ثقافة وفنون

الحلنقي يمنع محمد الأمين من ترديد أغنياته


فجَّر الشاعر الكبير إسحق الحلنقي مفاجأة فنية من العيار الثقيل أمس، حيث أعلن في تصريح خاص لـ (آخر لحظة) أنه قرر سحب جميع أغنياته التي بطرف الفنان الموسيقار محمد الأمين، وحرمانه من ترديدها في كافة الوسائط الإعلامية، وأشار إلى أنه سيصل في هذا الأمر إلى أقصى درجاته في حال لم يمتثل محمد الأمين لهذا القرار، وأضاف الحلنقي أن ود الأمين ظل طوال (30) عاماً يردد هذه الأغنيات دون مراعاة لحقوقه المادية والأدبية، على عكس ما كان يفعله الراحل محمد وردي، وهو فنان لا يقل عنه مكانة، وقال الحلنقي إنه أخطر مستشاره القانوني للقيام بتنفيذ هذا القرار .
جدير بالذكر أن الفنان محمد الأمين تغنى للحلنقي بأغنيات (بتتعلم من الأيام) ، (شال النوار) و(غربة وشوق).

صحيفة آخر لحظة


‫19 تعليقات

  1. غايتو الحلنقى بقى ذى الهم فى القلب محل ماتمشى تلقاهو فى اى جريده ولاقناة !! الظهور الكتير ماكويس وبعدين شنو قصة كل مالزول يفلس يشبكنا حاوقف فلان من اغنياتى؟ مش دفع ليك زمان وخلاص ولا حسد بس؟ يعنى حيصرف عليك باقى عمرك عشان كم اغنيه عملتها ليهو؟
    ماتهدم تاريخ بمباراة الجرايد والفارغه يااستاذ

  2. طيب يا حلنقي اغاني المرحوم وردي الدفع ليك قيمتها هل سوف تبيع وتشتري فيها ولا بقت ورثه لاولاد المرحوم.عازين نعرف

  3. يا اخوان حاملين علي الراجل مالكم ؟ في الدنيا كلها الشاعر ليهو حقوق الا في السودان الفنان يتجدع والشاعر ما يلقي حق العلاج .والحلنقي ظا انتو فاكرينو شغال شنو ؟؟ الراجل عايش علي غناهو دا . بدل تقولو ليه محمد الامين ماكل حقوقو

  4. عاد يا ود اللمين امانة ما اتلومت مع صاحبك الحلنقي تنساهو كيف وانت عارف الحياة والطلبات وغلاء المعيشة والاسعار . علي الاقل اديهو حاجة يمشي بيها حياتو . انا ما قايلاك جلدة كدي .

    1. ههههههههه مافي لـــوم يا ام مـحـمـد .. يمكن زعلان بس الزول دا ما دائمـاً الماده هي سبب الخلاف والله اعلم .

  5. لا كدا زودت الفلفل شويه كمان جابت ليها تنظير في فنانين قامه وكبار كأمثال ود الامين لا كدا الواحد بسحب الشعوريه منك

  6. زمان ياحلنقي كنت مغترب مرتاح ومريح وكنا مستمتعين بغناك الجميل غاية الاستمتاع وأنت بعيد اتسلطوا عليك ناس حسين خوجلي رجوعك ونفخوا فيك وعملوك رئيس جمهورية الحب بقيت طلباتك كتيرة وكل يوم طالع بموال جديد ياخي ارحمنا ياخي اغانيك دي لما دخلت قلوب الناس وعشعشت في نافوخهم انت كنت استاذنتهم انا رأيي أنه الأغنية أول ما اتلحنت واتغنت خلاص بقت حقت المستمع

    1. كلامك صح يا حفيظ .. لذلك كان هناك برنامج يذاع في الراديو على الهواء اسمه ( ما يطلبه المستمعون ) كانما الاغاني له .

  7. ينطبق المثل الذي يقول اكلو للحم ورمو عظم علي الشعراء في السودان وخصوصاً من هم من جيل الحلنقي ومن هم قبلهو بحيث كان الابداع وظهور عمالقة الغناء السوداني والي يومنا هذا تستباح كلمات اغانيهم من بعض نجوم الفن من الشياب الان وكمثال الشاعر الراحل ابو امنة حامد وابو قطاطي وسيداحمد الحردلو والكثير من الشعراء الفنان يجني من ورائها ملاين ويكون نصيب الشاعر مائة جنية

  8. الحلنقى فلس بعد رجع من الامارات فال نشوف الدفاتر القديمة ونقول لية اقع ندى القلعة وهى مريشة وقالت عاوزة راجل يخاف فيها ربنا وانسي حكاية الثلاثة اغانى اللى عند الو اللامين

  9. تصدق يا حلنقي * رحلت عصافير الخريف بقت تمسخ عندي * كنت بحبها حتي كسلا بقت…استغفر الله العظيم

  10. كلام صاح الحلنقي الفنان يقبض الملايين والشاعر ملاليم وامكن مايلقاها انا معاك اسحب اغنياتك منو ولا يدفع

  11. وريتنا صورةتختلف عن من كتب اعز الناس يا خي انت في عمر ما بتحتاج لنصيحة ولمال يآتي بهذا الاسلوب ود الامين كبير في عمره ورجل قامة فما تنقص من قدركم وتنشر غسيلكم

  12. انا اصلا الحلنقى دة من ما باري ناس فرفور وشريف السخيل بنى طمت منو
    وانت ياحلنقى الأغنيات دى بقت ما حقتك بقت بتاعت الشعب السوداني ونحن مابنسمح يغنيها لينا زول غير ود اللمين

  13. ود الامين غناي ولكن شخصيته كريهة
    والآن طلع حرامي كمان
    يخسي عليك
    ادي الحلنقي حقو
    عشان الواحد اثناء ما بيسمع الحاجات دي ما تعكر مزاجو
    بعدين الشاعر هو الاساس والمغنواتي مثل ود الامين مجرد مؤدي وحتى بعد مئات السنين سيذكر الناس الشاعر ولن يتذكر احد المغنواتي
    جميعنا يعرف المتنبي وابو نواس وامرؤ القيس وعنترة ولكن لا احد يتذكر الغلمان والجواري الذين تغنوا باشعارهم في دوواين الملوك والسلاطين

    1. انسان بائس تتنفس حقدا وكراهيه ياخ لوماعندك كلمه خير تقولا انطم سديت نفسنا من الصباح

  14. من يهضم حقوق الشعراء لا يحترم المعانى السامية للعملية الابداعية ولولا الشاعر لما كان المغنى فليغسل محمد الامين يده من حق هذا العملاق الذى ينتج المعانى السامية للحياة