بابكر سلك

يقعد يسلي يقوم يخلي


> التزام جيمي بتكاليف المعسكر والسفر إلى نيجيريا جميل
> لأنه يعني ان لا عداء بين الوالي ولجنة التسيير
> يعني الذين يروجون لافهام الناس بالعداء بين الطرفين قد خسروا بمجرد اعلان الوالي لدعمه
> والغريبة اصحاب تلك الترويجات لم نسمع بدعمهم يوماً للجنة التسيير
> لا على المستوى الشخصي ولا على المحتوي التنظيمي
> لا اقول شكراً جمال
> ولا اشكر الفادني «جمال الصغير»
> ولكن اناشد كل المجتمع المريخي
> احثهم على القيام بواجب الدعم تجاه الزعيم
> قرش بنفع
> قرش على قرش ببقوا قرشين
> وقرشين على اقل تقدير بتحل جزء من الدين
> ايها الناس
> دعم جمال المتواصل للزعيم سواء كان من الداخل او من الخارج ذكرني مثلاً للمدح قالوا لي بدري العم والجار والصديق الحبيب عوض مختار علي
> يقعد يسلي ويقوم يخلي
> هذا هو جمال
> أيها الناس
> الفرحة التي اعترت الجبين المريخي لخبر عودة جيمي لدفة القيادة المريخية
> لفحها الاعلام وسلط عليها جميع الاضواء
> ولكنهم اخذوا التعبير في عجالة
> فالعيون التي اشرقت فيها الفرحة لخبر عودة جمال
> كان بداخلها سؤال
> حايمشي تاني ويخلينا يا ربي؟
> ولو مشى بمشي في ياتو مرحلة؟
> ولو مشى بكون اسس لينا استثمارات ضخمة ما تخلينا نتعصر لما يمشي ولا لأ؟
> ولو جا
> بتجينا معاهو نفس الوجوه التي اضرت بجمال قبل المريخ ولا المرة دي بتجاوزها؟
> ولو اتجاوزها بعتمد في المكتب التنفيذي على نفس وجوه القصور التي عهدناها ولا بفكها عكس الهواء؟
> ولو فكاها عكس الهواء هل ممكن يعيدها لينا تاني الهواء؟
> سؤال كبير تتفرع منه اسئلة كثيرة كان واضحاً على العيون التي اشرقت لخبر عودة جمال
> عشان كده حقو جيمي يقرأ تلك الاسئلة على العيون التي احبته ويحدد استراتيجيته للمرحلة القادمة ايا كان موقعه من المجلس.
> فموقعه في قلوب السواد الاعظم يحتم عليه مراجعة الفات واستصحابه عند وضع استراتيجية الجاي
> ايها الناس
> جمال يستحق كأس افريقيا
> والكأس الفات قرب
> لأنو بعدما لبنت جمال اداها الطير
> محاولة جديدة جادة يمكن ان تحقق أملنا في حصول المريخ على الأميرة السمراء في عهد رئاسة جيمي
> المريخ يستحق الاميرة
> وجمال يستحق ان يكون رئيس النادي الحاصل على ود الاميرة
> ايها الناس
> السنة الفاتت كنا افريقيا زي الطلقة
> الجميع رشحنا للبطولة بدون منافس
> ومن كورة العلمة الثانية بدينا في التدني
> ولولا المطرة التي صبت على عواجيز العلمة لما عدنا في المباراة.
> ثم ذهبنا كادوقلي فخسرنا بالتعادل
> ومشينا عطبرة وخسرنا جد جد
> وكانت الخسارة من هلال الابيض في تلك الفترة علي ما اظن
> ثم ولج شباكنا اول هدف افريقي على ارضنا
> وكملنا الباقي بلومومباشي
> وعدنا للسودان لنخسر من اهلي مدني في المناقل
> شنو الدخل علينا جديد في تلك الفترة؟
> دي من الحاجات الدايرة مراجعة يا ريس
> المهم
> نسمع باستقالات من الجهاز الفني للشباب المريخي
> يوم البلغاري والتاني ويوم عادل امين وجندي
> الحاصل شنو يا طارق؟
> الزرع بدأ يطلع
> حاربوا الذين يغلقون جداول المويه ليموت الزرع الاخضر البدأ ينبت
> ولكن لا للاستقالات
> ولا شنو يا مجدي؟!
> المرأة المريخية دائماً في الموعد
> اخوات سعدية وبنات سيدة في الميدان
> خشمي خفيف وحا احكي ليكم بكرة عما قام به بنات المريخ
> ايها الناس
> رحم الله والدة الريس محمد الياس وجعل الجنة مقامها وانعم على اهلها بالصبر وحسن العزاء.
> ايها الناس
> ان تنصروا الله ينصركم
> اها
> نجي لي شمارات والي الخرطوم
> كان شفت يا والينا
> كلمتونا وقلتوا لينا
> الغاز بي خمسه وسبعين عملتوهو لينا
> كعادتنا سميناها رضينا
> وفي نفس اللحظة الغاز المعدوم رقد لينا
> لكن في الواقع يا والينا
> الغاز بي خمسة وتمنين بتباع لينا
> يبقى لا سمح الله غشيتونا يا والينا
> «لا سمح الله دي عجبتني»
> يبقى لا سمح الله غشيتونا يا والينا
> ولا ناس التواكيل بستغلوا فينا؟
سلك كهربا
ننساك كيف والكلب قال السوق ورقو كعب وكروتو ماتت عشان كده ما بنزل
والى لقاء
سلك