محمد عبد الماجد

وقعة الموبايل الجديد زي هدف التعادل


عباس ود السمك الكبار – ما عندو اي علاقة بالكورة.
ما فاهم فيها اي حاجة.
يوم مباراة الهلال – بتلقوه واقف في كشك الباسطة.
تقول ليه يا زول علاقة الكورة بي الباسطة شنو؟.
مالك؟.
الحاصل عليك شنو؟.
يشندر عيونو متل (جوز الموية) ويقول ليك يا زول احسن نتلم من بدري ..الهلال الليلة لو غلب ما بنلقى لينا باسطة.
دي علاقتو بالكورة.
دا فهمو في الكورة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عباس ود السمك الكبار ..قالوا ليه ريال مدريد غلب برشلونة ..بنزيمة ورنالدو كشحو ليك برشلونة زي (موية الغسيل).
رونالدو دا تقول عندو (تار) مع برشلونة.
الزول (المغصة) عاوزه تشقو.
عباس ود السمك الكبار – قال ليهم ناس برشلونة مالهم كمان؟…عندهم (جوهرة زرقاء) برضو – وإلّا بركبوا ليهم في (كشافات)؟.
الزول دا بعمل فيها ما فاهم.
وبعمل فيها ما عندو علاقة بالكورة.
لكن فاهم اي حاجة.
عارف اي شيء.
لكن ما بحب (النضمي) الكتير.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
يوم داك لقيت عباس ود السمك الكبار في عيادة طبيب العيون.
قلت ليه يا عباس ود السمك الكبار ..انت مالك هنا؟..عيونك (الدقاق) دي عاوز تشوف بيهم شنو؟.
والله عيونك دي اشتغلن لمن فترن.
عباس ود السمك الكبار قال لي : بدور اشوف بيهم (زمن المباراة) – ناس التلفزيون ديل بيكتبوا لينا زمن المباراة لو ما قربت للشاشة ما بتعرفو.
ونحن اعصابنا كعبة.
اي كورنر يرفعوه بنعاين في (الدقيقة كم؟).
طبعا في ناس بتعرف القون بجي بي زمن المباراة.
يعني لو كان في كورنر في الدقيقة 37 ..اكيد ح يجي منو قون.
لكن اذا كان الكورنر في الدقيقة 20 ..اقنعو منو ..ح يطلع ضربة مرمى ساكت.
في علاقة بين القون وزمن المباراة.
الحاجات دي كان بعرفها الرشيد بدوي عبيد.
وقت يقول ليك الدقيقة 43 من الشوط الاول ..اعرف الهلال ح يجب ليه قون.
حليل اقوان الدقيقة 43.
دي دقيقة كان متخصص فيها الريح كاريكا.
الريح كاريكا لي وقتنا دا لو لقى حامد بريمة واقف في الدقيقة 43 بجيب ليه فيه قون.
ولا بتلفت.
اصلو الدقيقة 43 دي لو مرت عليه في السوق الشعبي بجيب قونو – بجيب قونو.
ولا بجامل في الموضوع دا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عباس ود السمك الكبار ..قال لي انت عارف احر حاجة في الدنيا شنو؟.
اكتر حاجة سخنة؟.
قلت ليه شنو؟.
قال لي يكون عندك (شافع) صغيّر كدا ..الساعة والتانية يقع ليك من السرير في (البلاط).
والله ما في احر من تشوف (جناك) بيقع على رأسو من السرير في البلاط.
عباس ود السمك الكبار …كل يوم كان بيعمل ليه مشكلة مع زوجته في الموضوع دا.
كل ما يقع شافعو (حسن حجر) من السرير في البلاط – عباس ود السمك الكبار بعمل ليه مشكلة مع زوجتو.
الشافع من (الوقيع) الكتير ..رأسو بقى زي (صينية الغداء).
جربنة شديدة.
زي تربيزة اللحام.
المهم – عشان ما اطول عليكم في الكلام ..باقى (ناس الجوهرة الرياضية ديل بمشوا المطبعة).
عباس ود السمك الكبار اشترى ليه (موبايل جديد).
جلاكسي كدا.
عباس ود السمك الكبار ..يخت ليك الموبايل في الشاحن ويقعد يحرسو ليك.
لمن يشحن.
عاجبو عجب شديد.
نزل ليك (نغمات) في الموبايل ..واتبسط ليك من الموضوع.
بقى لا شغال بالغاز.
ولا الكهربة.
ولا السكر.
يومو كلو في موبايلو دا.
عباس ود السمك الكبار ..يوم شافعو (حسن حجر) لقى موبايلو في الشاحن طلعو..ابوه عاوز يلحقو الموبايل وقع منو في البلاط.
الموضوع دا ألم ليك عباس ود السمك الكبار ..ألم شديد.
وجع مبالغ فيه.
النوم طار من عيونو.
عباس ود السمك الكبار ..رفع ليك الموبايل ..وقبل على زوجتو ..قال ليها شوفي انا جاملتك اكتر من عشرين مرة في (وقوع) الشافع دا من السرير.
الشافع دا وقع قدام عيني مية مرة ..ما سألتك وما قلت ليك حاجة.
لكن الموبايل دا يمين يقع مرة تانية ..تمشي بيت ابوك طوالي – يعني عشان انا ما بسألك في (الشافع) تقومي توقعي (الموبايل).
اوعك.
كل حاجة ولا الموبايل.
زوجتو قالت ليه انا ذنبي شنو؟.
عباس ود السمك الكبار قال ليها ما تقولي لي ذنبي شنو؟…الموبايل دا مفروض تحرسيه زي (عيونك).
الشافع قلنا ممكن تنشغلي عنو…الموبايل البيشغلك عنو شنو؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
بعد 21 يوم من الكلام دا قابلت ليك عباس ود السمك الكبار في السوق ..قلت اشوف الحاصل عليه شنو؟.
وقفتو في نص السوق ..وقلت ليه يا عباس ود السمك الكبار ..اخبارك شنو؟.
عباس ود السمك الكبار ..قال لي قبل كدا انا قلت ليك ما في احر من وقعة الشافع في البلاط.
خاصة لمن يكون نايم ويتقلب ويقع على رأسو.
لكن يمين بعد ما اشتريت لي موبايل بي (4) مليون جنيه …ما شفت احر من وقعة الموبايل.
عباس ود السمك الكبار شال ليه نفس عميق كدا ..وقال لي يمين وقعة الموبايل الجديد زي هدف التعادل…تقطع القلب.
ما قدرت اقول ليه اي شيء.
عشان مجرب وقعة الموبايل.
اقول ليه شنو عاد؟.
مجرب وقعة الموبايل.
ومجرب هدف التعادل.
الاتنين ما في اسخن منهن.
الجهال – الله بشوفهم.
ما بتجيهم اي عوجة.
منطق والله.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
غايتو عباس ود السمك الكبار عندو منطق بعرفو براهو.
…………
و
رغم المواهب التى يمتلكها السودان في جانب الشباب والصغار – إلّا ان منتخباتنا في تلك المراحل دائما تخرج من التصفيات الافريقية.
تخرج تلك المنتخبات لأننا لا توجد لنا منافاسات لتلك المراحل.
ما في لاعب يمكن ان يقدم شيء من غير ان يكون مشارك بصورة منتظمة في المنافسات.
الاتحاد العام هذه المرة قام بنفسه بمنع قناة النيلين من نقل المباريات.
الحمدلله جات منكم.
الاتحاد العام ينوى ان ينهي عقد الرعاية.
غايتو عندكم دوري ممتاز بتعرفوه براكم.
ايام كمال شداد ..ما كان في حاجات بالشكل دا.
الحاجات دي ظهرت مع ناس معتصم جعفر واسامة عطا المنان.
مثل هذه الاشياء سوف تنتهي من الدوري الممتاز.
هلال كادوقلي يتقدم نحو المقدمة بصورة ملحوظة.
وشرف الدين احمد موسى المدير الفني لهلال كادوقلي يحدث (نجاحات) كبيرة.
شرف بدأ مع هلال الابيض.
وجاء وكمل نجاحاته مع هلال كادوقلي.
السر اذن في المدير الفني.
النسور الذي خسر امام الاهلي شندي بسداسية كان قد تعادل مع المريخ العاصمي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….
السيدة (ل) – ونستنا كلها عملتيها لي (سد النهضة)…انا مالي ومال سد النهضة.
وقرّط على كدا.


‫3 تعليقات

  1. انت بس تسمع بي أهلي شندي اللي غلب النسور ستة !، ما سمعت بي حاجة اسمها (أهلي طرابلس) ؟؟ ما أدوكم ليهو ؟ و لاّ كنت غائب !!! و لاّ عامل رايح ؟ غايتو (دنس) غايتو !!

  2. سخفى ركيك وماعندو اى موضوع الظاهر ضربةالثوار عاملةليهو لفة راس

  3. عايز تعمل فيها بابكر سلك وشابكنا عباس ود السمك الكبار يعني سلك يقول كان شفت ياوالينا الكلب ،قوم لف صحفي شنو انت والله صحي سخفي انت والعوير علي عمر اصحاب الجرايد الصفراء البايرة