فرض رسوم (دمغة الجريح) على مشروب (التبلدي)

والله العظيم نحن ما كنا فاكرين الموضوع ممكن يصل الحد دي.
قلنا هدف الغزال لو بالغ ممكن يشطب (المعز محجوب) رغم عدم مشاركته مع المريخ في الابيض.
يقفلوا تلفوناتهم.
يحتجبوا لظروف فنية.
يحردوا العشاء.
اصلا ما كنا فاكرين الموضوع ممكن يكبر بالشكل دا.
6 استقالات في لجنة التسيير…(دا ما كان هدف).
غزال يجبر 6 اعضاء على تقديم استقالاتهم.
هدف وحيد.
الشيء شنو؟.
تقول (صاروخ) – فرتكهم فرتكة عجيبة.
علي جعفر مفكوك قالوا ليك قال عاوز (مليار).
بعد هدف مهند الطاهر مية الف كتيرة فيه.
الايامات دي وقت اقرأ لبابكر سلك زي البقرأ في (كراس الجرورة) بتاع الدكان.
طحنية بـ (10) جنيه.
زيت بـ (4) جنيه.
رغيف بـ (5) جنيه.
علبة صلصة.
صندوق بسكويت.
معجون اسنان.
قزازة بارد.
دا حال المريخ اليوم.
التحقيق مع البلجيكي الوك ايميل.
التحقيق مع بعض اللاعبين في المريخ.
هي وصلت مرحلة التحقيق مع لاعبي المريخ – فضيحة السواد.
بقيتوا تحققوا مع لعبيتكم.
(اولادنا) اوعكم تهبشوهم.
او تقربوا منهم.
علاء وبكري وتراوري وعبده جابر.
شيبوب عرفها.
الله شافو.
ومرق منها.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
والتغطية مستمرة.
تتخيلوا الموضوع وصل مرحلة (جمعة رحيل للمجلس).
وقفة احتجاجية في نادي المريخ.
عليكم الله (الوقفة) دي اعملوها في حاجة تستاهل.
حاجة فيها قيمة.
والتغطية مستمرة.
عودة برهان تية.
برهان يمشي ويجي تقول عندو تلفون في الشاحن.
عقد مؤتمر صحفي لمجلس الإدارة يوم الاثنين القادم 2 مايو.
إقالة مساعد المدرب حاتم بالهوشات.
الطائرة التى سقطت امس في الابيض …هدف مهند الطاهر ما سبب في سقوطها.
ما تقوموا تستقلوا هدف الغزال في اجندتكم الخاصة.
نحن لو كنا قايلين هدف (الغزال) بعمل الحاجات دي كلها في المريخ – كان طالبنا من الاتحاد العام تأجيل مباراة الابيض.
عذرنا الاتحاد في تأجيل مباراة كادوقلي.
وعذرناهم في تأجيل مباراة شندي.
وعذرناهم في تأجيل مباراة القمة.
ولو كنا فاكرين الموضوع بيصل الحد دا – كنا حلفنا عليكم.
ما كان بنخليكم تلعبوا مباراة الابيض.
البشتنة التى حصلت عليكم دي – ما حلوة في حقكم.
بشتنة وصلت مرحلة (التحقيق) مع المدير الفني للمريخ وبعض لاعبي المريخ.
الامين العام للمريخ عامر عبدالرحمن عميد (حقوقي)– عشان كدا قرارات مجلس المريخ امس كلها طلعت (تحقيقات).
عملها ليهم كلها (تحقيقات).
يعني عادي جدا الاجتماع القادم قراراته يكون فيها (جلد وغرامات وسجن).
وقت جابت ليها (تحقيقات) – ممكن تجيب ليها (جلد).
اعملوا حسابكم يا ناس ضفر.
يا علي جعفر.
وامير كمال.
وبكري المدينة.
الموضوع دا في (شندي) ممكن يجيب ليه (جلد).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
والتغطية مستمرة.
مجلس المريخ امس اصدر قرارات غريبة عديدة ، غير ان القرار الغريب جدا الذي سوف نتحدث عنه في هذه المساحة هو تسمية نائب الأمين العام المهندس محي الدين عبدالتام رئيسا للجنة التسجيلات.
والله هانت الزلابية.
السنة دي سوق التسجيلات سوف يكون كاشف.
ما في اي منافسة من المريخ.
يا الكاردينال الساحة بقت فاضية ليكم.
محي الدين عبدالتام رئيسا للجنة تسجيلات المريخ..الزول دا ما عندو اكتر من يتصور ليكم مع (شيبوب) في المطار.
اكتر من كدا يا مريخاب ما تحلموا بشيء.
السنة دي تسجيلاتكم ح تكون (صور) ساكت.
كما ان مجلس المريخ حق (اورنيك) تسجيل المحترف ما بكون عندو.
ودي حاجة ما غريبة.
في زمن جمال الوالي تم تسجيل شرف شيبوب كـ (هاوي) عشان ما عندهم حق (اورنيك المحترف).
الله يجيبكم لينا سالم يا شيبوب.
السنة دي اورنيك الهاوي ما بكون عندكم – ما دام ان رئيس لجنة تسجيلات المريخ هو محي الدين عبدالتام.
غايتو إلّا (يتمها) ليكم (صور).
بالمناسبة يا الكاردينال انت موضوع (شيبوب) عملتوا لينا فيه شنو؟.
الزول دا اشتقنا ليه عديل كدا.
احسموا مواضيعكم من بدري – بعيد من الصور والتصريحات.
بالمناسبة اجمل ما قاله الكاردينال رئيس نادي الهلال امس هو قوله : (كنا نسير في الاتجاه الذي أعلناه من قبل بأن العام 2017م، سيكون خاليا من المحترفين الأجانب، ولكن الرأي الفني كان له رأي اخر، وقد أكد لنا بعض الخبراء في هذا الشأن، بأن توقيت انزال هذه الفكرة لم يحن بعد.. وأوضح رئيس الهلال، ان هناك العديد من اللاعبين الأجانب في الطريق، وذلك من أجل ان يقف الروماني بلاتشي على مستوياتهم، واختيار من يرغب فيه).
هذا كلام منطقي ..وشيء جميل من رئيس نادي الهلال ان يتراجع من ان يكون كشف الهلال خاليا من المحترفين الاجانب.
برشلونة عندها اكاديمية بترعى في اللاعبين من عمرهم (7) سنوات – مع ذلك تعتمد برشلونة اعتماد كليا على (الاجانب).
وكذلك ريال مدريد وكل الاندية الكبيرة.
لذلك تراجع الكاردينال يحسب له – وقد اجتهد رئيس الهلال كثيرا في ان يجعل الهلال محتشد بالمواهب الوطنية والشابة.
اذا اردنا ان يحقق الهلال بطولات قارية لا بد من الاستعانة بمحترفين اجانب على مستوى.
في التسجيلات القادمة 11 مايو نتمنى ان يصل الكاردينال الى (اجانب) يشكلوا اضافة حقيقة للهلال وللكورة السودانية كلها.
نتمنى الاستفادة من التجارب السابقة.
ابعدوا لينا عليكم الله من اللاعب (قصير) القامة.
عاوزين هلال يهز ويرز.
ويسر العين.
ويقدم الروعة كلها ويحقق الانتصارات الكبيرة.
الكاردينال تحدث امس عن العشري وقال : (سبب اخر قاد العشري للمغادرة، وهو معرفته باتفاق مجلس الادارة مع الروماني بلاتشي، قبل ثلاثة ايام من رحيله).
في الوقت الذي قال فيه الكاردينال عندما اراد ان يبعد عنه تهمة استبدال المدربين بصورة دائمة ان العشري (هرب) – اي انه لم يطيح به.
وكان الكاردينال في حديثه نفسه قد قال ان العشري غادر لأنه علم باتفاقهم مع الروماني بلاتشي قبل ثلاثة ايام من رحيله.
عليه يجب الا نقول ان العشري (هرب) – هذا امر غير حقيقي طالما اتفاق الهلال مع بلاتشي كان قبل ثلاثة ايام من رحيل العشري وبعلم العشري.
جمهور الهلال يحب ان يتعامل معه بوضوح وصراحة – حتى يكون على بينة من سير الامور في الهلال.
وجمهور الهلال اذكى من الكل.
لذلك ننصح الكاردينال ان يتعامل معه بوضوح وصراحة – افضل من ان يكون التعامل معه بهذه الصورة.
المهم في الهلال المحافظة على مساوي وبشه وكاريكا والشغيل وبويا ونزار حامد– لأن المحافظة على هذه الاسماء يمنحنا سطوع اكبر لصهيب الثعلب وابوعاقلة وولاءالدين وبشه الصغير ومحمود ام بدة.
عودة المياه الى مجاريها الطبيعية في الهلال – امر يجد الدعم والمساندة من الجميع.
نتمنى ان تكون الفترة القادمة اكثر استقرارا وان تأتي فترة التسجيلات بما نشتهى من درر ومواهب حتى تكون (الجوهرة الزرقاء) في الفترة القادمة في حضرة هلال يهز الارض كلها.
اذا اراد الكاردينال ان يسعد بالجوهرة الزرقاء عليه ان يحسن التسجيلات ويوفر الاستقرار والدعم التام لفريق الكورة.
عندها سوف يكون طعم (الجوهرة) مختلف عند الهلالاب.
جوهرة بدون كورة بتروح ساكت.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
والتغطية مستمرة.
بعد (الجراح) التى سببها هدف الغزال مهند الطاهر في المريخ اقترح بصوت عال ان تفرض رسوم (دمغة الجريح) على مشروب (التبلدي).
بعدين (دمغة الجريح) دي دخلوها لينا في اي شيء..يعني بقت على (التبلدي).
نحن زمان جدول تلاتة كان بدفعونا فيه (دمغة الجريح).
بقت على التبلدي.
…………………
و
الحمدلله نحن خاناتنا فاضيات للتسجيلات.
ما عندنا اي مشكلة.
بس في انتظار شيبوب.
رجعوا لينا شيبوب.
عجلوا لينا بيه.
التسجيلات باقى ليها (9) يوم.
نسأل الله فترة مميزة وجميلة للروماني بلاتشي مع الهلال.
ما تدخلوا في شغلوا.
وما تقعدوا تنظروا ليه.
وما تنقلوا ليه انطباعات خاطئة عن اللاعبين.
خلوه يحكم براهو.
بعد كدا يعمل الحاجة البتريحو.
ما في زول بقول حاجة.
الكاردينال قال الانتهاء من صب الاعمدة في الجوهرة سوف يكون يوم 30 مايو.
يا دوب الواحد بقى يحس بالجوهرة.
والتغطية مستمرة.
……………
السيدة (ل) – رسلوا لينا (موية) رمضان عليكم الله ومعاها (كهربة).
وقرّط على كدا