أبرز العناوينمنوعات

سودانية تحكي كيف خدعت رجال شرطة المرور في الخرطوم


كتبت السودانية دعاء أحمد على مجموعة (احترس .. امامك كشة) وهي قروب مغلق يهتم بقضايا المرور المتنوعة في السودان، مثل(رصد مواقع الحملات المرورية (الكشات)، وتغطية أماكنها الجغرافية في الولايات المختلفة وبأنواعها المختلفة داخل السودان).
وكذلك(لتوعية المرورية لمستخدمي الطريق سائقين ومشاه. ونشر المعلومة التي تساعد على ضمان سلامتهم والحفاظ على الممتلكات العامة).

وحكت دعاء كيف أنها خدعت رجال شرطة المرور لتتفادي مخالفات التحدث عبر الموبايل أثناء القيادة وعدم ربط حزام الأمان.

وقالت (في أول احتكاك مباشر مع رجال المرور ,ثلاثة سنوات بسوق من البيت للشغل ومن الشغل للبيت الأ ما ندر يعني بسوق زي ما الكتاب قال وانا في شارع المك نمر قريبة من الاستوب جوار الكبري اول مرة ما اربط الحزام مش بس كده جاني اتصال من زميلة من زمن الجامعة).

اول ما شفت اسمها فى الموبايل قومي يا بت ردي عندنا حركة ناس الدفعة بنتكلم مع بعض بالفرنسي نوع من انعاش الذاكرة والونسة بالفرنسى غير اصله كل الدرسو فرنسى ما اشتغلو بيهو طوالى العسكرى خبط علي القزاز نزلت القزاز وانا لسة بتكلم بالفرنسي لحدى ما انهيت المكالمة قال لي الرخصة طبعا انا مخلوعة ومنططة عيوني فجاءة كده رديت ليه بالفرنسي برضو je ne comprend pas ce que tu veux).

يعنى ما فاهمة انت عايز شنو بعد شوية جاء عسكري تانى بصلف ظاهر دى مالها العسكرى الاول قال ليهو دى اظنها خواجية ما بتعرف عربي، رد الثاني خواجيه طيب مالها ما بيضاء ودى هسى ذاتها نزبلها كيف قربت اقول ليهو زبالة يا يمة اليغطسوك فيها(عرفت بعده كده مصطلح زبالة يعنى رشوة)

وأضافت دعاء بحسب ما قرأ محرر موقع النيلين حكايتها (بصراحة عجبتنى قصة خواجية دى وكل ما يجتهدوا عشان يقولوا لى ادينا الرخصة بس ماسكة ليهم فى نو اربك نو اربك العسكري بقى يضرب راحة يده باصبعه المهم عملت فيها انو وصلتنى فكرة انو عايز الرخصة فتحت الشنطة ومديتها ليهو لو كان ركز شوية فى الاسم الرباعي دعاء احمد محجوب الكارب والاهم من كده خانة الجنسية سودانية).

(العسكرى بحاول يفتح الباب عشان امشى اقابل الضابط هو يفتح وانا اقفل في الباب اتلم الباعة الجائلين والناس الماشة حصل زي تجمهر من هناك جاء الضابط شاب عندو نجمتين فى كتفه سال دى مالها العسكرى رد ما رابطة الحزام وبتتكلم في التلفون خو اجية ما بتعرف عربي ودى رخصتها يا سعاتك).

بقت مشكلة الضابط يركز في خانة الجنسية بالرخصة اكبر قال بانجليزية من وين انت رديت فرنسا برضو بانجليزية سالنى بتتكلم انجليزي رديت وى وى نعم نعم بالفرنسى يعنى اجتهد ما وسعته اللغة الانجليزية علي احترام قانون البلد الانا ضيفة فيه انجليزيه ما كعب بس ما بعتنى بالقرامر وتصريف الافعال رجع لى الرخصة وقطع الشارع رجع مكان عربية المرور.

انا اصلا كنت ماشة وزارة الخارجية التوثيق يعنى مفروض الف شمال على شارع الجامعة العسكريين بقوا واقفين على الرصيف الفاصل بين الشارعين اول ما فتحت الاشارة البتودى على الكبري قلت بصوت عالي ليهم سودانية مية المية وجرى قلبى مقطوع كل مرة اعاين فى المرآيا خلفي من الخوف رجعت بيتنا بكبرى الحديد وخليت التوثيق.

الخرطوم/معتصم السر/النيلين


‫22 تعليقات

  1. قال رسول الله ص من غشنا فليس منا

    أصبحنا في زمن يتفاخر فيه الناس بخداعهم وغشهم واصبح المخادع “مفتح”
    والشخص الجادي “عوير”
    غايتو بس اللهم اررقني الزوجة الصالحة والذرية الصالحة وما اصعبهما في هذا الزمن

  2. البنية دي فعلاً شكلها فرنسية سمراء .. الله يديها العافية

  3. قصة طريفة… المهم في الامر ان كل تفكير العساكر في تزبيل السائق

  4. المشكلة في الناس البتصدق اي قصة مكتوبة حسع دا كلام بصدق ولا بدخل العقل بلاش اشانة سمعت رجل المرور السوداني نعم البعض او الكثير منهم لايجيد الفرنسية والانجليزية ولكن لايمكن ان تنطلي عليهم مثل هذا الخدعة بأن يستلم الرخصة وتتم إعادتها لكي مرة اخري………………..!!!
    إلي إذا كان لايعرف حتي الغة العربية …………؟

      1. شكراً لك اخي وعذراً علي هذا الخطأ والى لقاء في غلطة أخري …………..!!

      2. نسيت تصحح ليهو (سمعت) دي التاء المربوطة و (لكي) دي بدون ياء و (الغة) (تكتب اللغة) و (حتى) بالألف المقصورة ما بالياء !!! شوف يا استاذ أبوحميد يا تصحح زي الناس يا تخلي التدريس ههههههههههه مع الاعتذار للرقراق !

  5. ياخ انا ما عارف في شنو كل مره تجي ناطه لينا واحده موهومه ومخلوعه وعايزه تفكها فينا قبل كم يوم واحده بقي تحكي لينا كنت عايزه ابقى شرطي مرور وكنت راكبه عربيتي ومشغله تكييف العربيه ويااااي جو سخانه مبالغ ياخ انا في مكيف العربيه سخنت وماعارف شنو وشنو برتنا بري قدتنا قد ،،، دي هسي كمان المفعوصه التانيه دي تجي نازله فينا اتصلت بي واحده واتكلمت معاها فرنسي وجاني بتاع مرور ولعبت عليهم وما عارف شنو ياخ قومي كدا ان شاءالله يلم فيك بتاع مرور يفرمت ليك باقي الفرنسي المعشش في راسك دا ويطيروا ليك يامخلوعه وانتو يا صحفيين ما عندكم موضوع تباروا الاشكال دي وتكتبوا لينا عنهم في حاجات فارغه وما ليها اي اهميه يعني هسي ده كلووووووووووا المواطن ولاّ البلد بتستفيد شنو من العباطه حقتم دي ؟؟؟؟؟؟؟؟!!!!!!!!

  6. دى اعتراف رسمي منها مفروض يقاضوها بجريمتين المخالفة المرورية والاحتيال.

    1. زايد جريمة إشانة سمعة لشرطة مرور عموم السودان والتشهير لكن للأسف مافي شئون قانونية تتابع مواضيع زي دي.

  7. احييك…غش شنو ياخ اذا هم بيشيلو رشوة يدخلوها جيبهم..احسن ما فعلت.

  8. والله يا محمد ولد زي ما قال اخونا ما عندك اي موضوع وعايزة توري الناس شكيلك الذكوري دا بس . الله يقطع طاريكي .

  9. الإعتراف سيّد الأدلة بموجب هذا المقال تم فتح بلاغ تحايل بواسطة ضابط وأفراد شرطة المرور بنقطة إرتكاز شارع الملك نمر ضد المدعوة دعاء احمد محجوب الكارب وذلك بشرطة الخرطوم شرق.. وسيتم إجراء اللازم حيال ذلك.