حوارات ولقاءات

ندى القلعة: شريف نيجيريا قال لي.. انتو السودانيين مش بتقولو النبي قبل الهدية.. وقال لفرفور وعمر احساس الفنانة «روزا رويس» دي لازم تجيبوها


ندى القلعة في حوار السياسة والفن (2-2)
مثلث ذهبي يجمع الفنانة ندى القلعة بالشاعر اسحق الحلنقي والملحن الموسيقار عبد الطيف خضر، عبر مبادرة الأغنية الوطنية التي أضحت اليوم مغيبة تماماً من المشهد الفني، و مفقودة حتى علي صعيد المناسبات الوطنية نفسها، وعلى عكس مامضى من سنوات سابقات كانت الساحة تشنف مسامعها علي عقود أغنيات وطنية للعطبروي ووردي في ظل تقصير من البقية في حق الوطن، وندى التي تعتبر صاحبة أكبر حزب جماهيري زارت مقر الصحيفة الثلاثاء الماضي، ومكثت زهاء الأربع ساعات تتجاذب أطراف الحديث مع العاملين بالصحيفة، في أجواء مفعمة بالأريحية، وطرحنا عليها حزمة من الأسئلة المتعلقة بالشأن السياسي والفني والشائعات التي تلاحقها بين الفنية والأخرى، فجاءت إجاباتها واضحة وشفافة.. فمعا نتابع مادار في الحوار:

< عبر رسالتك الفنية التي تحملينها هل تستطيعي أن تصلحي ما أفسدته السياسة بين الشعوب؟ - طبعا وشديد كمان، ربما يكون هنالك سياسي علي خلاف مع سياسي آخر، وقد يجمع بينهم حب ندى القلعة، وممكن من خلال غناي اجمعهم الاتنين حولي، علشان يتصافوا ويتصالحوا، وهذا الدور ممكن أن يقوم به أي فنان (ود الأمين) أو غيره، وهنا يكمن دورالفن و الرساله الانسانية المهمة التي يحملها في إصلاح ما تفسده السياسة بين الشعوب < هل تستطيعين الإسهام في احتواء الخلافات التي برزت حول سد النهضة بين مصر والسودان وأثيوبيا ؟ - أكيد ممكن بي فني بقدر أعمل حاجة تهدي الوضع بين هذه الدول، وخلاف فني دا أنا ما عندي شئ، وعارفه مقدراتي كفنانة في تهدئة النفوس بين الناس والدول < وجود مجموعة من معجبيك من أبناء الجنوب هل ذلك سيكون مؤشر نحو الوحدة مع الجنوب ؟ - الاختلاف الموجود بيننا دائماً بكون اختلاف سياسي، لكن الجنوبين وجدانياً مرتبطين بينا والحاجات دي التمستها من خلال حفلاتي التي يحضرها الأخوة الجنوبيون، وكنت شغالة ليهم مناسبة خاصة وحضرها الكثير منهم حتى أصابني الرعب منهم، وقلت في نفسي الناس ديل كانوا وين هنا في الخرطوم، فكانوا يتفاعلون معي وحافظين الأغاني بتاعتي كلها، ونهاية الحفلة جاءت مجموعة كبيرة منهم وإتصورت معاي، والجنوبيون مابعرفوا يجاملوا لو ما بحبوك، والحاجة دي أنا حسيتها من خلال التعامل معهم < ماسر اهتمامك بالغناء للأفارقة أكثر من العرب؟ - نحن أفارقة قاعدين نتنكر لأفرقيتنا، وهذا الأمر الذي يسبب لنا المشاكل والكلام مع العرب، ونحن لو كنا بنعتز بافريقتنا ما كان في عربي يقدر يتطاولوا علينا، وأنا عملت أغنية جديدة لإفريقيا من كلمات الشاعرة سحر ميسرة وهي «أفريقيا أنا افريقيا من قلب القارة السمراء « الأغنية السودانية لم تصل إلى الأذن العربية ؟ في شاب عربي قدم اغنية للفنان سيد خليفة» أنا مالي ومالوا «والناس حبته شديد، ومن هنا ممكن أقول ليك الأغاني السودانية جميلة لكن الأذن العربية لاتستطيع الاستماع إلى الأعمال الجيدة < في تصريحات سابقة ذكرتي انك تنتمين للمؤتمر الوطني ؟ اصلا ما قلت انا مؤتمر وطني وبقولها حاليا و بصوتي عالي وقدام الناس كلها ماعندي اي علاقة بالمؤتمر الوطني وعلاقتي طيبة مع كل السياسين كفنانة لكن ماعندي اي لون سياسي ومفترض الفنان عموما مايكون عنده لون سياسي معين لانه بغني لكل الشعب وانا مع المواقف السياسية و مع الشعب وبحترم كل حاكم و ماعندي علاقة بالحكومة وانا مع حزب الشعب وليس الشعبي.< ماذا عن المشاكسات مع بعض الفنانات وبروز اغنيات لاتخلو من الشيمة والسباب لبعضكن البعض ؟ اولا (انا لا اتشرف ان اكون في حتة واغني لزول او او ادخل في مناكفة مع زولا باغنية ) وانا غنيت اغنية واحدة زمان ممكن كان تتحسب علي وهي اغنية الشريف عندما تعرضت لحرب من الكل ، والناس كلها بقت علي ورديت باغنية بنفس ركاكة الاسلوب الذي به الهجوم علي ، وتعرضت للطعن في شرفي وكان لازم ارد وانا من خلال الاغاني احاول معالجة قضايا كثيرة فعندما تاتي قضيتي يغلبني اني ادافع عن نفسي ،والبلد كلها الزمن داك فهمت الاغنية والمقصود منها شنو لان بعض الزملاء قدموا فهم خاطئ عني للجمهوري < هل تبررين ذلك بانك محسودة ؟ انا بتكلم عن زول جاب معلومة خاطئة في فرق مابين انك تكون لقيت ندي في نيجريا وفرق في انك تتحدث عن مواضيع تانية خالص وهذه المعلومة جعلتني امام الاتهامات وكلو زول كان بيقول كلام بجهة عني والناس كانت ما عارفة الحاصل شنو و ياريت لو الناس جات وسألتني من زمان كنت وريتم الحاصل كلو < تعتقدي بان هنالك شخصيات كانت تريد تصفية حساباتها معك من خلال الغبار الكثيف الذي دار حول اغنية «الشريف» ؟ انا كنت من دون الزملاء مميزة ليس من خلال فني فقط بل عشان قدموا لي عربة هدية وانا لست الوحيدة التي قدمت اليها هدية وهنالك فنانة في مالي تدعي «ام سنقاري» هي الاخري قدمت اليها هدية والامر كله يعود لاني غنيت لجمهور صفوي غنيت للشخصيات الكبيرة وللسياسين واما الفانيين الاخرين غنوا في مسارح عادية لجمهور شعبي وهذا ليس ذنبي لاني اجيره وجايبني اغني للمسؤلين ، وهذا هو الفرق بيني وبين الذين رافقوني في تلك الزيارة واكيد تعرضت للحسد وهذه هي المشكلة برمتها < ماسر علاقتك بشريف نيجريا ؟ بعد فراغي من حفلة نيجيريا سافرت الي الامارات لشراء عربة تعرضت لحادث حركة وانقلاب عربتي خمس مرات وحينها ارسل علي شريف لي الفنانين عمر احساس وجمال فرفور وهما اللذان ربطوني للحفلة وهذا مالايعرفه الناس وفرفور واحساس جوني في البيت وقالو لي عمر شريف عايزك تغني ليه وامي رفضت الامر لاني اسافر لنيجريا لانها كانت خائفة علي والزمن داك كنت مارقة من حادث حركة وقلت ليهم انا عدادي (100) ألف دولار عشان يصرفوا النظر عني بعد داك الشريف رسل دعوة لاسرتي كلها واصر اني اجي اغني ليهم وقال لفرفور وعمر احساس الفنانة «روزا رويس» دي لازم تجيبوها معاكم وقال ليهم الفنانة الغالية دي انا عايزكم تجيبوها وديل ناس اثريا مافي شي غالي عليهم وهم لا زي ولازيك «فهمت كلامي» < ماهي قصة العربة «الا كزيز» الهدية؟ لامن كنت في الامارات مندوب علي شريف جاني في «الهوتيل « وقال عايزنك في شركة الفطيم وذهبت لمقر الشركة بصحبة خالي ، ومدير الشركة قال لي مدام ندي مستر علي شريف عايز يتكلم معاك وادني التلفون ،وعلي شريف بواسطة المترجم قال لي ناسي ديل دايرين يقدمو ليك عربة هدية ،واللحظة دي انا اتخلعت وبقيت افكر اقول انا العربية دي جبتها من وين والزمن داك انا زولة مقدراتي محدودة وبمد رجلي علي حسب لحافي وبعد تفكير رفضت الهدية لكنهم اصروا ان اقبلها و الشريف قال لي انتو السودانيين مش بتقولو النبي قبل الهدية وبعد كلامو دا خالي قال لي اقبليها وبعدها ما كان عندي كلام لان الرسول علية الصلاة والسلام قال تهادو تحابو وقبلت الهدية واول شي عملتو اتصلت بالسفارة السودانية بالامارات وقلت ليهم انا مثلت السودان بتوبي السوداني والهدية دي جاتني باسم السودان .< ندي متهمة بان علاقتك بالوسط الفني ضعيفة ؟ علاقتي بالفنانات طيبة شديدة و لكن ممكن باني شخصية انطوائية شوية واكرس جل وقتي لفني واولادي و يومي بقضيه مابين مكتبي ومركز التجميل الخاص واولادي في البيت و»البودي الناس بودينا لكن ماعندي زمن علشان امشي اتكسر في ونسة وقرقرا « < التقارب في الاداء بينك وحرم النور هل ذلك جعل من حرم ان تسحب البساط من تحتك ؟ اجابت ضاحكة انت شايف شنو.. انا بحترم حرم النور وهي بمثابة بتي وهي اول ما بدت تغني جاتني في البيت وسجلت لي زيارة ووصيتي ليها كانت لو عايزة تمشي لقدام ماتسمعي القيلا والقال وحرم تمتاز بنفس احساسي وعندما تغني احس بنفسي زي البغني لكني «مغمضة « وهي تحترمني كثير حتي اليوم ، < اتجهت الي الاستثمار مؤخرا نريد ان نعرف ماذا وراء مركز ندي العمر للتجميل من استثمارات اخري؟ الحاجات العملتها دي من أموال ما ليها علاقة بفني دي أموال حقت أولادي خلوها ليهم أبائهم < اذا كان واحد من اولادي لديه ميول فنية هل ستتركينه يتجه الي هذا المجال؟ اجابت بحسم لا ، لان الحرب التي واجهتها انا كام ارفض ان يتعرض لها اولادي < حديتك بانك عايز راجل يخاف الله فيك اثار ردود افعال واسعة ؟ ضاحكة سووني عايزة راجل ،الحاجة العايزة الناس تفهمها منذ رحيل زوجي قبل (6) اعوام وحتي الان انا ارملة و لا افكر في الزواج وحاليا انا مسؤلة عن ايتام بربي فيهم وفي شخصيات كثيرة تقدمت بطلبات للزواج مني < هل بينها شخصيات بارزة في المجتمع ؟ فيهم الشخصيات العامة والمشهورة ورجال اعمال وبعض السياسين .حوار : أيمن المدو اخر لحظة


‫7 تعليقات

  1. يا ايمن افندي لو الست ندي شبه امية انت كمان امي ؟؟ ايه (الاكزيز) وروزا رويس دي ؟؟؟

  2. ياندي ماذا عن الخندقاوي وأول زياره ليك الدوحه واقامتك في فندق رمادا
    احكي لينا وخلّينا شويه من الشريف

  3. يعني ناس الجريدة ديل شغل ما عندهم وقاعدين يبرطموا مع الولية دي أربعة ساعات في كلام فارغ!!!! وهي الولية دي عندها كم راجل قبل كدا (دي أموال حقت أولادي خلوها ليهم أبائهم)؟؟؟؟ وخلاصة الموضوع خلينا من الشريف قال ليك النبي قبل الهدية، كدي خشي على اليوتيوب وشوفي نفسك وانتي بتغني للشريف بتاع مادجيرو في قصره وانتي لابسة بنطلون الفيزون مع أنه ما عندك م}هلات لبنطلون زي دا. قالت شنو غنيت في مسرح كبير ههههههههه ضحكتينا والله ……. ولية معتوهة وخلاص قطرك فات وغنايك مات وفكينا بلاي من خزعبلاتك دي

  4. الرسوب فى امتحان الصحافة …..والله أحسن ليك تمشى جوبا لانهم بيشبهوك

  5. يا بليدة وساقطة معلومات ولغة هو قال رولز رويس ويقصد السيارة البريطانية المشهورة وطبعا لايمكن هو نطقه زي ما قلتي ROLLS ROYCE