شفع السوريين في حوض السباحه
* المهم
* واحد قال لي كردنه يشيد بمقاطعة جمهور الهلال للمباريات
* قلت ليهو انا زاتي بشيد
* جمهور عاقل
* يجي يتفرج علي كاريكا العجوز ولا الشغيل الفكت منو ولا بويا الاشتر ولا ايشيا البشبه موكورو البشبه آس الشيريا ولا مساوي التقيل ولا المدافع حسن السير والسلوك داك
* المدافع حسن السير والسلوك الماسوره
* جمهور عاقل
* يجي نحل ينحل في مبارياتنا
* ويتفرج في اوكرا البجيب القون بي كرعينو الاتنين ده
*ايها الناس
* الاستثمار اهم واجبات المجلس
* ولو افلح ونسي ورفاقه في وضع لبناته الاولي
* فان التاريخ لن ينسي لهم صنيعهم
* وسجلات الانجاز ستتشرف باسمائهم
* والزعيم سيخرج من دائرة دعم الافراد
* الي دائرة الاعتماد علي النفس
* ايها الناس
* الي ذلك الحين الزعيم يحتاجنا
* ندعم للتسيير والصبر علي التخطيط للاستثمار
* ومهما دعمنا
* فان دعمنا محدود
* لذا علي المجلس ان لايركن للدعومات وينوم
* عليه ان يزرع لنا استثماراتنا لنحصدها رفاهيه في عالم الزعيم
* المهم
* لانخاف علي الزعيم في فاشر السلطان
* فالسلاطين اهله
* والفاشر حمراء وشراره
* واملنا كبير في شفوت نيالا
* اسود نجالا
* صدقوني لو لم يخطئ التحكيم بعملوها
* بس يعلقوا الكورة فوق
* اقزام الهلال ديل يعملوا الكلاكله صنقعت
* ماكسيم يجيب من الدخينات
* ايها الناس
* ان تنصروا الله ينصركم
* اها
* نجي لي شمارات والي الخرتوم
* والينا
* الدولار بقي زي الاسانسير الطلع فوق وفي الطابق الاخير فتحوا بابو ووقفوهوا علينا
* وشايفننا تحت راجينو يا والينا
* فينا الكبير والمريض والمكسر والشاب. واليادوبك بتاتي لينا
* واقفين يا والينا
* لاقدرنا نطلع ليهو لا راضي ينزل لينا
* حانقعد منتظرين كده كتير يا والينا?
سلك كهربا
ننساك كيف والكلب تضربو العربيه يتدردق تحتها ويقوم جاري… .مابموووووت… الله يخلينا
والي لقاء
سلك