منوعات

المريخ بيلعب مباريات الممتاز (ديلفيري)


الزمن ده ثقة بقت ما في …ود العم بيمشي يخطب بنت عمو – لو العريس ما حدد يوم للعقد ما بخلوه يطلع من البيت.
ما بمرق.
يعملوها ليه بي ظرافة ، ورشاقة – لا يعني عشان نرتب اوضاعنا انت ناوي تعقد متين؟.
عشان البنت دي عندها (خيلانها) في السعودية وقطر.
وعاوزين نصلح البيت.
واخوها الكبير في الامارات….عاوز يعرف عشان يحدد (اجازته) من بدري.
الغريبة يمشوا ويجوا للعقد وما بتكون في اي تصليحات في البيت.
والاخو الكبير ذاتو من الامارات بيعتذر عن الجيّة.
بقول ظروفه ما سمحت.
كلام ساكت.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الواحد يعقد – يقولوا ليه حدد لينا يوم ، انت ناوي تكمّل عرسك متين؟ ..وتجي تسوق مرتك.
تقول (المرا) دي قاعدة ليها في (فندق).
يا جماعة عرفت من متين؟.
بنفس هذا الفهم ..نحن عاوزين نعرف المباريات المؤجلة للمريخ في بطولة الممتاز ح يلعبها متين؟.
عاوزين نعرف بس.
عندنا ناس برة البلد.
يعني مثلا كدا مباراة المريخ والخرطوم الوطني ح تكون متين؟.
الخرطوم الوطني يقاسم الهلال والمريخ في الصدارة وهو كان في سرج واحد مع المريخ قبل تعادله الاخير مع الاهلي الخرطوم.
ذلك يعني ان مباراته مع المريخ في هذا التوقيت كان ممكن يكون (موت احمر).
صراع على الصدارة.
الترتيب بقول كدا.
حكاية المريخ ممثل في البطولة الافريقية.
والخرطوم الوطني في الكونفدرالية ..دا كلام ساكت.
المريخ قدمت له مباريات الاسبوع السابع والثامن عشان مشاركته الخارجية لتلعب في الاسبوع الثالث والرابع.
وما في اي (فهم) في الموضوع دا.
إلّا خدمة خاصة للمريخ.
ديلفيري الممتاز.
يحددوا ليه المباريات حسب الطلب.
مباراة يقدموها ليه.
ومباراة يأخروها.
لماذا لم تقدم وقتها مباراة المريخ والخرطوم الوطني وهما الاتنين بمثلوا خارجيا.
اشمعنا دي.
هسع عاوز لي زول (عبقري) كدا ..يشرح لي الموضوع.
يوريني العبقرية شنو في تقديم مباريات المريخ في الاسبوع السابع والثامن لتلعب في الاسبوع الثالث والرابع.
وين المصلحة العامة هنا؟.
الدوري الممتاز لعبت فيها مباريات الاسبوع السابع والثامن قبل وقت كافي من مشاركات الهلال والمريخ الخارجية.
مقدمنها ليه؟.
عاوزين نعرف.
بل ان الهلال والمريخ سوف يلعبوا مباراتهما في الاسبوع التاسع يوم الجمعة والاربعاء قبل السفر الى تونس ونيجيريا.
يعني اصلا ما كان في داعي لتقديم مباريات المريخ في الاسبوع السابع والثامن لتلعب في الثالث والرابع.
لخبطة ساكت.
يعملوا القرعة ..ويمشوا عكسها.
هذه مساعدة قصد بها ان يلعب المريخ امام هلال ومريخ الفاشر في الاسابيع الاولى بعد المستوى الضعيف الذي ظهرت به قمة الفاشر في بداية الدوري.
ساعد على تقديم تلك المباريات تعادل الهلال امام هلال الابيض – لذلك لعب المريخ متحررا من الضغوط في الفاشر والهلال قد فقد نقتطين.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
يا ناس الهلال احسموا (الفوضى) دي – ما تقعدوا تعملوها لينا كلها تغيير للمدربين.
فلاحتكم بقت في (مدربكم).
ييجبوا المدرب ويشتموه.
خلوا الاتحاد وقبلوا على مدربهم.
الموسم الماضي ..مباراة المريخ والاهلي شندي ظلت تأجل ويتم تحويلها من اسبوع الى اسبوع – لمن الصورة اتضحت.
والحكاية اتعرفت.
واهلي شندي ذاتو ضمن ترتيبه الثالث – وبقت ما فارقة معاه نتيجة مباراته مع المريخ.
بل ان المريخ الموسم الماضي مباراته مع الاهلي مدني في المناقل لم يتم برمجتها إلّا بعد ان خرج الاهلي مدني من موضع الخطر.
وانسحب الهلال من الممتاز.
ولم يعد للمباراة اي قيمة.
بعد ذلك تم برمجة المباراة التى كان يفترض ان تلعب قبل شهر من تاريخها الذي لعبت فيه
الاتحاد العام الآن بعمل في نفس النظرية.
وناس الهلال يشيلوا مدرب ويجيبوا مدرب.
شطاراتهم كلها بكبوها في (المدرب).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الاتحاد العام قام بتأجيل مباراة المريخ والخرطوم الوطني ولم يحدد لها تاريخ.
وخلى جدولة المباراة مفتوح.
تلعب متين – الله يعلم.
يعني ما معروف متى تقام هذه المباراة ومتى يتم برمجتها؟.
اراهن ايضا ان الاتحاد العام سوف يقوم بتأجيل اي مباراة يمكن ان تسبب مشكلة للمريخ في الدوري بحجة مشاركة المريخ في البطولة الافريقية.
لذلك اتوقع منذ الآن تأجيل مباراة هلال كادوقلي والمريخ ..(بيلقوا ليهم سبب ويأجلوا هذه المباراة).
تذكروا هذا الكلام.
والاتحاد منذ الآن ونقولها ليكم مبكرا سوف يتم تأجيل مباراة المريخ امام هلال الابيض في الابيض.
اسألوني من الكلام دا.
الاتحاد العام كان قد قدم مباراة المريخ في الاسبوع السابع والثامن بحجة انكشف ضعفها الآن.
والاتحاد العام قدم مباراة الامل عطبرة لتلعب في توقيت ما عندو قيمة.
الامل كان يفقد فيه مهاجمه (ازيكال).
في الوقت الذي تم فيه تأخير مباراة المريخ امام الخرطوم الوطني.
الموضوع لو بقى على (التأجيل) فقط – ما كنا قلنا حاجة.
الموضوع فيه (تقديم) مباريات كمان.
لاحظوا ان هذا الامر استفاد منه فقط المريخ..رغم مشاركة الهلال والاهلي شندي والخرطوم الوطني خارجيا في نفس البطولات التى تم التأجيل والتقديم للمريخ من اجلها.
فريق الخرطوم الوطني قبل اللعب امام فيلا اليوغندي كان يحتاج الى ان يلعب مباراة قوية مع الهلال او المريخ لتكون له اختبار حقيقي قبل المنافسة الافريقية.
كان يمكن ان تقدم مباراة المريخ والخرطوم الوطني لتلعب في توقيت يسبق مباراة الخرطوم الوطني امام فيلا اليوغندي في الاياب – طالما كان الاتحاد يبحث عن المصلحة العامة.
حتى مباراة الخرطوم الوطني امام الهلال كان يمكن ان تقدم ليستفيد الهلال والخرطوم الوطني رغم ان برمجة الممتاز وضعتمها في الاسبوع قبل الاخير.
قصدنا ان نعرض ذلك ..حتى ينتبه مجلس الهلال الى هذه (التدابير)..والتخطيطات الواضحة لخدمة المريخ وكأنه هو الممثل الوحيد للسودان.
عماد الطيب الامين العام للهلال بدلا من الدخول في الشئون الفنية وتحليل الامور عليه ان يلتفت الى هذه الامور وهو الامين العام للهلال.
شايل بشارتو ويمسح في حاجات (كافالي).
هنا يظهر دور الامين العام ..وهنا نحتاج له…في الحاجات البعمل فيها الاتحاد دا.
لا نحتاج الى (منظر) اخر في شئون الفريق الفنية.
ما عاوزين لينا مساعد مدرب (امين عام).
هي قالوا ليك ناقصة!!.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….
و
مباريات ديلفيري دي اول مرة نسمع بيها.
المريخ دا عملوا ليه اي حاجة.
تقديم.
تأجيل.
اخراج الشرطة من الملعب.
وسيحة يوم الجمعة كمان.
يعني كل الخدمات تقدم للمريخ.
غير الـ (8) مليار التى دعم بها مجلس اسامة ونسى.
يا جماعة الناس ديل بعد كدا يعملوا ليهم شنو؟.
النسور لو وجد هذه المميزات التى تمنح للمريخ سوف يفوز بالبطولة.
متعبين دولة ساكت.
وما قادرين تعملوا اي حاجة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
……….
السيدة (ل) – الحزن ما بشيلو عصير الليمون.
وقرّط على كدا.


‫3 تعليقات

  1. ههههههه .. بين الصباح الراح .. شكـراً على اسعادنا و لو بابتسامه يا ود عبدالماجد .. بس تصدق عملتا لينا ارهاب من العرس بعدم ثقتكم دي .. عفواً قصدي ثقة النسابه ..

  2. كلام عجيب لو كنت مكانك لكتبت عن فريق الهلال والاستحقاق الافريقي المنتظر والنسور وكشف المستور

  3. صدقت يا ود عبد الماجد المرخرخ عملو ليهو اي حاجة لكن صدقني حا يقع برة وجوة