زواج سوداناس

سنتر الخرطوم الشباب بالكوم



شارك الموضوع :

> امس مشينا مباراتنا ضد الخرطوم الوطني في دوري الشباب
> قبال اي شيء
> التحية والتجلة والاحترام
> لادارة الخرطوم الوطني وقطاع الشباب بالخرطوم الوطني
> ونرفع القبعات للكابتن ابو الجاز الذي صنع فريقاً منظماً وواعياً جداً
> وننحني اجلالاً للاعبي فريق شباب الخرطوم الوطني الذين اعادونا الى ايام كانت المواهب الشبابية فيها علي قفا من يشيل
> تلك الايام التي كانت الملاعب بالاحياء وبين الحارات تتوافر فيها بكثرة
> قبل عمليات الاستيلاء على تلك الملاعب لتقوم مكانها مؤسسات لا تنفع المواطن ولا تضيف للحي
> شكراً للخرطوم الوطني ادارة وجهازاً فنياً ولاعبين
> شكراً لجمهور الخرطوم الوطني الذي شجع بوعي حضاري واحترام كبير.
> ايها الناس
> اندهشنا للانسجام بين لاعبي الخرطوم الوطني
> وادهشنا الاداء بحرفية واحترافية »صعلكة كورة»
> وهذه لعمري اشياء توضح حسن اختيار العناصر قبل تسجيلها.
> ووعي وحرفية من يقوم بالاختبارات من فنيي الخرطوم الوطني.
> اما اولادنا
> فحدث ولا حرج
> اجزم باني لم اجد في شبابنا بالامس ولا واحد عندو موهبة
> موهبة شنو!!!
> فهم كروي مافي
> فهم شنو ؟؟؟
> علاقه بالكورة مافي
> شفتوا ليكم زول ما بعرف يجري ؟؟؟
> انا امس شفتو
> لا موهبة ولا فهم ولا حرفية في الاداء ولا ملكات ولا امل ساكت فيهم لي باكر
> الشفناهم امس ديل اولاد حلة سااااي
> ما ممكن يكونوا بلعبوا كورة في فريق منظم
> واللوم ما عليهم
> اللوم على الذين اجروا لهم الاختبارات واختاروهم ليمرمطوا سمعة الفريق ومكانته
> ايها الناس
> في المراحل السنية المريخية لا يختلف شفتان
> ولكن في عهد اللاعبين ديل
> صدقوني لا نتفق حولهم الا في ابعادهم من الفريق فوراً
> زي ديل ما بجي منهم
> زي ديل لو دربوهم في مراحل برشلونة السنية ما بجي منهم.
> وأجزم
> لو وجهنا جهاز الدهب على اولانا اللعبوا امس ديل
> سنة ما بصفر
> ريحة موهبة ساكت ما فيهم
> لكن
> منو الاختبر ديل واختارهم؟؟؟
> ياخ فيهم واحد الكورة فوق مستنيها تنزل براها
> الولد ده ماعارف انو الكورة لما تكون فوق زي الحكومة ما بتنزل براها
> الا ينزلها زول
> واقف راجيها تنزل
> لما نزلت لقي ناس الخرطوم شالوها ومشوا بيها ولعبوها اربعه باصات وحاوروا بيها ستة من اخوانو
> امس اي حاجه دايرنها اولاد الخرطوم الوطني عملوها في اولادنا
> جمعوا وطرحوا وغسلوا وكووا
> وهدفوا من جوه الخط ومن بره الخط ومن بره الاستاد زاتو
> يا طارق يا اخوي
> البتعمل فيهو انت للسنية كبير
> ابعد ديل لانو ما بجي منهم
> وابعد من اختارهم في الاختبارات
> لو ده عزلهم ما بنفعوا
> وذكروني نكتة الولد القال داير يعرس
> ابوهو قال ليهو الف مبروك
> بعدين بمشي أعزل ليك العروسه
> الولد قال ليهو شكراً يا ابوي
> عزلك شفتو في أمي
> خليني أعزل براي
> وعشان كده حقو يا طارق الجماعة العزلوا لينا ديل
> تقول ليهم شكراً عزلكم شفناهو في اماتنا
> وعشان ما تلحقونا امات طه كتر خيركم
> ايها الناس
> الكورة نعم نصر وهزيمة
> ولكن الاداء بكفر ليك وقت الهزيمة
> والثلاثية التي خسرنا بها بالأمس
> والله العظيم شويه جداً
> تحيه خاصة لفرقة الخرطوم الوطني الشابة
> واخص بها رقم حداشر
> صلاح الأمير الصغير
> او قل سكسك زمانه
> ورقم عشرة
> ورقم اتنين ورقم خمسة الفكيناهم برانا من كشوفاتنا
> وكل الفرقة الخرطومية
> في سنتر الخرطوم الشباب بالكوم
> وفي نصنا الردوم بالهبل
> يا طارق
> معقولة زول ما بعرف يجري ؟؟؟
> السيل بعرف يجري ياخ
> على كل
> وطالما الاتحاد عندنا بكرم المنسحب
> تيمنا ده يوم مباراتو ضد الهلال نخندق يا حبيب
> نلقي لينا اي سبب
> الزوغة الناس بتنساها
> لكن الفضيحة بتقعد
> ايها الناس
> لو داير اوصف ليكم علاقة اولادنا امس بالكورة
> ما في حاجه غير اقول ليكم
> كونسلت من خريجي التاريخ والقانون واللغة العربية في غرفة العمليات يجرون جراحة لي مريض
> أكيد صيوان الزول ده بندقه قبل الزول يتبنج
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> قلنا لي زولاً كده الموية زادوها لينا
> زادوها في المواسير؟؟ كده قال لينا
> قلنا ليهو ابداً زادوها لينا
> قال لينا يعني زادوها للمواسير!
> انا كنت قايل زادوها في المواسير
> حتى بعدين يزيدوها للمواسير
> لأنو لي.. بتفرق عن في
سلك كهرباء
ننساك كيف والكلب طلباتو لحمة ولبن.. في المواسير ولا للمواسير يا بوبي!!
وإلى لقاء.
سلك

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *