بريد بلدي

بريد بلدي وبريد ناسو..
أنا وأخواني حراسو..
بنكتب إسمو بالأمجاد.. نحقق نحن إنجازو..
نكبر كومو في التاريخ.. نكون في الظلمة نبراسو..
ندافع عنو بالأرواح.. نجز راس البيقول داسو..
بحب وطني وعليهو بغير.. وبرفع بالعلم راسو..
ولو كان للكرم أستاذ.. وطنا بيبقي أستاذو..
جنانا صغير سنين لكن.. كبيييير في حبو وإحساسو..
بحب النيل.. وبيهوي خليل.. ويدق في الحوبة أجراسو..
****
وطن حدادي مدادي.. ملاذ للماشي والغادي..
وفينا شباب تشد الحيل.. دوام بالوحدة بتنادى..
بريد وطني الجميل ونبيل.. ترابو وصية أجدادي..
أنا البهواهو مهما يكون.. فقير غنيان عليو راضي..
وأكيد تتحسن الأحوال.. يعيش في خيرو أولادي..
بلد طيبان وقلبو كبير.. يشيلك في العيون عادي..
بلد قبلة جميع الناس.. بلد للنيل صبح وادي..
****
نلبي نداهو حفيانين.. نقدم خدمة مدنية..
ونفديو بالدموع والدم.. نمثل جبهة شعبية..
نصفي نفوسنا من الشر.. نعيش في وحدة قومية..
نحارب فكرة الإرهاب.. وننبز أي جهوية..
نفوسنا فداو تخوض الدم.. وترحل راضية مرضية..
نعيش في نعمة الإيمان.. وجوه بالسمرة مكسية..
جمال أرواح نبيل وأصيل.. دوام بالتقوي محمية..
نحب اللمة، نكري الضيف.. نتوه في رحلة نيلية..
ونرسم لوحة بالألوان.. نهيم في ليلة شعرية..
بحب وطني وبحب ناسو.. وبينا علاقة أزلية..
حكايات الشمس والنيل.. تواريخ خالدة أبدية..
أكيد تتعدل الأحوال.. وننعم بالرفاهية..
****
تدوم العزة يا وطني.. وأشوفك ماشي لي قدام..
توري العالم الإنجاز.. يزغرد في ربوعنا سلام..
ونفديك بالعلم والروح.. عشان تتحقق الأحلام..
ونتكاتف عشان عينيك.. ويجمع بينا أحلي وئام..
تعيش ياوطني راضي عزيز.. وتبقى منارة الإسلام..
شبابك ناوي ينهض بيك.. شباب خلاق شباب مقدام..
وبكرة يلوح صباح الخير.. يبدد فينا أي ظلام..
بريد وطني وعليهو بغير .. وبكتب فيهو أحلي كلام..
تلويح:
بلادي وإن جارت عليّ عزيزة..