زواج سوداناس

تغيير إسم السودان، الإسم المقترح(ارض ناس قريعتي راحت)



شارك الموضوع :

السجل المدني الدولي
ماهي الجهة المنوط بها دراسة مقترحات أسماء المناطق والبلاد ؟ هل هناك ما يدعى السجل المدني الدولي؟ وهل يمكن لاي شخص ان يقترح أي اسم لمنطقة ما او يقوم بتغيير اسم منطقة ما على كيفه؟ مثل ذلك الامريكي الذي حط بليل واقتطع ما يريد من ارض السودان منطقة (بئر طويل) وغرز العلم وغير اسم المنطقة.. و اطلق اسم مملكته (مملكة شمال السودان ) وصار يعقد المؤتمرات الصحفية وعما قريب ستقام له الاستقبالات الرسمية عند قيامه بأي زيارة (لدول الجوار)!!!. هذا الرجل الامريكي الذي اكمل وضع اساسيات دولته في الشمال بمفرده وتعامل مع كل الاجراءات الدولية لوحده ولم يحرك احد ساكنا تجاه ما فعله ..ولم يتهمه احد بالجنون أو خرق المواثيق الدولية ..هذا الرجل .. اوحى الي بفكرة عبقرية الا وهي تغيير اسم البلاد ..أرجوكم حاولوا قراءة الحيثيات التالية قبل اتهامي بالخرف او الزهايمر . اولا وبما ان الامريكي قد اقتطع جزءا من الشمال وكذلك كنا قبل فترة قد عانينا من انفصال الجنوب ..اذن تغيرت احداثيات الحدود ولم تصبح البلاد هي نفسها لذلك اود ان يتم دراسة اقتراحي بتغيير اسم البلاد فنضيع على الامريكي تسمية بلاده التي ينسبها الى السودان ..(اهو نحن بقى ما اسمنا السودان .قوم شوف ليك حتة تانية تسميها مملكة شمال السودان ). ثانيا عندما يتم تغيير اسم البلاد لن نعاني من اثار الحصار الاقتصادي .فالدولة المحاصرة هي السودان ولسنا نحن فلذلك يمكننا ان نشتري ونبيع ونصدر ونستورد باسم الدولة الجديدة ولن يقول لنا احد لا يمكنكم التعامل بالدولار او اليورو او اي من العملات الصعبة. ثالثا يمكننا ان نشارك في كل المحافل الدولية التي يتم تجاهلنا فيها عمدا ولا ترسل لنا كروت الدعوة حتى (للصبحية ولا الجرتق) ما نحن ما السودان وكدا . رابعا هو انه سيتم عمل خرطة جديدة للدولة الوليدة التي تتغير احداثياتها كل يوم واجزم ان لا احد يمكنه ان يرسم الحدود الرسمية الحالية لدولتنا هذه… شمالا اقتطع الامريكي نصيبه ..شرقا ..ما عرفنا حلايب مصرية ولا سودانية ..وكذلك الفشقة ما عرفناها اثيوبية ولا سودانية ..الجنوب ..ما عرفنا ابيي شمالية ولا جنوبية ..والموضة الجديدة حق تقرير المصير للنيل الازرق وجبال النوبة …المهم وبعد ان يقتطع كل منا ما يريد اقتطاعه من ارض الوطن الكبير ويلوذ كل واحد بالحدود الي رسمها في خياله ..سيتم رسم الخرطة لذلك الجزء الصغير المتبقى كقطعة الجبن في تلك الطرفة القديمة عندما أراد القط والفار اقتسام قطعة الجبن فاختلفا عند حدود التقسيم فتم اللجوء الى القرد لكي يقسم الجبن بينهما فقطعها الى نصفين غير متساويين ونظر ثم قال هنا جزء زائد فقرمه بفمه واكل القطعة الزائدة ..فاذا به ينقص اكثر من الاولى فقرم الاخرى وظل هكذا يقرم من هنا ومن هنا حتى صارت قطعة صغيرة لا ترى بالعين المجردة. خامسا يتم عمل مسابقة ضخمة للبحث عن الاسم المناسب للجزء المتبقى من هذه البلاد وارجوكم دعكم من تلك الالقاب الزائفة مثل بلد المليون ميل فالخوف من ان نصبح بلد الالف ميل فقط ..أوسلة غذاء العالم ..فانت عارف وانا عارف وهم عارفين ان السلة اصبحت فارغة وكدا. ربما يمكن تغيير الاسم الى (ارض ناس قريعتي راحت) مثلا وهو اسم فلكلوري جميل ويعبر عن الواقع وما ال اليه الحال. اها يا جماعة مش انا (فكارة؟؟) الشئ الوحيد الذي خرب مزاجي بهذه الفكرة العبقرية واحتفالي بتوقد ذهني ..أن مسجل ادم سيد الدكان قلب علي المواجع فقد كان يغني (جدودنا زمان وصونا على الوطن ..على التراب الغالي الماليهو تمن ) ..ما ارخص ما بعنا به ترابك يا وطن

د. ناهد قرناص

شارك الموضوع :

تعليقات الفيسبوك

تعليقات


7 التعليقات

إنتقل إلى نموذج التعليقات

      1. 1
        أبو علي

        غايتو جنس خفه دم وظرافه عليك.

        الرد
      2. 2
        احمد عبد الكريم

        لما ما يكون عندك موضوع السكوت اكرم

        الرد
      3. 3
        ودبنده

        ديل الصحفيين بتاعنا الواحد داير يكتب العمود بتاعو من غير اي مسئولية وخلاص أمنعو مثل هذه المهرجه من السلطة الرابعة حتي لا تحسب علي ناس السلطة الرابعة الحقيقيون ؛ اين انت يالصادق يا رزيقي من هذه المستهترة هل حاسبها حتي تعرف معني سودانا انت يا وطني

        الرد
        1. 3.1
          ود اركويت

          انت الما عندك شقلة عامل فيها ابو العارفين دي طريقة كتابته عجبتك خش ما عجبتك اتفكفك

          الرد
      4. 4
        محمد النقر

        ده رد شافي للعبيط الاسمو الطيب مصطفي اللي بعد ما فصل الجنوب بحجة عدم انتمائهم الينا عايز يسمي بلدنا بلد العربان علشان يتلم مع العرب اللي هم الان مسخرة العالم و بالمرة يطلع باقي الافارقة من السودان و يكون السودان او الاسم الجديد خالصا” لامثاله من ذوي الدم العربي الخالص .

        عفيت منك يا بت الرجال

        الرد
      5. 5
        الرقراق

        بحكم ناس اطيب مطصفي والاسلامين لماذا لا يسمون السودان دولة مكة ويصبح بدل الزول مكاوي والزولة مكاوية

        الرد
      6. 6
        حدباي

        اقترح ان نسمي السودان ” دولة النيلين ” لان النيل يتكون في السودان وفيه نيلين هما الأبيض والازرق واكثر دولة يسير فيها ..

        اسم جميل وراقي ومعبر

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *