حضوراً معتبراً بالكاف

> امس كان الزعيم حضوراً معتبراً بالكاف > وكان غيرنا حضوراً بعطبرة > حاضرين قرعة الكاف بشرف > اسم الزعيم موجود بحاسوب الكاف > وبحثنا شمار ساي في كمبيوتر الكاف عن ناس كده ما لقيناهم > فرتقنا هارديسك كمبيوتر الكاف حته حته ما لقيناهم > خلينا الهار براها > والديسك براها > برضو ما لقيناهم > عمك قوقل قال لينا اسم زي ده غريب علينا > لوفتشتوا سنه في حاسوب الكاف ما بتلقوا اي طائر عبر البحر > لا ود ابرق موريتاني > ولا طاؤوس فلتكاني > ولا ام قيردون من بلدا تاني > الجماعة الفي وضع الطيران في الفيس ما بظهروا > نحمد الله علي وجودنا > وكي نظل فيها حتى عتبات التتويج > يجب ان نتعامل مع المرحله بجدية > معسكر مقفول ومنضبط > وحدة واتحاد جمهور > فتح المجلس احضانه لجميع فعاليات وتفاعلات وقيادات المريخ > احترام الخصم المغربي > عشان ناخد حمام مغربي منو نمشي للمجموعات نتراقش > الحمام المغربي منعش > والقشرة بعد الحمام المغربي انتعاش > المهم > تكريم قروب مريخاب اوفياء انقياء لرموز رابطة المريخ بقطر تكريم مخلصين لمخلصين > فدكتور المجمر وصحبه الميامين > بل كل مريخاب قطر يستحقون التكريم والاحترام لما ظلوا يقدمونه للزعيم > ولا غرابة > فهم يؤمنون بالكيان تقديساً > لذا يقدمون للكيان في ظل جميع المجالس دون فرز > يقدمون بسخاء وينتقدون بأدب > لان ادب المريخ كذلك > وهم ابناء المريخ الذين تربوا في كنفه > شكراً قروب مريخاب اوفياء انقياء > شكراً اولاد المريخ ورجالاته بقطر > ايها الناس > على المجلس ان يجمعنا على قلب رجل واحد > ونحنا لسه فيها لأننا اجتمعنا على قلب رجل واحد > ولو افترقنا آحاداً ما كان الليلة اسمنا في كمبيوتر الكاف > كنا نكون بنكابس في عطبرة > بمناسبة عطبرة > قالوا كان في كورة في عطبره قبل كم يوم اتأجلت لي امس > قالوا اجلوها عشان قالوا للفريقين اللاعبين الليلة مافي دافوري عشان في كورة في التلفزيون > كورة منقولة من الجزائر > اتفرجوا عليها عشان تستفيدوا > الدافوري ملحوق > المهم > الكشافات الشينات لسه قاعدات > الغريبه الشمالية الشرقية > قاعده علي الحديدة > لمبة ما فيها > بس عووووود > المهم > قابلني جواهرجي > جواهرجي طبعا هو الهلالابي المصدق قصة الجوهرة ومعجب بالكسكتة > روشا جواهرجي > وليد البشري جواهرجي > فطومة اختي بترينة جواهر > المهم > الجواهرجي قال لي بنتم الجوهرة في المواعيد الجديدة > قلت ليهو ذكرتني قصة المغترب > قالوا كسر بيت ابوهو ورحل ناس البيت بيت ايجار عشان يبني بيت ابوهو > قال لازم اربعة طوابق > اخوانو قالوا ليهو تلاته كفايه مافي داعي للبذار > قال ليهم لازم اربعة > الوالد والوالده في الطابق الارضي مع حوض السباحة > عشان كرعينهم ما بتطلعهم السلم > اخواتي في الطابق الاول > اخواني في الطابق التاني > انا في الطابق التالت > الطابق الرابع شقتين نأجرهم لزوم مصاريف الوالد والوالده > وسافر > يرسل في القروش يومي > ويضرب تلفون يومي > البنا وصل وين؟ > حفرنا الحفر > وصل وين؟ > صبينا القواعد > وصل وين؟ > البيم اتصب > وصل وين؟ > في القصة > علوها عشان الشارع مويتو ما تدخل البيت > وصل وين؟ > بنردم في القصة > بعد التلفون ده فنشوهوا > ضرب تاني > قلتوا لي البنا وصل وين؟ > قالوا ليهو بنردم في القصة > قال ليهم كفايه اعرشوا علي كده > الخوف يا جواهرجي كردنه يتصل من جوبا ويقول ليكم اعرشوا علي كده > كشافاتكم دي الا تأجروها لموقف امبدة الجمبكم ده > ايها الناس > قوتنا في وحدتنا > اتحادنا > قوة حرية ومجموعات افريقية > ايها الناس > ان تنصروا الله ينصركم > اها > نجي لي شمارات والي الخرتوم > كان شفت يا والينا > قدر ما اشتكينا > مصرف شارع العرضة طافح فينا > من كااااااك يا والينا > ولي كت كات طافح فينا > العفنة ما بتخلينا > والباعوض بستعرض فينا > والكافتريات وسط المجرى فاتحة علينا > السكات شيء ما بحل لينا > نتكلم ولا زول بسأل فينا > نمشي المقابر يعني يا والينا > ولا نمرق الشارع نشوف البحلها لينا!!! سلك كهربا ننساك كيف والكلب قرف مننا عشان ما بنقرف والى لقاء سلك