محمد عبد الماجد

شكلك بتسمع كلام (نسيبتك)


العنوان الفوق دا ما عندو علاقة بالموضوع.
ولا عندو علاقة بالكهربة.
ولا عندو علاقة بالبصل.
ولا السخانة الفي البلد الايامات دي.
ولا عندو علاقة بتعادل المريخ امس مع الخرطوم الوطني.
في زول هسع جاب سيرة التعادل – ولا عاوزين نسألكم.
الغريق في (الابيض).
ناس المريخ كل ما يضيعوا ليهم (ضربة جزاء) مفروض المباراة يقنعوا منها.
في زول بضيع ليه ضربة جزاء في الدقيقة 49.
وفي استاد المريخ.
هسع سيحة يجيكم الاسبوع القادم ويقول ليكم الحكم مفروض يعيد تنفيذ تسديد الضربة من جديد.
سيحة قال الاهلي عطبرة عندو ضربة جزاء.
شافها كيف ما عارف؟.
وقال لاعب الهلال مفروض يطرد.
شافها وين ما عارف؟.
وقت جاء لهدف الهلال الذي اعترفت به عطبرة كلها ..قال (التصوير) ما واضح.
والكاميرا واحدة.
طيب (ضربة جزاء) الاهلي عطبرة مصورنها بـ (21) كاميرا.
وإلّا الضربة كانت في ملعب تاني.
فييرا ضيع ضربة الجزاء.
الظاهر يا علاءالدين كورتك كملتها (اعتذارات) في الجزائر ، ورجعت قدرة على تنفيذ ضربة الجزاء ما عندك.
انتوا عمر بخيت مع (الاصابات) الكتيرة دي وين؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الله يسألني العملوه امس ناس الخرطوم الوطني في (بخيت خميس) – نحن في مجاعة سنة ستة ما شفناه.
غايتو الباكات ديل بتلتلوا في الدنيا جنس تلتلة.
انا قلت الغرق منو في جهة المريخ الشمال؟.
كواريك.
وجوطة.
وناس طالعة ونازلة.
وعربيات تجي – وعربيات تقوم.
وبطيخ…
يا زول (بطيخ) شنو؟..(البطيخة) دي ما حتتها.
فكها بايظ.
بخيت خميس دا تاني ما تدخلوه المباراة من غير (بنج) موضعي.
ما عاوزين نقول ليكم بنج كلي.
اول مرة اشوف لي زول (تعيس) بالصورة دي وهو اسمو (بخيت).
بخيت طلع قاعد ساي – زول تقيل ..لو اتقدم ما برجع.
ولو رجع عاوز ليه سنة عشان يطلع.
الزول دا في كل (جرة)..بتسمع ليك بي (مرق) اتكسر.
اتكسر وين ما عارف؟.
بس بتسمع بي (كع).
طالعة من وين ما عارف.
زمان كان عندنا استوبر اسمو (الطيب كع).
الطيب كع دا لو دخل ليه في (صنية خبيز) – ضربة جزاء.
اي دخلة عندو بي (ضربة جزاء).
زي حارس الاهلي عطبرة (عوض كافي) تقول شغال مع ناس الدهب – عاوز يكسر لينا محمد عبدالرحمن.
محمد عبدالرحمن راجع لينا من اصابة يا دوب – عوض كافي عاوز يكسرو لينا.
بنك السودان في (المخالفة) دي مفروض يتدخل.
المباراة تقول كانت بين انصار المهدي وقوات هكس باشا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
والله يا بخيت خميس – والكلام دا ما بتلقوه إلّا في العمود دا – بي حالتك دي يلموا فيك ناس (ثلعوبنا) والغربال ..يرجعوك (مريخ الفاشر) بين الشوطين.
المباراة ما بنتظروها تنتهى.
بخيت خميس دا طلع (خدعة) كبيرة – الزول تقيل وما عندو اي علاقة بي اسمو.
علي جعفر اتاريه شايل دفاع المريخ.
بخيت خميس امس كان لابس الفانلة رقم (15).
بعد المباراة انتهت نفس الزول بي نفس الفانلة لقيناه لابس (3).
الـ (15) نقصت (12).
راحت وين ما عارف؟.
والله الجري الجراهو (بخيت خميس) ..لو جراهو (نمر) كان قطع.
لكن بالجد.
وبي كل صراحة التعادل في استادكم ..بريّح الزول في ضميرو.
بقع للزول زي (التلجة).
زي (البطيخة) الباردة في الساخنة دي بعد الغداء.
بطيخة (منشنشة).
من حلاوتها عاملة عُقد عُقد.
تقع في الجوف باااردة.
ما في حاجة بتريحنا غير تعادلكم في استادكم.
دا التعادل التاني على التوالي في استاد المريخ.
مرة مع وفاق سطيف.
ومرة مع الخرطوم الوطني.
طبعا زي ما قلتوا ليكم وشرحت ليكم الموضوع من بداية العمود – العنوان ما عندو علاقة بالموضوع.
احسن نوضح ليكم الحكاية من بدري.
ما تقعدوا تلخبطوا لينا ساكت.
كل الحاجات الفي رأسكم دي احسن تشيلوها – قبل ما ندخل في التفاصيل.
وبعدين الرجعة بتبقى ليكم صعبة.
عشان ما تقعدوا تشرعوا لي ساكت.
عارفكم جنكم (تنظير) ..من تلقوا (طرف الخيط) تقعدوا تشرعوا براكم.
في ناس بتحسسوا من تجيب ليهم سيرة (النسيبة).
الكورة الفي رأسهم بتطير.
عارفكم …عاوزني اجيب ليكم سيرة تعادل الخرطوم الوطني مع المريخ بالواضح كدا ، وما اطلع من النص.
وضربة الجزاء التى اضاعها علاءالدين يوسف.
عارفكم – عاوزين الكلام دا.
يا جماعة انتوا لو بتصبروا كان بتعرفوا (المنقا) بتجي من وين؟.
اي حاجة بالرواقة احسن.
علاءالدين يوسف طبعا لو كان في الهلال بي حركاته دي – كانوا قالوا علاءالدين يوسف دا زول صلاح ادريس.
عشان كدا بضيع في ضربات الجزاء.
ناس المريخ ..عندهم حاجة كويسة ..ما في زول ممكن يطلع منهم ويقول علاءالدين يوسف تابع لجمال الوالي.
عشان كدا بضيع في ضربات جزاء لجنة التسيير.
ابدا ما في كلام زي دا.
المريخ في الحتة دي احسن مننا.
والله احسن – ما في كلام.
دي حاجة كويسة.
نرجع ليكم للعنوان.
زمان كان بنعرف لينا زول اسمو (الفاتح معرج بي كرتين).
اسمو كدا – (الفاتح معرج بي كرتين).
هو اسمو (الفاتح).
وابوه اسمو (معرج بي كرتين).
اسمو كدا – انتوا قايلني قاطعو ليكم من رأسي.
(الفاتح معرج بي كرتين) دا ..كان وقت يمشي السوق ..يشوف ليه اكبر (بطيخة) في السوق ..يدفع سعرها ويشيلها في كتفو ويمشي على البيت.
(الفاتح معرج بي كرتين) ..وقت كنا نلاقيهو في طرف السوق شايل البطيخة الكبيرة دي بنقول ليه انت الظاهر عليك بتخاف من (نسيبتك).
ونحن في الحقيقة غايظانا (البطيخة الكبيرة).
طبعا (النسيبة) جنها وجن البطيخة (الصغيرة).
اصلو الواحدة فيهن ما تجيب ليها بطيخة صغيرة.
(الفاتح معرج بي كرتين) ..كان وقت يجي عيد الضحية بجر ليه اكبر خروف في الزريبة ويشيلو البيت.
ونحن كنا وقت نلاقيهو في طرف الزريبة – بنقول ليه الظاهر عليك انت بتسمه كلام (نسيبتك).
طبعا (النسيبة) كجنتها في الدنيا دي تجيب ليها خروف (صغير).
كان للخروف الصغير – احسن ما البداية ما تدخل بيه البيت.
وكمان لو بقيت حريف – مع الخروف الكبير ..تغشى الحلاوني وتشيل معاك كيلو باسطة.
كدا انت بتكون انت احسن زول.
(الفاتح معرج بي كرتين) – كان وقت فريقو (يتعادل) نسيبتو بتقول ليه اوعك تجينا داخل البيت…بي وشك (المكرفس) دا.
وشو ببقي زي (البروّه).
نحن الشفوت بنقول ليه نسيبتك ليه بتحذرك من الدخول للبيت وقت فريقك يتعادل؟.
(الفاتح معرج بي كرتين) بقول لينا ..عشان وقت فريقي يتعادل ..بجي البيت وايدي فاضية.
بصلة ما بجي شايلها.
عشان كدا نسيبتو عندها موقف من النتيجة وقت تنتهى تعادل.
عندها موقف عديل كدا.
ولا بتجامل في الحتة دي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………
و
علي جعفر من (الوقيع) الكتير بقى زي (من الامس).
وكان على امير كمال ..فقد وضح ان حافز تسجيلو كلو عملو زيادة في وزنو.
يا كابتن وزنك دا بدخلك في احراج ساكت مع ناس (ثلعبونا).
الموضوع دا بعدين ببقى صعب عليكم.
نحن عاوزين الاتحاد يبرمج لينا مباراة القمة الخميس القادم.
…………
السيدة (ل) – المطرة وانتي زي البتكاوا في ارتفاع الدولار.
وقرّط على كدا.


تعليق واحد

  1. الفاتح معرج بي كرتين !
    يا خي نحن اتعلمنا (كنكان 14) دا من سنة دو ..
    أول مرة أسمع بي (عبارة معرج بي كرتين) !!
    لأنو لو ما عندك كرتين ما بتكون معرّج أصلا !
    يعنى كفاية تقول معرّج .. و أي زول ح يفهم أنو عندك كرتين ..
    يعنى أصلو الزول لو عارف (معرج) يعنى شنو ح يعرف أنو عندك كرتين !
    يعنى لمن تقول نيل شندي فاز علي الهلال … ما في داعي تقول و الهلال خسر من نيل شندي !! لأنو ما دام نيل شندي فاز .. معناها الهلال خسر !!
    دا فهم شنو .. العشري ليهو حق يشرد و يتخارج منكم …
    هسا لو سجلتو شيبوب كنتو في المجموعات !!!!
    يبدو الخروج من التمهيدي سيجعل عبقريتك تتفتق عن عبارات خارقة ترفد بها ثقافة الكوشتينة و الكونكان …
    بس أو تمشي البلد و تلقى الجماعة مفرشين ليهم سجادة و لاعبين (حريق) و تقعد وراء واحد (تشفطو) و تقول ليهو : انت معرج بي كرتين !!!

    ظاهر عليك كانت قاعد (تسمع الكلام)… تسمع الكلام اسم الدلع ل (رافع راية بيضاء) … و لا مش كدا يا سيدة (لام)