زواج سوداناس

لو (كبر) كان والياً لشمال دارفور (تراوري) كان طردوه من الشوط الأول



شارك الموضوع :

ما في شيء خرب (القطط) غير (اللبن البارد)..الكديسة بقى وقت تجيب ليها لبن ساخن – بترمي ليك فيه (تلجة)
زمان كانوا بقولوا لينا في المدارس – أيام العربي كان بي خيرو الفاعل (مرفوع) – هسع المرفوع بقى (الدعم)
الزول دا قال لينا وزير المالية دا ..أكيد زمان كان بيلعب (جناح)..والأكيد كان (بيرفع) الكورنر
قال ليهم هو سافر وعبر (4) مطارات من غير (جواز سفر)..صعبة عليه يعني يلعب في شبيبة القيروان بدون (كرت)

24 قطة أضافوا ليهم نمر بيبقوا كم؟.
بيبقوا (نمرين) ..أنتوا ما عارفين (القطط) من فصيل (النمور).
النمر ..قطة ما بتشرب لبن بارد.
ما في شيء خرب (القطط) غير (اللبن البارد).
الكديسة بقى وقت تجيب ليها لبن ساخن – بترمي ليك فيه (تلجة).
الأسئلة الغريبة كتيرة في الدنيا دي زي (الزبادي) – رغم أن (الزبادي) ما عندو أي علاقة بالموضوع.
الزبادي ذنبو شنو؟.
واحد (شفت)…عيونو متل باب جنينة الموز …(صغيرات) شديد.
الزول دا قال لينا وزير المالية دا ..أكيد زمان كان بيلعب (جناح).
والأكيد كان (بيرفع) الكورنر.
قلنا ليه عرفت كيف؟.
قال لينا الزول دا أكيد زمان كان وقت يمسك الكورة ويقوم جاري بيها على الصايد الشمال …الفريق كلو بيكورك ليه (ارفع) يا وزير.
الحلة كلها بتكورك فيه : ارفع يا بدر الدين.
ارفع الكورة.
قلنا ليه عرفتو كيف؟.
قال لينا عشان الزول دا من بقى وزير مالية بقى أي سلعة يلم فيها قاعد (يرفع) عنها (الدعم).
الزول دا يكون فاكر (الدعم) كورة…عشان كدا قعد يرفع فيه.
صابحكم بدل أرفع الكورة…بقى ارفع الدعم.
زمان كانوا بقولوا لينا في المدارس – أيام العربي كان بي خيرو الفاعل (مرفوع) – هسع المرفوع بقى (الدعم).
حكمة الـله (الطحنية) بقت (مسيخة).
يلاقيك واحد يقول ليك (بطيخة) من خمسة حروف – من الفواكه الحمراء وطعمها حلو دي شنو؟.
تقول ليه : (بطاطساية).
أصلك سيرة (البطيخ) ما تجيبها ليه.
وممكن تلاقى ليك زول يقول ليك – مشروب طبيعي من عصير (البرتقال) دا عصير شنو؟.
تقول ليه : (دونقليس).
الناس بقت ما مركزة.
دولاب من خمسة ضلف فيه كم ضلفة؟.
أربعة.
الضلفة الخامسة بكسروها الشفع.
فنان سوداني شاب من 79 حرف دا منو؟.
طه سليمان..ولو حروفو فرقت معاكم تموها بـ (ضفر) وخالد النعسان.
الزول مرات يمر فيك ..يسألك من (بيتكم)..يقول ليك لو سمحت يا عباس الركس ..بيت ناس عباس الركس وين؟.
تقول ليه : والـله أنا ما من المنطقة دي.
يقول ليك أنت عباس الركس؟.
تقول ليه : لسه ما طلعت الرقم الوطني ما بقدر أحدد ليك.
في واحد سألوه ..وقالوا ليه : حاجة في السماء مدورة ..بتبدأ (هلال) وتكتمل كل أسبوعين لتصبح (قمر) دي شنو؟.
الزول صنقع فوق وقال ليهم دي (المروحة)…لكن مع (البرد) دا أوعكم تشغلوها لينا.
زول تاني – ضربو ليه تلفون من إذاعة خاصة – وقالوا ليه رأيك في مدرب المريخ الجديد شنو؟.
قال ليهم لو اشتغل مع ناس جمال حسن سعيد في المسرح – فرصتو بتكون أكبر.
طالب – قالوا ليه (الديك) من الطيور ولّا من الزواحف؟.
قال ليهم ما في خيار تاني؟.
الديك دا يتخيل لي من (الخضروات) – يوم داك الحاجة عملت لينا منو (ملوخية) حاجة ما بتخلص.
وقبلها بامية مفروكة.
مذيعة ..قعدت تضحك..وقالت للفنان الشاب الذي يجلس أمامها رأيك شنو في محمد الأمين.
قال ليها أنا ما بسمع (حقيبة).
المذيعة ما كضبت قالت ليه وقت ما بتسمع حقيبة …ح تكلمني في البرنامج دا في شنو؟…في (صحة وعافية).
والـله (صحة وعافية) ذاتها غير (الملاريا) ما بتعرف فيها حاجة.
الدكتور بي قوة عين ..قال للزول الجابوه ليه ..شايلنو أربعة : العقرب الطقتك دي قبل ما تطقك شفتها.
الزول بي لدغة عقربو قال للدكتور ..وأنا لو شفتها قبل تطقني …البخليها تطقني شنو؟..كان كتلتها.
الدكتور قال ليه طيب بعد ما طقتك.
الزول اتلفت على (التني ود آمنة) وقال ليه عليك الـله وريها ليه في الموبايل ..متصور معاها (سيلفي).
الدكتور عاين للسيلفي في الموبايل ..وقال ليه ..هسع يفرزوكم كيف؟..والـله أنت من العقرب ما قادر أفرقكم.
الزول قال للدكتور …أنا شمال الصورة.
أيام السيول والفيضانات ..واحد طلعوه من البحر – قرب يغرق.
الناس الطلعوه قالوا ليه أنت وقت ما بتعرف تعوم البوديك للبحر شنو؟.
الغرقان قال ليهم : أنا ما مشيت للبحر ..البحر جانا لغاية (المطبخ).
أعمل ليه شنو؟.
هلالابي عامل فيها حريف.
جابوه وقعدوه.
وسألوه.
قالوا ليه الهلال في مايو القادم عاوز يسجل ليه لاعب خطير.
لاعب ما فيه كلام.
قال ليهم دا منو؟.
قالوا ليه لاعب معروف – الهلال حسم موضوعو من التسجيلات الأخيرة.
قال ليهم اللاعب وقع يعني؟.
قالوا ليه ما وقع – لكن لبس (الكسكتة).
والكسكتة أخطر من العقد.
قال ليهم – أدوني تسهيلات.
قالوا ليه ما في مشكلة.
اللاعب دا قفز من الطابق الرابع.
قال ليهم سادومبا.
قالوا ليه أبداً.
اللاعب اتسلق في البرد دا في المواسير.
قال ليهم ضفر – ضفر بعملها.
الزول دا بتسلق ..بعرفو كويس.
الهلالاب قالوا ليه والـله ضفر دا لو اتسلق جبال الألب ما نجيبو الهلال – ضفر شنو كمان؟.
قال ليهم دا منو لكن؟.
قالوا ليه اللاعب دا حام بي (4) مطارات ..من غير أوراق ثبوتية.
الهلالابي قال ليهم أنتوا ح تجيبوا كارلوس.
قالوا ليه يا زول كارلوس نعمل بيه شنو؟.
أنت مالك عاوز تعمل لينا مشاكل.
لكن اللاعب منو؟.
قالوا ليه اللاعب دا كان بيلعب في المريخ (هاوي).
قال ليهم إبراهومة.
يا زول إبراهومة ما تجيب لينا سيرتو في الوقت دا ..ما تعمل لينا مشاكل.
إبراهومة عليك الـله طلعو لينا من العمود دا.
لكن منو؟.
قالوا ليه الزول دا قبل كدا جاب ليه قون في الاتحاد الجزائري وما حسبوه.
الهلالابي قال ليهم وقت ما حسبوه ..أعرفو ليكم كيف؟.
قالوا ليه الزول دا ارتكاز.
وممكن يلعب صانع ألعاب.
كان في المهدية.
ولعب في الموردة قبل الانتقال للمريخ.
قال ليهم برهان.
يا زول برهان نوديه وين؟.
طيب منو؟.
قالوا ليه …نوضح ليك الحكاية عديل – الزول دا بيلعب الآن في شبيبة القيروان من غير (كرت).
قال ليهم هو سافر وعبر (4) مطارات من غير (جواز سفر)..صعبة عليه يعني يلعب في شبيبة القيروان بدون (كرت).
الهلالابي قال ليهم ..والـله أنا شبيبة القيروان .. ما بعرف فيها أي لاعب ..عليكم الـله عاوز يجيب منو في مايو القادم؟.
قالوا ليه ح يجيب لاعب يحسم المباراة في (5) دقائق.
قال ليهم أنتوا عاوزين تجيبوا (سمير فضل).
قالوا ليه سمير فضل ..نجيبو عشان شنو؟.
عندنا طبيخ نحن.
طيب الهلال جايب منو؟.
قالوا ليه يا زول نقولها ليك عديل كدا – الهلال في مايو جايب شرف الدين شيبوب.
قال ليهم طيب ما تقولوا لي من الصباح – الهلال جايب اختصاصي غدد درقية وأنا بفهمها طايرة.
……..
ملحوظة : الكلام دا ما يطلع من العمود دا.
هوامش
المدرب ولاعب الهلال السابق التاج محجوب قال إن قرار تعيين هيثم مصطفى مدرباً عاماً في الهلال كان من أكثر القرارات التى أسعدته وأفرحته رغم من أنه كان مرشحاً للمنصب.
التاج محجوب اعتبر القرار من أقوى قرارات الكاردينال ومن أكثرها إنصافاً للاعب قدم الكثير للهلال.
هذه شهادة كبيرة من لاعب كبير في حق لاعب كبير.
وهكذا تكون الشهادات الكبيرة.
الأمل عطبرة خسر أمس أمام الأهلي الخرطوم.
وتعادل هلال الأبيض.
ليبقى الهلال مرتاحاً في الصدارة.
المريخ سوف يأتي ويفقد (وصافته).
الوصيف من الأسبوع الرابع (وصيف).
ديل يعملوا ليهم شنو؟.
وصافة من الأسبوع الرابع بتستحملوه كيف؟.
اعملوا حسابكم.
الخرطوم الوطني والأهلي شندي وهلال الأبيض السنة دي عندهم رأي في الوصافة.
احتمال كبير..بل أكيد المريخ الموسم القادم يمثل في الكونفدرالية.
ناس النعسان وعطرون وعلي جعفر ديل ما ناس بطولة الأندية للأبطال.
النيل شندي انتصر على الأهلي عطبرة في شندي.
وانتصر أمس الأهلي شندي في شندي على مريخ نيالا.
أندية شندي ..مولعة نار.
……….
عاجل : لو (عثمان يوسف كبر) كان والياً لشمال دارفور إلى الآن ..الحكم كان طرد (تراوري) من السودان وليس من الفاشر بعد الاعتداء الذي وقع منه على لاعب مريخ الفاشر.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *