الفاتح جبرا

يا رااااجل حرام عليك


ما أن قمت بقراءة تصريحات السيد إبراهيم محمود مساعد رئيس الجمهورية ونائب رئيس المؤتمر الوطني التي نشرتها صحف الأمس و التي قال فيها بان الحكومة الحالية عندما استلمت السلطة الناس كانت بتبيت في صف الفرن لـ4 رغيفات وتقيف في صف البنزين عشان يلقوا ليهم جالون بنزين وكنا بنقسم الصابونة وندي السكر بالوقية … ما أن قرأت (كلام المسؤول غير المسؤول ده) حتى هتفت قائلاُ (يا رااااجل) وذلك على طريقة أستاذنا المبجل (محمد سليمان) في برنامجه الشهير ذاك ( جراب الحاوي) ..عندما قام بسؤال أحد من المشاركين عن شخصية رئيس دولة أفريقي شاعر وأديب مثقف فأجابه المشارك (دا نميري) …فكان رد (محمد سليمان) بلهجته الساخرة تلك يا رااااااااااااجل حرااام عليك !

السيد إبراهيم محمود مساعد رئيس الجمهورية ونائب رئيس المؤتمر الوطني (إذن) يعتقد بأن حزبه قد قام بإنقاذنا حقيقة لا مجازاً وأخرجنا من (الفقر) إلى (الغني) ومن الضلال إلى الرشاد ومن (الصابونة) البتقاسموها إلى الصابونة (الما بتقاسموها) ومن الشنو داك للشنو ما بعرف داك !
بالله عليكم هسه جنس (التصريح) ده الزول يقول عليهو شنووو؟؟ خلاس يا (حبيبنا) الأوضاع فل الفل والشعب (طلعتوهو) من حدة الفقر تلك وخليتوهو (آخر نغنغة) والبنزين موجووود .. والرغيف الذي لا يري بالعين المجردة أبو 2 بألف جنيه (بعد حذف الأصفار) موجووود.. والمواصلات (فضييياه) والدولار بي (عشرين جنيه) !!
يا راااجل قول كلام تااااني … إنتهى الحياء والإختشاء ورب العرش العظيم … وأضحى من أجل التشبث بالسلطة يمكن للشخص أن يغالط الواقع والحقيقة (عدييييل كده) ، هل يمكن لأي عاقل بالغ رشيد أن يقارن مجرد مقارنة بين ما هو حادث الآن وما قبل أن تأتي عصبة السيد إبراهيم محمود ؟؟ هل معرفة التدهور في حياة الناس ومعاشها (الحاصل) الآن نتيجة إنفراد حزب (إبراهيم محمود) بالسلطة لأكثر من ربع قرن (عاوز ليهو دليل) وللا حتى (درس عصر)… لكنها (السلطة) التي تعمي القلوب والأبصار !
المشكلة في مثل هذه التصريحات ليست في إنها تعد سبباً مباشراً في حدوث الذبحات الصدرية وحالات الشلل الرباعي ولكن في كونها تدل دلالة قاطعة بأن (السيد مساعد الرئيس) وحزبه لا يرون أن (الشعب) يواجه أي مشكلة وإن (الدنيا لونها بمبي) وأن هنالك تحسناً واضحا في حياة الناس التي كانت (تتقاسم الصابونة) وأضحت الآن تتقاسم (حبة المضاد الحيوي) !
ويستطرد السيد إبراهيم محمود قائلاً في تصريحه (نواجه حملة شرسة تعتبرنا قتلة وفاسدين) .. ونقول لسيادته … ليه كده ياااخ .. ليه النظرة الوحشة دي .. (قتلة دي) كدي نخليها عشان (إتملصتوا منها) وقلتو العربات كانت بدون (لوحات وكده) .. لكن الفساد ده .. كمان عاوز ليهو كلام؟ .. ففي فترة حكمكم يا عزيزي (نفرين بس) يعني شخصين بس في قضية بل فضيحة (الأقطان) إستطاعوا أن ينهبو 55 مليون يورو و 15 مليون دولار … (دي عينه ساااكت) .. أما عن من هم دون ذلك فحدث ولا حرج … فهنالك الوزير الذي يصرح بأنه يستدين من إخوته (حق الملاح) وبعد أقل من عام نفاجأ به وقد إشتري منزلا بملايين الدولارات غير ذلك (التحلل) الذي أضحك العالم وهذا غيض من فيض .. فيض أن تكون السلطة مطلقة لجماعة محددة فقط .. (تعوس) فيها كما شاءت .. وهل كان هنالك شخص يعتقد (يا سيد إبراهيم) أو يظن مجرد ظن بأن الفساد سوف يطال حتي المؤسسات ذات القدسية الدينية .. الحج والعمرة ، الأوقاف ، الزكاة (يعني فضلت ليكم الصلاة بس) ، وعشان ما (نكتر الكلام) كدي يدك معانا نشوف (السرقو) خط هيثرو ديل ونرجع الخط أو القروش لأنو الموضوع ده أخد ليهو 8 سنين يا (باشمهندس) !!
كسرة :
العبد لله يرقد بالغرفة 99 مستشفى (إصابات التصريحات الحكومية) … الزيارة ممنوعة لخطورة الحالة !!!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و


‫5 تعليقات

  1. هههههههههههههههههه
    ههههههههههه
    قوة عين ما بعده قوة عييييييييييييييين

    الاختشوووووووووو ماتووووووووووووو

    رجعونا زيما كنا89 بس اتركونا في حالنا واتركو الحكم وورنوا ارض اكتافكم

    الله ينتقم من بشة واعوانه

    بدل ما تقول يا رررررررررررراجل

    قول يا ولــــــــد

    لأنه ده تصريح ولد صغير ما بيقولوا !!!!!!!!!!!!!!

    أأأأأأأأأأأأأأأأه يا قلب

  2. إيه الاسمو
    فقه السترة ؟
    والمذنب خلوهو لبكرة ؟
    أعذرني
    يا فاتح جبرة
    عايز آخد
    من كسراتك كسرة

    ويقول ليك
    بكل بجاحة
    وقلة حياء
    وقوة عين ووقاحة
    ما الدين جمال وسماحة !!
    يا خ بتحلل !!
    من المال الشلته بتحلل
    قماش جاهز
    لكل حالة يتفصل ؟
    عمرو الدين
    لا يتغير …لا يتبدل
    يا عجبي !!
    ومقاس معلوم ؟
    لا حيا لا خجلة …
    وضمير كمان معدوم ؟
    دا منطق مقنع
    أو كلام مفهوم ؟

  3. (( كسرة :
    العبد لله يرقد بالغرفة 99 مستشفى (إصابات التصريحات الحكومية) … الزيارة ممنوعة لخطورة الحالة !!!)))……. ألف سلامة ليك يا أستاذ جبرا، , وألف سلامة للشعب السوداني، وهل الزيارة لهذا المستشفى مسموحة أم لا؟

  4. ألف سلامة عليك يا أستاذ جبرة وتتطلع من المستشفي العجيبة دي بالسلامة وندبح ليك الحبشي ده كرامة