الحكومة تدعم ناديها وتتجاهل الشعب !

وسط الظلام .. عز الهجير .. في زحمة المواصلات والشوارع بشكل عام والتقاطعات على وجه الخصوص بعد توقف الإشارات بسبب انقطاع التيار الكهربائي .. في ظل هذه المعاناة التي وصلت إلى حد انعدام المياه .. لم تتحرك الحكومة لدعم شعبها .. لم تدعو لنفرة لدعم الكهرباء ولا دعت الوزراء للنزول للشوارع لتخفيف أعباء المعيشة ولا سمعنا بدعم بنك الثروة الحيوانية للمتأثرين بانقطاع التيار !!

في عز هذه الأوضاع التي نعيشها يومياً في صبر وجلد من أجل هذا السودان الذي نحبه كانت النفرة لصالح نادي المريخ .. أكثر من عشرة مليار دفعتها مؤسسات الدولة المختلفة من عرق وكد المواطن السوداني المسكين .. بنك السودان تبرع ب2 مليار والدولار يضحك عند محطة 14 ! اتحاد مصارف السودان تبرع بمليار ونصف .. أنا طبعاً ما فهمت يعني شنو اتحاد مصارف السودان والمسؤول عنو منو؟ ولييه يعني نص ما مليار .. فرقت بي شنو !! وزارة المالية تبرعت بمليار .. وزارة المالية تتبرع باموالنا للمريخ لماذا .. نحن لا نحب المريخ ولا نشجع المريخ !! شرطة ولاية الخرطوم تبرعت بنصف مليار .. طبعا كلو ولا الشرطة !! وطارق حمزة تبرع بخمسمائة مليون .. ماشاء الله تبارك الله .. موظف دولة يتبرع بنصف مليار علي الماشي كده وللفريق الذي لا يشجعه .. يعني لو ده الهلال تتبرع بي عشرة مليار يا ابو الطرق !! أسامة ونسي تبرع لاسامة ونسي بمائة مليون ! حلوة منك يا ونسي .. برضو الناس ديل متبرعين ليك انت .. اهو قلت تشارك علي طريقة الزول البياكل مع الناس العازمهم وكده يعني !! عبد الرحمن الصادق المهدي تبرع بمائة مليون !!!!!!!!!!!!! ممكن العلامات تصل لمائة مليون برضو ! البنك العقاري تبرع بي 200 مليون .. البنك العقاري ده بتاع (عقار) ولا اسم علي اسم ؟ بنك الجزيرة الاردني تبرع بي مائة مليون . طبعا نحن الاردنيين ما بنسألهم علي كيفهم .. لكن الخمسين مليون بتاعة الشعب السوداني دي بنسأل عن سبب التبرع بيها للمريخ ! مصرف الادخال للتنمية الاجتماعية تبرع بمائة مليون .. يعني اي واحد مدخر يمشي يسأل بكرة احتمال اتبرعو بأسمو .. ان شاء الله يلم فيكم واحد هلالابي ! بنك الثروة الحيوانية تبرع بمائة مليون .. أستشرتو الحيوانات بدون مؤاخذه ولا اتبرعتو ساكت ! بالمناسبة هو البنك ده لي هسة فاتح !!
نادي يلعب في الدوري الممتاز ضد اندية وطنه التي تتساوي معه في كل شئ يتم دعمه قبل ايام من التسجيلات بكل هذه المبالغ ومن اموال الشعب ؟ اي عدل هذا واي مساواة واي ظلم لبقية الاندية !!

نتمني ان لا تكون الاجابة ان المريخ مشارك افريقيا . ففي هذا الموسم شاركت ثلاثة اندية غير المريخ .. وفي المواسم الماضية شاركت هذه الاندية ولم نسمع بمائة مليار !!
وهل هناك إلزام للمريخ بدفع هذه المبالغ في البطولة الأفريقية أو إعادتها للدولة .. ماذا لو خرج المريخ من البطولة الافريقية هل سيعد الأموال أم أنه سيدعم بها التسجيلات !

لقد قلنا سابقاً ونكررها ولن نمل التكرار طالما أن الدولة تتدخل لدعم الأندية والاتحاد فإن كرة القدم لن تتقدم ..
اقتصاد الكرة السودانية كله كذب في كذب .. لا أحد يعرف منصرفات الأندية الحقيقية .. في كل العالم بما في ذلك العالم المتقدم مادياً علينا بعشرات المرات .. يتم إلزام النادي بالصرف في حدود امكانياته الحقيقية .. لماذا لا تتجه الدولة لذلك .. لماذا لا تترك الاندية لتصرف في حدود امكانياتها وتجبرها علي تطور فكرها الاقتصادي .. لماذا لا نتجه نحو اقتصاد حر لكرة القدم ونحن نطبق الاقتصاد الحر في معيشة شعب لا يملك قوت يومه ! لماذا تترك الدولة البصل والتوم والموز والسكر للعرض والطلب ولا تترك المريخ للعرض والطلب .. هذه حقيقة المريخ .. نادي بسيط في امكانياته المادية لماذا تدعمه الدولة في زمن ترفع فيه شعار رفع الدعم عن السلع الاساسية ؟؟

لماذا تشتري الدولة حقوق النقل التلفزيوني للدوري الممتاز .. لماذا لا تترك أسامة ومجدي ومعتصم يبحثون عن قنوات فضائية تشتري منهم هذا الدوري لنعرف قيمته الحقيقية وهل تراجعت قيمته بعد وصول معتصم جعفر للرئاسة أم تقدمت ! لماذا تدفع شركة سوداني ثلاثة مليارات ثمناً لرعاية دوري لا تكتمل دورته الأولى ولا تنتظم القناة في نقل مبارياته ولا يهتم الاتحاد بمباراة يتم إلغاؤها لتدريب فريق ثم تتم إعادتها لتتأخر نصف ساعة لعدم حضور الحكم !!
الدولة تدعم (فوضى) الكرة السودانية بشكل عام وتدعم (فوضى) المريخ على وجه الخصوص .. وبعد كل هذا ماذا لو انهزم المريخ في مباراة اليوم ! أدونا قروشنا .. سينما أوانطه !!!!!!!

صحيفة آخر لحظة