لم ننتصر على (الامل) بل على (الظروف والاحباط والفهود)

في شارع حلتنا – الهلال لمن يكون منتصر ..البيوت كلها ابوابها بتكون فاتحة.
والشفع (فرحانين) كدا من غير مناسبة.
قبل ما يعرفوا النتيجة بتحس بي فرحتهم.
والباسطة في التلاجة تلقاها فاتحة خشمها.
والطحنية في الدكان من غير ما تطلبها بتقفز في (الميزان).
انتوا قايلين (السكر) دا طار السماء ليه؟.
الموضوع ما عشان رمضان باقى ليه 48 يوم.
هسع تلقى واحد فيكم قال لي 49 يوم ما 48 يوم.
يعني بقت على اليوم.
السكر طار السماء عشان مستوى الهلال الايامات دي ما تمام.
الكورة بقت (مسيخة).
وعشان طلعنا من دور الـ 32.
السكر طار.
والدولار بقى ما بتلحق.
الهلال طلع من البطولة الافريقية – والجنيه طلع من السوق.
في واحد من ناس الحلة – قال لي والله (الكاردينال) دا طلع رجل اقتصاد فعلا.
قلت ليه كيف الكلام دا؟.
قال الزول دا قبل ما الدولار يصل (14) جنيه ..اتخلص ليك من المحترفين.
دي ما بعملها زول ما خبير في المال.
الزول دا نحن ساكت قمنا عليه.
مجلس المريخ هسع مع الدولار الذي وصل الى (14) جنيه ..مرتبات كوفي واكرا وجمال سالم وتراوري وسالمون والكريم الحسن إلّا يدفعوها ليهم (سمك).
طبعا ما في علاقة بين السمك والدولار – لكن ناس المريخ ديل بعملوها ما فارقة معاهم.
عليكم الله هسع الكريم الحسن دا (دولار) بدفعو فيه.
والله الزول دا (بر) الاثيوبي كتير عليه في الظروف التى تمر بيها البلد.
امس التلفزيون جهجهنا…ونحن برانا مجهجهين ..واعصابنا ما بتستحمل.
والله العظيم ما بنستحمل اي (تعادل).
غايتو لو الهلال اتعادل في عطبرة ..كان الدولار وصل 20 جنيه.
والسكر كان إلّا (صلايب).
حكمة الله السكر زمان كان بالرطل – هسع في الزمن الصعب دا بقى بالصليب.
الله يحفظ الناس ..ويشيل منها الضجر والضيق.
الله ينصر الهلال دوما وابدا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
مباراة الولايات زي (امتحان الرياضيات)..توترك ..وتخليك تطلع وتدخل وتعاين في الزمن.
تقيف في الباب.
وتعاين بالشباك..زي الرايحة ليك حاجة.
ومن غير ما تشعر ترفع ايدك للمراقب وتقول ليه عاوز موية.
تشرب من غير ما تعطش.
زمان كان قدر ما يغلبنا سؤال بنطلب (موية باردة).
ما عارف علاقة صعوبة الامتحان بالموية الباردة شنو؟.
يمكن بنطلب موية – حرقة في (المراقب).
والغريبة لمن يكون الامتحان ساهل ..ما بنطلب موية – مع ذلك لمن يسألونا من الامتحان بنقول (موية) بس.
علاقة (الموية) بالامتحانات شنو؟.
علاقة الموية بالكهربة عرفناها – الاتنين في فاتورة واحدة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
وكل ما تمر دقيقة – تقنع من النتيجة.
وتبدأ اكثر (عصبية).
تقول التعادل ما مشكلة.
المهم ما نخسر.
ووقت المباراة تكون ماشه على التعادل – الشوارع قدامك كلها تتقفل.
وتلفونك يطلع من الشبكة.
واي جرس تقول قون للهلال.
اي رسالة …عشم.
التعادل زي الخسارة – بتفقد نقطتين.
والله برضو مشكلة.
تقعد تحسبها كدا.
لكن عشان تقنع نفسك..وتصبرها تقول التعادل احسن من نخسر.
الهلال بيمر بي ظروف صعبة.
والادارة وضعت الفريق في منطقة خطرة.
ولاعبو الهلال نحن نحملهم فوق طاقتهم.
نهاجمهم…ويحملهم الجمهور ضغوط كبيرة – وفوق دا كل 40 يوم الادارة تجيب ليهم مدرب جديد.
وعاوزنهم ينتصروا.
فريق الامل ما ساهل.
وعطبرة معروفة – صعبة – وبلد الحديد والنار.
النقطة في عطبرة مكسب.
الله يشوفنا بس وننتصر.
عاوزين نمرق من الحتة دي.
محتاجين للانتصار.
عاوزين نفوز.
ما في احلى من انتصار الهلال.
خاصة وقت الانتصار يكون في ظروف صعبة كدا.
مدرب هرب قبل 48 ساعة.
وصراعات وخلافات في الساحة الهلالية.
وعاوزنهم بعد كل هذه الاشياء ان ينتصروا.
لاعبو الهلال ديل اكتر ناس بيصبروا.
ما قاعدين يشكوا من حاجة.
بيسكتوا بس.
كتير جدا – وفي عهد الكاردينال بتتأخر حوافزهم.
وتتأخر مرتباتهم.
ما قاعدين يقولوا اي شيء.
ما قاعدين يشكوا.
عاوزين يفرحوا قاعدتهم الجماهيرية بس.
حتى الانتقادات التى يمكن ان تتوجه لهم من الصحافة الرياضية – ما بقيفوا عندها.
همهم الاول ينتصر الهلال.
بيعملوا من اجل ان ينتصر الهلال.
عشان كدا يستحقوا الدعم والمساندة.
عطبرة في الظروف العادية صعبة.
عطبرة دي بي الكوكي صعبة.
بي النابي.
بي كامبوس.
عطبرة صعبة والهلال في المجموعات.
عطبرة كيف الليلة والعشري هرب.
والهلال خرج من البطولة الافريقية.
والامل بفتش لمثل هذه الفرصة.
كل هذه الاشياء ..جعلت مخاوفنا كبيرة.
كنا شفقانين على الهلال.
رغم ثقتنا الكبيرة فيهم.
عارفنهم – هم دائما يظهرون في مثل هذه الظروف.
بيسعدوا جماهيرهم حتى لو كان ذلك على حساب راحتهم واجسادهم.
ما قاعدين يقصروا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الاشكاليات والهزائم التى وقع فيها الهلال في الفترة الاخيرة ..اسبابها كلها ادراية.
القصور فيها (اداري).
اما لاعبي الهلال – فقد كانوا في كل الاوقات في الموعد.
في كل الظروف هم في الصدارة.
امس حرمنا التلفزيون من ان نشاهد عكسية سيف الدين مساوي.
العسكية التى سجل منها عمار الدمازين هدف الهلال.
لعبة من مدافع لمدافع.
محمد عبدالرحمن واصل في التألق.
بشه دائما كبير.
كاريكا غير الموازين.
يونس الطيب حافظ على شباكه.
ومبارك سليمان – عرف كيف يروض الفهود.
الهلال لم ينتصر على الامل فقط.
الهلال عاد (الامل).
انتصرنا على الظروف.
والاحباط.
والمشاكل.
والفهود.
اتنصرنا على كل العوامل التى كانت خصما على الهلال.
وكسبنا اغلى تلات نقاط.
نتمنى ان نكرر نفس السيناريو امام الاهلي عطبرة.
العودة من عطبرة بالنقاط الست ..هي اكبر دافع للهلال للانقضاض على الخرطوم الوطنى والمريخ.
نقاط عطبرة – ممكن تحل كل مشاكلنا.
وسوف تمكننا من صدارة الممتاز بفارق مريح.
لذلك يجب الانتباه للاهلي عطبرة.
يجب الانتصار عليه.
عاوزين (3) نقاط اخرى من الاهلي عطبرة.
جيبوها ..وتعالوا افتحوا ملف الخرطوم الوطني والمريخ.
الهلال يمكن ان يكون اسهل فريق يواجهه المريخ.
حقيقة المريخ سوف تظهر غدا.
بكرة ح نشوف المستوى الحقيقي للمريخ.
عشان كدا ما تستعجلوا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….
و
التسجيلات باقى ليها 22 يوم.
احسموا موضوع التسجيلات.
وشوفوا لينا موضوع شيبوب وصل وين؟.
جمال الوالي عاوز يعود بي شيبوب.
اعملوا حسابكم.
ويا الكاردينال الموضوع بقى ما بيستحمل ليه اي ضربة تانية.
ادعموا الهلال..وساندوا لاعبي الهلال فهم الافضل في الساحة الآن.
لاعبو الهلال يفتقدوا فقط (الاستقرار).
جماهير الهلال ما بتبخل عليهم بالدعم والمساندة.
فقط يحتاجوا لدعم المجلس.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
السيدة (ل) – من هسع بقينا نفكر في (العيد) – عشان عندكم جنس (خبيز).
وقرّط على كدا.