زواج سوداناس

ما بين نسر فداسي وصقر قريش


شارك الموضوع :

> الزعيم اعد العدة لموقعة سطيف
> تيفو زي التيفو
> اولتراسات جاهزين مويه ونور
> وأسود المدرجات على أحر من الجمر في انتظار السبت الأغر
> حناجرنا فيها آكوله
> داير نهتف
> نزأر
> بالطول بالعرض مريخنا يهز الارض
> آآآي ده الشغل ده الشغل
> برانا برانا نشيل الشيله
> برانا برانا نسوي السيره
> وطق طرق طق طق
> سوداننا
> ايها الناس
> نريد من الشفوت خمسين الفاً
> شفت يسند شفت
> نقفل الدخل مليار دعما للمسيرة
> ونملأ الاستاد هتافاً يدفع المسيرة
> وشفوت الولايات المتاخمة والمدن القريبة ما بقصروا
> شارع مدني يشتاق لرايات الزعيم على الحافلات والبصات
> وشارع كوستي يشتاق لشفوت النيل الابيض
> كوستي ربك الدويم ناس لعوتة الكوة القطينة ود الزاكي يلحقنا وينجدنا
> وبهناك لي كوستي
> تندلتي العظيمة وناس العليقة وانت ماشي لي الابيض
> شفوت الجبل وما حوله
> ناس الماحي الشفت الكبير
> يشتاق الشارع للتاكسي البيجو يا ماحي
> وشريان الشمال بجيب شفوت الشمال
> شلوخ لا ورا ورايات ترفرف لا قدام والبلح زوادة
> ومن عطبرة وام الطيور والفاضلاب وانت ماشي شندي وما حولها وللجيلي
> الشارع يتشرف بكم جميعاً
> شفوت كردفان بي طريق النهود ومن كادوقلي والدلنج حضوركم يقوينا
> اما شفوت دارفور بولاياتها الخمس
> معقل المريخاب الفاشر نيالا كاس زالنجي كتم وانت ماشي للضعين
> حضوركم يشرفنا
> البلد دي لازم تتقلب قلب يوم المعركة
> البلد بلدنا ونحنا اسيادها
> ومن غيرنا يهدي لهذا الشعب معنى ان يعيش وينتصر
> بل من غيرنا اهدى لهذا الوطن العزيز سجلاً بلوح الشرف الافريقي
> عملناها قبل كده وحا نعملها تاني
> كعب العدم واحساس الندم
> نتوقع من ناس روشا وفطومة مساندتنا من منطلق وطني وقومي
> بالذات وهم يدعون الوطنية كما ظل يردد خالدونا دوماً
> ورونا وطنيتكم يوم السبت يا خالد
> قدموا السبت يا روشا عشان نرد ليكم الاحد في سيكافا
> بطولة سيكافا لأندية العالم
> البطولة التي تغيرت من بطولة المجاعة لبطولة ابطال الكون
> اقيفوا معانا لنثأر لكم من سطيف الذي هربتم منه قبال سنين بدون خجلة
> ولو ما دايرين تقيفوا معانا
> اقيفوا ارجوا المواصلات
> المهم
> ممكن تتفرجوا في كورتنا يا فطومة بدون تقيفوا معانا
> سامحين ليكم
> غيروا حبة من النيلين دي
> سنة حا تصاقروها
> الله ريحكم من ديكودر البي ان سبورت
> النيلين دي بي دش بتاع زمان داك بتجي
> ارضي بتجي
> بي ركشة بتجي
> بي كرعينا بتجي
> غيروا منها حبة سامحين ليكم
> عاملين كشافاتكم اللمباتها زي القراد في اضان الكلب دي
> وانا اقول الكلاب ديل بقن ما بقردن ليييه
> المهم
> اليوم نصلي جمعتنا ونزبط دعواتنا ونجهز للسبت
> دايرين نجي بالشعار بقدر الإمكان
> دايرين ننافس بعضنا في فنون التشجيع والتفاني
> دايرين نعود لمنصات التتويج الإفريقية تاني
> قلنا نعود ما قلنا نصل
> نعود لأننا كنا فيها وعليها
> لكن لما نقول نصل بنكون يا دوبك بنتحسس الخطوات عشان نصل اليها ونصعد عليها
> نحمد الله كنا عليها وحا نعود اليها
> مازي ناس روشا
> عاملين كشفاتكم الزي البتاعة البعلقوها للباعوض في السقف وفيها لمبة بنفسجية ديك
> اسي عليكم الله ديل كشافات تقابلوا بيها الككو التنزاني؟
> المهم
> فطومة اختي تناولت بالمقارنة الوالي وكردنة
> وقالت المقارنة معدومة
> وفي دي صدقت
> وقالت في ما تعني ان جمال صنيعة حزب وحكومة
> ونعرف ان فطومة في نفس الشجرة مع جمال
> بل وجاهرت بانها شجرة
> في الحتة دي تكون نست انها شجرة
> أه يا شجره يا نساية
> يعني دايره تقولي ان حزبك وحكومتك بصنعوا اعضاءهم بحق الشعب وعلى حساب الشعب؟
> ولا عايزة تقولي انك يا دوب عرفتي كده؟
> على كل صدقت يا فطومة في انعدام المقارنة
> مجنون من يقارن اسداً بفهد
> ومخبول من يقارن نسر فداسي بصقر قريش
> اما عن عصامية كردنة
> فنتفق معك على الجزء الاول في تعريف العصامي
> وهو الانسان الذي يكون في حالة عدم
> وكردنة شأنه شأن غيره ابن موظف دولة محترم
> وبالتالي لم يرث المزارع ولا المصانع ولا طواحين الهواء
> ثم بعد ثم دي بنختلف في تعريف العصامي
> لأن الفقرة دي تعريف العصامي عندنا ليهو اوصاف تانيه حامياني
> لذا نسر فداسي لا يشبه صقر قريش ولا ابو لهب زاتو
> المهم
> كل القوة القلعة جوه
> ايها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> ليييه هم بجوا يمتحنوا هنا عندينا!!!
> مالاقين اجابة تقنعنا يا والينا
سلك كهربا
ننساك كيف والكلب قال ما ضروري تلقي اجابة عن كل سؤال.. بس الضروري تطرح سؤالك على كل مسؤول ويحلها الحلال
والى لقاء
سلك

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *