مافيش هزار.. الحصة ضرب نار!!

* لا وقت للحديث عن أموال ومستحقات.
* لا وقت للانصراف عن الهدف الرئيسي بما سواه.
* عندما يتهيأ الجنود لمعركة حاسمة فإنهم لا يشغلون أنفسهم بالتفكير في تعييناتهم، ولا يهمهم مأكلهم وملبسهم، بقدر ما ينحصر كل همهم في تحسس سلاحهم، وتجهيز ذخائرهم.
* الأصبع على الزناد، والخد على الدبشك، والعين في (خرم النشنكة)!
* لا وقت للهزار.. الحصة (ضرب نار)!
* لذلك لن نخوض مع الخائضين في لجة الجدل المزعج حول مستحقات اللاعبين.
* ولن نشغل أنفسنا بأي شيء يحجب عن عيوننا هدفنا الآتي.
* العنوان الأبرز للمعركة: (وفاة سطيف).. لحدي هنا ونقيف.
* ليس هناك ما يمكن أن يشغل أي مريخابي عن تجهيز نفسه لمساندة فرسانه.
* عندما يتفرغ المئات من الشباب الحمر الميامين لتجهيز الملعب، وتهيئة أكبر وأضخم وأجمل (تيفو) في تاريخ الكرة السودانية، ويدفعون ما يفوق طاقتهم ليوفروا لبقية الأنصار زياً فاقع الحَمَار يصبح الانشغال بالمستحقات من لغو الحديث.
* شباب في عمر الزهور، أمضوا الليالي الثلاث السابقة في التجهيز لأجمل لوحة، وسعوا إلى استكمال الفرحة.
* الآلاف من أنصار الزعيم، في كل قارات الأرض، جمعهم حب الاحمر، وضمتهم قروبات البركة على الواتس، دفعوا المال بكل عملات الدنيا، وحولوها إلى بقعة المريخ الجميلة، لتصبح زاداً للمجلس، وتعينه على توفير مقومات النصر للاعبين.
* الأموال التي حملها معه الباشمهندس أسامة ونسي رئيس المريخ إلى قاهرة المعز لم يدفعها قطب، ولا جادت بها أيادي الوالي الغالي كما تعودنا منه طيلة الأعوام الماضية.
* دفعها آلاف المحبين، وجادت بها أيادٍ جعلت ناديها شريكاً لقوت الأهل والأبناء.
* هؤلاء الأنقياء لا يحتملون الخذلان، ويستحقون أن يكافئهم رفاق راجي بأجمل انتصار، في أحلى ليلة.
* غداً نتجمع بالآلاف في قلب البقعة، لنمارس أجمل طقوس الحب الأحمر.
* غداً نستعيد ذكريات العام المنصرم، ونجدد عهود العشق مع أجمل حبيب.
* بكرة يوم الجنون المحبب.
* وبكرة (يوم المهرجان)!
* النتيجة تهمنا، لكنها لا تؤثر على معدل انتمائنا للزعيم.
* جهزنا للنصر عدته، ووفرنا للفريق حوبته، بجمهور كموج البحر، استحق لقب زلزال الملاعب.
* غنوا معانا.. غنوة العيد والفرح. (بكرة) يوم ميلاد فرحنا.
* هللوا وغنوا يا صفوة.
* واهتفوا وتقافزوا وهللوا وجددوا عهود المحبة مع من يستحق المحبة.
* أضربوا أرضية طابق شاخور بالأقدام، لتثير أكبر جلبة.
* الحصة (ضجة إزاج)!
* زلزال الملاعب حاضر يا جزائر.
* جماهير المريخ سلاحه الأفتك، ودرعه الأقوى.
* اللاعب رقم واحد، في فرقة الرعب الحمراء.
* المريخ.. ما أجمل الاسم وما أحله رنينه الحلو في آذان العاشقين.
* أغداً ألقاك؟
* نعم سنلتقي غداً بحول الله في رحاب الرد كاسل.. لكن أفئدتنا لن تخشى حرارة اللقيا، ولن توافق الراحل المقيم الهادي آدم في ما قاله للست: (يا خوف فؤادي من غدٍ)!
* خوف مافي.. يا الهادي!
* لكننا سنجاري شاعرنا المبدع في بقية أبيات قصيدته التي ملأت الدنيا وشغلت الناس: (أغداً تشرق أضواؤك في ليل عيوني؟ وغداً تأتلق الجنة أنهاراً وظلا.. وغداً ننسى، فلا نأسى على ماض تولى.. وغداً نسمو فلا نعرف للغيب محلا، وغدا للحاضر الزاهر نحيا ليس إلا، قد يكون الغيب حلواً، إنما الحاضر أحلى)!
* أنت يا مريخ يا جنة حبي واشتياقي وجنوني.. أنت يا قبلة روحي وانطلاقي وشجوني.. أغدا ألقاك؟
* سيلعب المريخ في ملعبه.. وبين أهله.. ويتمتع بدعم جمهور كموج البحر لا يتأخر عن نصرة فريقه ليحقق أعلى الدخول في كل البطولات.
* زلزال الملاعب سيكون حاضراً في ليلة الغد الجميلة.. ليجمع بين الصفوية.. والأغلبية!
* سنأتي لنؤدي الواجب مع رفاق راجي، ونترس خزينة الرشيد الطاهر بالمال.
* نرعب الجزائريين، ونحصد نقاطنا الحلوين!
* دور المجموعات جاك بلا!!
* (يلا ندشدش كم مليون)!

هذي آخرتها؟

* مشاركة الزعيم الإفريقية شغلتنا عن متابعة مباريات البطولة المحلية.
* عقولنا مشغولة بمعسكر موفنبيك، لذلك لم نتابع مباريات الممتاز.
* بعد العاشرة مساء أمس اتصل بي أحد الأصدقاء، وهنأني بفوز النيل شندي، ففرحت وسعدت بانتصار المؤسسة، النادي الذي أحبه، ثم سألته، مبروك والله، لكن النيل غلب منو؟
* قال لي: كيف ياخ، معقول ما عارف؟ النيل غلب الهلال!
* قلت ليهو: يا سلااااااام، الفوز على هلال الجبال يفرح، لأنه الأيام دي طالع في الكفر، والنيل نتائجه كانت سيئة للغاية، واتغلب كتير، عشان كدة بقيت ما بتابع مبارياته، أها.. فاز علي هلال كادوقلي كم؟
* قال لي: لا ياخ، ما هلال كادوقلي، إنت برة الشبكة وللا شنو؟
* قلت ليهو: قلت ليهو، أيوة صحيح، أنا برة الشبكة وقلت ليك ما متابع، لكن أوكي، تمام، معناها النيل غلب هلال الفاشر، برضو مكسب، غلبو كم؟
* قال لي: لا ياخ، هلال الفاشر بتاع شنو كمان، ما هلال الفاشر!!
* قلت ليهو: معليش تعبتك معاي، خلاص معناها غلب هلال الأبيض، وده انتصار ممتاز ومؤثر، على فريق قوي، اها غلب أولاد التبلدي كم؟
* قال لي بي زهج، ما هلال التبلدي يازول، هلال الأبيض بتاع شنو؟
* قلت ليهو: طيب غلب ياتو هلال.. جهجهت باكاتنا!
* أهاااا.. أوعى يكون ضرب هلال الأكاديمية والإضاءة الفسفورية والثورة الليبية؟
* معقول هلال الكشافات تاني اتكشف؟
* الصوملة انتقلت لي أهلنا ودخلت بلدنا ونحن ما جايبين خبر؟
* اتصوملو في دار جعل؟
* هذي آخرتها؟
* صواميل القاري عرفناها، حتى المحلي في المحلي الصواميل برضو طارت؟
* أمال فين الشباب يا هلالاب؟
* يا جماعة الخير روقوا المنقة، وما تقلقوا ولا تستعجلوا النتائج!!
* الوصيف بخير، والهلال عندو أولويات.. والأولوية حالياً لتركيب الكشافات!!
* الغلب ملحوق، والكشافات الجديدة عندها فترة ضمان محددة!
* لو ما اتركبت سريع صامولتها تاني بتطير!
* تركيب صواميل الإضاءة الجديدة محتاج تركيز شديد!
* التركيز في الكورة والصامولة مع بعض مستحيل!
* بعد الانتهاء من تركيب الصواميل الكاردينالية، وإضاءة الكشافات الألمانية.. الأولوية للأكاديمية الكروية!
* الأكاديمية.. رابع أهم حاجة في الاستراتيجية الكاردينالية!
* وبعد الأكاديمية الأرسنالية الكاردينالية الأولوية لإخلاء الدكاكين الشرقية!
* الدكاكين الشرقية دي مهمة شديد في الاستراتيجية!!
* معقولة بس النادي بمشي بدون أكاديمية ولا استراتيجية ولا خطة ثلاثية؟
* (خطة ثلاثية دي من عندي)، وارد شندي!!
* ما علينا وما علينا.. لو النيل فاض بينا!
* بعد إخلاء الدكاكين الشرقية الأولوية لإخلاء الدكاكين الغربية!
* كورة شنو كمان البتتكلمو عنها حالياً يا ما عندكم استراتيجية ولا أكاديمية، ولا إضاءة فسفورية؟
* ما تستعجلوا.. كردنة راقد ليهو فوق راي!
* هلال 2017 بدون أجانب، مع أنو العشري أكد أمس أن كردنة وعده بضم ثلاثة أجانب جدد للموسم المقبل!
* الموسم المقبل موسم 2017!
* الأجانب جايينكم متنكرين، ويمكن يجب معاهم شيبوب، تبع الأكاديمية!!
* العشري شن عرفو بي شيبوب، وطني وللا أجنبي؟
* كل حاجة بي وقتها!!
* الأولوية الحالية للأكاديمية.. والجوهرة الكاردينالية!
* شيلوا الصبر يا هلالاب، وما تستعجلوا الألقاب!!
* أهم حاجة تكتمل الجوهرة الكارينالية، وتتركب الكشافات الصامولية، وتولع الإضاءة الفسفورية، وبعد داك تاخدوا تلاتة من نيل الشنداوية!!
* نقيف هنا ولا نمشي كبوشية؟

المؤسسة في الملعب

* (يلا شندي نزور الحبايب، ناس النيل الضربو الوصيف.. ثلاثة فيني وضاعوا الشباب.. فوق شباكي مساوي غاب.. لي سيكافا أنا بكتب خطاب.. حاضنو صفري اليوم في عتاب.. ياخ شندي مدينة وجمال.. فيها تب انضرب الهلال.. من سمعت أنا كردونة قال.. ضاع منامي وتابع الخيال).. أبو بكر عبد الله (بيكو).
* نحب النيل شندي، المؤسسة النادي العريق، صاحب التاريخ التليد، المدرسة التي خرجت أفضل الإداريين وأميز اللاعبين.
* نحب النيل، لكننا لم نتابع مباراة الأمس لأن نتائج الفريق كانت سيئة جداً في المباريات الأخيرة.
* خسر النيل ثماني مباريات، وانهزم في آخر مباراة أمام أهلي شندي، وفي آخر خمس مباريات متتالية في الدوري لم يسجل أي هدف، ولم يحرز أي فوز في آخر تسع مباريات دورية!
* انهزم أمام الأهلي شندي في الجولة السابقة 3 صفر، وخسر قبل الأهلي من الرابطة كوستي ثلاثة صفر، وخسر أمام أهلي مدني اتنين صفر، وانهزم أمام مريخ نيالا واحد صفر، وتواضع أمام هلال كادوقلي وخسر ثلاثة سفر، وانهزم أمام الخرطوم واحد صفر، وأمام المريخ بالنتيجة نفسها!
* آخر فوز سجله النيل حدث في الجولة الرابعة للدوري، ونحن حالياً في الجولة 15!!
* خسارة الهلال أمام النيل تعني أن المدعوم وصل مرحلة متأخرة جداً من التدهور!
* حقيقة خطيرة: هل تعلمون أن الهلال لم يحقق أي فوز في تاريخه بالدوري الممتاز، داخل مدينة شندي؟
* هل تعلمون أن النيل فاز على الهلال بالثلاثة مرتين؟
* مرة بثلاثية إسماعيل أرفع وعبد المحمود الخواجة، ومرة بثلاثية أمس؟
* الرمادي ستكون أفضل حالاً من العرضة الشمالية في الأيام المقبلة.
* ودير الزور بالنسبة إلى المعبرة ستكون مثل باريس!
* قال أيه: (الهلال نازل بالتقيل.. صعبة عليك يا نيل)!

آخر حقائق

* بكرة مهرجان المحبة يا صفوة.
* سنأتي زرافاتٍ ووحداناً من العاصمة والولايات رافعين الرايات، لأن راياتنا لا تعرف التنكيس!
* سنأتي من كل حدبٍ وصوب، مرتدين الأحمر أشرف الألوان.
* سنأتي لنحتفل عدة مرات.. ونزف الفارس إلى دور المجموعات!
* سنأتي لننتصر بطريقة (دق القراف).. عشان الجُمال تخاف!
* سنحضر لنملأ الطابقين.. ونشهد مريخاً يكيل العين!
* دقر يا عين!
* شباب الأولتراس.. جمال وحماس.. غيرة وإحساس.
* شباب الأولتراس جاهزون لدعم الزعيم.
* المريخ عراقة مائة عام من الروعة.
* مريخ ماجد وبشرى بشارة.. في انتظار الإشارة.
* مريخ شرفي وشاخور.. بعون الله منصور.
* مريخ أبو زيد العبد وعصمت معني.. بكرة ليهو نغني.
* مريخ سانتو وكمال.. يذلل المحال.
* مريخ سامي ودحدوح.. يرد الروح.
* توعد رئيس السطايفة حسان حمَّار الزعيم بالهزيمة في عقر الدار!
* يا حمَّار.. المريخ نار.. حلاة وحمار!
* الرد ما تراه لا ما تسمعه!
* العقرب في الملعب.
* ورمضان في الميدان!
* والمالي.. يفلق ويداوي.
* خط هجوم ناري.. يحرق السطيفاوي.
* الشباك متروسة وسالمة، بالسالم جمال.
* الزعماء مشغولون بالوفاق.. والمدعوماب مشغولون بكاميرات (آدم ويلكليكس)!!
* من دخل دار الزعيم فهو آمن.
* ومن دخل دار كردنة فهو مرصود بالكاميرات!!
* فرق يا إبراهيم.
* الأهل والحبان بقرية (أم كيعان) يطلبون أغنية (ويلكليكس آدم) ويهدونها للأحباب في قرية المدعوماب، شمال حلة الثوار، حي الصفيراب، مع رجاء التركيز على كاميرات كردنة، للمحافظة على الصفر الدولي!
* غداً بهرجة في الأرض والفضاء!
* نور وزهور وعطور وفنون وجنون.
* أنا من صفاك مسحور!
* بكرة الأعصاب بتكون متوترة.. الوصية بالمهلة يا صفوة.
* ما فينا صافرات استهجان، وليس لدينا ما يدفعنا إلى استعجال النصر.
* الما بقدر يشجع الفرسان، ينقطنا بي سكاتو!!
* تذكروا أننا قهرنا عملاق باب سويقة (الترجي) بهدف وحيد وتأهلنا.
* الهم حقاً أن ننتصر، ونحافظ على نظافة شباك جمال سالم.
* والأهم أن تتدافع قروبات البركة لشراء بطاقات مقصورة العمدة الفاتح المقبول، طيب الله ثراه.
* جمهور المريخ.. (سلطان الإبداع.. وملك الروعة)!
* ليلة الغد، موعدنا مع عرض جديد لفيلم (المبدعون في الأرض)!
* مريخاب أحباب أحباب.
* على جماهير الهلال ألا تغضب ولا تثور ولا تنفعل!
* نتيجة الأمس أيجابية!
* الهلال سجل هدفين خارج أرضه.
* والهدف خارج الأرض بي هدفين!
* يعني النيل مضروب منكم أربعة تلاتة!
* شفت الحساب كيف يا وصيف؟
* يا الرشيد هلالك تمام شديد، ونحن ما شفنا الكورة، إن شاء الله قدرتو سجلتوها بي كاميرات كردنة؟
* قالوا الأرباب برضو راجع ليكم بي كاميراتو!!
* ماشة معاكم دبوسة في موزة يا صفوة!
* غنينا أمس: أجرِ يا نيل الحياة، لولاك ما كانت حياة!
* وغنينا اليوم: (أغداً نلقاك)!
* غداً بحول الله نغني: (هذه ليلتي وسر حياتي)!
* آخر خبر: صدق صناجة المريخ حامد المحينة حين قال: (هو الفن لا سحر ولا عجب.. ذا المريخ سُرَّ القوم أم غضبوا)!