هيثم صديق

حبوبة ونسيني


حبوبة ونسيني للجيل الحالي او لغير المنورين بها كانت تضاء بها البيوت زمان ان قطعت الكهرباء او بقت الرتينة او عصلج الفانوس غلت الشمعة.

حبوبة ونسيني تصنع جزوتها من قطنة مغموسة في زيت

زي العجوة المعطونة في عسل.

وسميت حبوبة ونسيني ربما لتحلق الاسرة كلها حولها وتأخذ الحبوبة في سرد القصص والحكاوي والاحاجي.

كان يا ما كان في قديم الزمان وسالف العصر والأوان صفر صغير …الخ

أها الرمية الفاتت دي كلها لنقول انه الكاردينال حسب ما قالوا سيطلق على الابراج ولعت ام لم تولع فطومة ونسيني.

الناس كلها تقعد تحت الكشافات ديك ويونسوهم يطمبروا ليهم …والصفر قاااعد …. الصفر ده لو ودوه المتحف ممكن يجيب قروش بدل قعدتو ساي كده.

طبعا لحد مارس الجاي الدماعة في الباي باي.. احسن الكاردينال يعتمد علي ابطال جيم.او يتحول لفريق جيمي.

قالوا شيبوب حا يضيفوه للكشف في دوري التمانية…يا سهاري تعالوا شوفوا البيا…الشبيبة كيف قست عليا…

الغريبة كورتهم الجاية برضو ضد الأهلي.. الخرطوم

ماينوم.

بي ان اسبورت قالوا تهي تهي تهي.

تاني خالد بدرا بقول داير يقرا.

يوسف سيف الا يفوت الشتاء والخريف والصيف.

عصام الشوالي الا من الارشيف.

وين خالد الغول وبغلة عبد الخير ماسكها سكري.

ويوووزع في ورق الكتشينة.

سبحان من حول الاقمار الى عطال.

النيلين بس ويديك على الحيط.

الطيران المرة دي غريب علينا.

لأنه بدون جمعة جي طارو.

مكسيم البدأ يأمل.

وقال ليك يمرض ولا يموت.

اطول احتضار في التاريخ.

شارون الناس زهجت من رقادو. لا حي فيرجي ولا ميت فينعي

قلتوا لي بي ان اسبورت تهي تهي.

واستديو تحليلي وفاصل اعلاني.

ياخي الله حل جمال الشريف من البلنتيات…

ركلات تفريح في كل مباراة.

لكن المرة في الدوري ….اووووو لللللا دراجي بس.

مدثر بلنتيكا ينفذ.

كشافة ونسيني هي العليها الرك.

عطالة للحول.

علشان طنشوا المثل (الما بمشي الدمازين حدوا ال32)

لكن امس انا غلطت بتاع المطعم قال لعمك طرابلسابي.. عندنا بطير باللبن…

اعادة الثقة في العشري ده خبر افرح كل الاندية المنافسة

مدرب شاطر قدر يوظف ابيكو في خانة جديدة.

انتوا ابيكو معانا واللا مع الخيانة.

والموضوع ده ما بنتهي عندنا بسهولة.

اقلاها لحد نهاية الشهر ده…

ببقى الباقي من التمهيدي 11 شهر بس.

……

حسنا فعل المجلس وهو ينهي مشكلة مصعب عمر وحسنا فعل راجي وهو يقوم بدور الكابتن …مصعب يبقى بديل جاهز في الخانة ..كما يمكن الدفع به في الوسط أيضا…

…….

مباراة المريخ ليست ببعيدة واستعادة جابسون يعني ان وسط المريخ سيعود الى سابق عهده…كما ان ضربات الراس قد غابت بغيابه.

……

اصرار تراوري على تنفيذ الضربات الثابتة غريب فهو يعتمد على القوة مع الوقوف وقوفا مختلا.. مصعب عمر في حال وجوده هو الافضل.

……..

شكراً للمريخ وهو في كل عيد أم يهدي ام درمان هدية النصر.

…….

المريخ يحتاج الى كل جماهيره بلا شك والالتراس هم مجموعة مقدرة لكني استغرب ان ينسحبوا من التشجيع في شوط حاسم.. هل يريدون مثلا ان يقولوا ان خرج المريخ اها شفتوا فرقتنا….

……….

ما ان قرأت لمحمد كامل كلاما غير الذي اشتهر به قبل المباراة حتى خفت على المريخ. كراته العكسية (عك سيئة دوما).

…….

المريخ قافز بالزانة تحته مراتب…الله للمزلط…

…….

هل يمكن تبني بطولة…او عمل كاس انابيب لمن طال عقمه..?