جبرا في لندن (1)

قالت لي إبنتي الصغيرة وهي تمسك بإحدى الصحف :
– صحي يا أبوي إنتا ماشي (لندن) !
– يا بت إنتي جنيتي والله مع الظروف دي الله أعلم أبوك تاني يركب ليهو طيارة
– أهو مكتوب هنا يا أبوي خد أقرأ (وسلمتني الصحيفة)
الخبر عنوانه يقول (قدمها عدد من القراءمن بينهم قراء الراكوبة)

وكاتبه هو الزميل بكري خليفة ، يقول الخبر :
(تفاعل عدد كبير من القراء على مواقع التواصل الاجتماعي وموقع الراكوبة الإلكتروني مع الكاتب الساخر الفاتح جبرا والذي ظل يذيل عموده المقروء ب(أخبار خط هيثرووو شنو وشنوووووو) وقال أحد السودانيين المقيمين ببريطانيا (والله يا جبرة أنت الإبداع ذات نفسه ونحن موجهين ليك دعوة لزيارة بريطانيا عشان تمشي هيثرو وتسأل أهل الخط بنفسك وتسمع بأضانك: منو الباع.. ومنو المشتري.. ومنو السمسار.. وكل واحد قبض كم.. عشان لمن ترجع الخرطوم تكون عرفت الحاصل وتحضر بياناتك معاك من لندن وكل المستندات)
ما أن قرأت الخبر حتى سرحت بخيالي والطائرة تحط عبر عدد من (الكونكشنات) في مطار هيثرو (حليل أيام الدايركت) ، بعد النزول من الطائرة والوصول إلى صالة القادمين ما أن جاء دوري لتقديم جوازي إلى ضابط الجوازات حتى تفرس فيه مليئاً ثم نظر لي قائلاً :
(بالإنجليزية طبعن) :
– إنتا ساخر سبيل .. خط هيثرو أخبارو شنوووووو ؟!!
– معقول يا خواجه تكون القصة دي وصلت ليكم هنا !
– قصة دي يا أستاذ وصلت كوول الدنيا !
وهو يضرب بالختم على الجواز قلت في نفسي والله فعلا الدنيا دي بقت قرية صغيرة خلاس .
بعد أن إستلمت حقيبتي ، وأمام مكان المنتظرين وجدت ثلة من السودانيين يلوحون لي بأياديهم وينادونني :
– يا أستاذ … يا استاذ
وبعد السلام والأحضان والسؤال عن الأهل والخلان ، وبعد أن قدمت لهم الشكر والإمتنان نيابة عن الشعب السوداني (الفضل) لهذه الدعوة الكريمة للبحث عن الخط (الرايح) ليهم كم سنة ، ركبنا في عربة أحدهم ذات الدفع الرباعي :
– يا أستاذ نحنا حاجزين ليك في فندق وسط المدينة !
– فندق شنو … ودوني (القسم) طواااالي
– (قسم) شنو يا أستاذ كدي روق وإستريح من ساعات السفر الطويلة دي !
– أروق شنو يا جماعة ما شفتو الواوات دي حصلت كم ؟ (ثم في إصرار) بالله لو سمحتو بس وصلوني أقرب قسم شرطه لي مطار هيثرو ده وبعدين الفندق والراحة ملحوقة !
تحت إصراري وإلحاحي قام السائق بتغيير مسارة بعد أن قام بإستخدام خرائط قوقل Google Maps بتحديد أقرب قسم شرطة ، وبعد دردشة عن إرتفاع سعر الغاز وغياب البرلمان وتصريح (الصابونة) والمداخلة الشهيرة والشنو ما عارف توقفت العربة :
– أهو ده يا أستاذ أقرب قسم شرطة
– طيب يا جماعة إنتو عارفين إنو الخواجات ديل ما بحبو الزحمة ، خلوني أمشي أفتح البلاغ براي إنتو أمشوا إستريحوا وبعد ساعة كده تعالو ليا ، وللا أقول ليكم عشان ما أتعبكم وروني إسم الفندق وعنوانو أنا بعد ما أخلص بمشي ليهو ، تعالو ليا المساء هناك .
على باب القسم إستوقفني شرطي مدجج بالسلاح وقال لي بإنجليزية رصينة :
– لو سمحت يا سيدي أين أنت ذاهب
– إلى قسم البلاغات
– هل تمت سرقتك !
– سرقتي أنا يا خواجة؟ دي سرقة شعب كااامل .. سرقة أمة (نيشن يا خواجة نيشن) !!
فغر الحارس (الخواجة) فاه (مستغرشاً) وهو يشير لي على مكان كاونتر البلاغات وكأنه كان يقول لنفسه (الزول ده مجنتر أكيد) !
عند كاونتر البلاغات كان هنالك صول ضخم الجثة متورد الجضوم يجلس على كرسي جلدي دوار ويضع أمامه دفتر البلاغات وقفت أمامه وألقيت عليه التحية :
– صباح الخير
– صباح النور … هل من خدمة أؤديها لك !

كسرة :
في حلقة غداً نشوف الحصل شنوووووو … أبقوا معنا … الفاتح جبرا .. من داخل مبني القسم الأوسط … شرطة لندن غرب … العاصمة البريطانية)
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و