زواج سوداناس

جمال سالم خريج كلية اللا منطق المنطقية


محمد عبد الماجد 2

شارك الموضوع :

اللا منطق شنو؟.
اللا منطق مثلا ان تشتري ليك (جبنة)..بدل ما تكبها في (الفول) – تقوم تكبها في (عينك).
واللا منطق ..تشتري ليك (بطيخة) …تحاول تنزلها (رصيد) في تلفونك.
وقت ما تنزل تقول (البطيخة) دي الظاهر عليها (زين) وانا شريحتي (سوداني).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
واللا منطق هو ان تكون سايق ليك (عربية) في شارع عرضو (60) متر.
تقوم تخلى العرض دا كلو وتدخل ليك في (جحر) عرضو (17) سنتمتر.
دا اللا منطق.
واللا منطق هو تمشي ليك لي دكتور عيون …تحجز.
وتدفع الرسوم.
وتنتظرو ساعة ونص.
تدخل عليه – تشكي من (الضرس).
ولا تجيب ليه سيرة العيون.
الاخطر من ذلك ..دكتور العيون ذاتو من غير اي منطق يخلع ليك (الضرس).
دا شغل بدون منطق.
خريج كلية علوم طيران ..تلقاه سايق ليه (ركشة) في شارع الستين..تقول ليه هسع علاقة كلية الطيران بالركشة شنو؟.
يقول ليك الركشة دي ما تعاين ليها كدا ..والله قاعد اطير بيها (طيران).
دا منطق في الحقيقة ما بنقدر نقول فيه اي كلمة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
اللا منطق..تمشي مع قريبك ..(تعارف).
واحد من الناس الكبار بدون مناسبة – بيرفع ايدو ..ويقول الجماعة ديل نحن نعقد ليهم.
ونحن طلعنا اهل.
والحالة واحدة.
بي صراحة – الموضوع دا ما (منطقي).
زول في مرحلة التعارف – لا عندو بيت ولا عندو غرفة ولا عندو وظيفة – تعقدوا ليه.
واللا منطق ..يجيبوا ليك (ملاح قرع) في الفطور.
وبامية مفروكة في العشاء.
والغداء تشيلك (نومة).
دا ما منطق.
اللا منطق – تمشي للدكتور تشكي من (الملاريا).
والملاريا ظاهرة..يقوم يقول ليك تعمل لي (رسم) للقلب.
الدكاترة ديل – جاريين للقلب.
الواحد يكون زي الحصان يقولوا ليك ارسم لينا القلب.
دا ما منطق.
يكون عندنا خزان الرصيرص.
وسد مروي.
وسنار.
والكهربة تقطع.
المنطق هنا وين؟.
يرفعوا الدعم عن (الغاز) يقوموا يزيدوا خدمة الانترنت!!.
تلفزيونا يكون فيه 2867 قناة فضائية…ناس (النيلين) يقولوا ليك عشان تشاهد قناتهم (المغبشة) دي – إلّا تحول ليها (الطبق).
وقت تحول الطبق ..يعتذروا ليك عن نقل المباراة.
في منطق بخليك تطلع من 2867 قناة فضائية ..عشان تتابع قناة النيلين ..كورة الهلال تجيبها ليك بعد 17 دقيقة من البداية.
والقون ولا تعيدو ليك.
دا منطق شنو؟.
المهاجم يمر من الميدان كلو…لاعب لاعب.
ما يخلي ليه (باك) حايم.
يفوت من الحارس.
وقت يبقى على التسجيل …(حكم الراية يرفع رأيتو).
دا منطق.
في تسلل بيحسبوه بعد 6 شهور.
وقت الهجمة تكون على الهلال ..التسلل لو ما طلعوا ليه (شهادة بحث) حكامنا ما برفعو رأيتهم.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
جمال سالم حارس مرمى المريخ عقب مباراة فريقه مع مريخ الفاشر …اخرج اغرب تصريح في الدنيا نشر في عدد من صحف المريخ.
تصريح ما فيه (ذرة) منطق.
خالي منطق.
تصريح بيثبت ان جمال سالم – هذا الزول الذي علمه لغة عربية (روسي) – ما عندو اي علاقة بي اللغة العربية.
ما بعرف فيها حرف جر.
قال جمال سالم معترضا على طرده في مباراة فريقه مع مريخ الفاشر : (في تصريحات ساخنة للأوغندي جمال سالم حارس المريخ اكد اللاعب انه لا يستحق الطرد في الفاشر بعد ان اشهر له الحكم البطاقة الحمراء بعد اشتباكه مع لاعب مريخ الفاشر .. وزاد : لقد تعرضت لاعتداء من اللاعب وكنت علي ارضية الملعب مرتين وسط متابعة الجميع وفي رد فعل من جانبي دافعت عن نفسي لاتفاجأ بطردي مع اللاعب الذي اعتدى على شخصي ليعاقبني بسبب قيامي بدفاعي عن نفسي).
تصريح جمال سالم هذا وصف على انه تصريح (ساخن).
ساخن وين؟..هذا تصريح (عبيط)..لا معنى منه ولا جدوى وهو تصريح يوضح الطريقة التى يفكر بها المريخاب.
اللاعب قال انه لا يستحق الطرد ..لو سكت على هذا ..كان تصريحه اتبلع رغم (المجزرة) التى عملها جمال سالم في الفاشر.
جمال سالم براهو – قال : (كنت علي ارضية الملعب مرتين وسط متابعة الجميع وفي رد فعل من جانبي دافعت عن نفسي لاتفاجأ بطردي مع اللاعب الذي اعتدى علي شخصي ليعاقبني بسبب قيامي بدفاعي عن نفسي).
يا زول انت نصيح.
جمال سالم قال في رد فعل من جانبي دافعت عن نفسي لاتفاجأ بطردي.
الزول دا دافع عن نفسو…واخد حقو بي ايدو (اذا سلمنا ان هناك اعتداء وقع عليه) ، رغم من ان الصورة والتلفزة اوضحت ان جمال سالم هو الذي بدأ بالاعتداء على لاعب مريخ الفاشر مصعب العلمين.
لكن قولوا ان جمال سالم لم يعتد على احد ..وان الاعتداء وقع عليه ..هل يرد جمال على مصعب العلمين ويأخذ حقو بي ايدو ..ثم يتفاجأ بعد هذا كله بالطرد.
جمال سالم – يكون فاكر جمال الوالي الى الآن رئيسا لنادي المريخ ..عشان كدا ضرب ليه لاعب في مريخ الفاشر .. واتفاجأ بالطرد.
حارس المريخ اليوغندي اذا كان ما عندو لغة عربية وما بعرف معنى ما يقول ..اعلام المريخ وصحفه مفروض ما تنشر ليه كلام بهذا النحو.
هذا الكلام يدين جمال سالم ويثبت احقيته بالطرد.
يمكن جمال سالم ..شاف قدام عيونو تراوري ضرب لاعب مريخ الفاشر واعتدى عليه مع ذلك لم يقم الحكم بطرده.
عشان كدا جمال سالم وقت ضرب مصعب العلمين واتشنج عليه وسمعه الف كلمة فارغة ..افتكر الحكم لن يطرده.
تراوري عمل نفس الحركة.
فات على جمال سالم ان اعتداء تراوري كان في الشوط الاول وقبل ان يسجل المريخ هدفين.
يعني الحكم ما عنده جرأة ولا شجاعة في ان يطرد تراوري في هذا التوقيت.
بينما اعتداء جمال سالم كان في اخر 10 دقائق من عمر المباراة – وبعد ان حسم المريخ المباراة بهدفين.
عشان كدا الحكم قال طرد جمال سالم غير مؤثر – خاصة ان الحكم قام بطرد مصعب العلمين المعتدى عليه مع جمال سالم.
المهم تصريحات زي دي لو فاتت على لاعبي المريخ ..صحف المريخ مفروض ما تفوت عليهم.
هذا التصريح (فضيحة) وادانة في حق جمال سالم والمريخ.
بعد هذا التصريح ..(علي جعفر) ذاتو مفروض كان يطردوه مع جمال سالم.
علي جعفر ذنبو شنو؟.
ذنبو (التصريح) الاشتر دا.
لو جمال سالم قدامو مدافع صاح …ما بقول تصريحو هذا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….
و
الرابطة كوستي كانت متقدمة بهدفين على هلال الابيض في الشوط الثاني.
مع ذلك ادرك هلال الابيض التعادل في الشوط الثاني.
الرابطة فقدت نقطتين.
هلال الابيض هذا الموسم قوة حقيقية.
وقادر هلال الابيض على تمثيل السودان في الموسم القادم.
الرابطة كوستي ايضا تقدم مستوى مشرف هذا العام.
الخميس ما بعيد.
الهلال والاهلي شندي …مباراة سوف يظهر فيها الهلال بشكل اكثر ابهارا.
……….
السيدة (ل) – مويتنا ليها 15 يوم قاطعة . مع ذلك ناس الجرايد بقولوا لينا الموية ما قاطعة ..انتوا قاعدين تتخيلوا ساكت.
وقرّط على كدا.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *