مقالات متنوعة

خالد عز الدين : سجلنا ولم نجدكم ؟!!


هددونا بالويل والثبور وعظائم الامور ان اقتربنا من شيبوب .. رفعوا العصا الغليظة والذراع الطويلة .. هتفوا بالوالي الغالي والدولار وسوداكال .. تحدثوا عن الماضي والحاضر وبلاتيني والفيفا وبلاتر .!

سافر للجنوب وعاد شيبوب .. جلس في امن وامان ثم انتقل لشبيبة القيروان .. لا نفع الصراخ ولا البكاء .. نحن في كامل الرضاء .. قلنا (كبري) سريع علي طريقة المك نمر قالوا والله (كبريكم) ده حيكون زي كوبري (الدباسين) ما عندو نهاية !! قلنا شركتنا تركية ! ستة شهور فقط قابلة للنقصان ولا تحمل الزيادة ! قالوا بنشتكي للفيفا .. أنتظرنا لحدي ما بلاتر ذاتو اشتكوا فيهو وساب الفيفا ذاتا ! حصل شنو يا اخوانا .. قالوا قروش المحامي ادوها ناس الفندق !!

شيبوب في الخرطوم داخل الاتحاد واسامة عطا المنان في المكسيك ! الاجتماع هذه المرة مع رئيس جديد ! وفي قصة شيبوب لا جديد .. حتي الكاردينال رفض تغيير الكسكته ياها ذاتا الشال بيها القروش ومشي القيروان .. كده عديل اغرينا لاعب هاوي بتحويل عقده لمحترف والسفر خارج السودان .. لسه منتظرين محاكمتكم .. الكسكتة بنفس الحتة . الفيها الحديدة . مافي جديد .. كل الذي حدث ان شيبوب استبدل التي شيرت ولبس فانلة الهلال .. ببساطة شديدة مشى الاتحاد ووقع ! علي الامين لا رجع لي كشف المريخ ولا سأل من المنصرفات الاضافة التي تدفع للاعب الهاوي وتحوله علي حسب قوانين (مزمل) الي لاعب محترف .. الاسم شرف الدين شيبوب .. الفريق السابق .. شبيبة القيروان التونسي .. النادي الذي تود الانتقال اليه . الهلال السوداني .. مافي اي أثر لذراع طويلة ولا قصيرة .. أنتهت القصة وكتبنا علي ورقة علي الامين من الخلف (سجلنا ولم نجدكم ).. الاتحاد خلا من اللون الاحمر .. مافي اي زول .. لا ابوجريشة ولا مزمل ولا سوداكال ولا قائمة الشرف الطويلة التي شاركت في قطع تذكرة شرف من جوبا ليوغندا للخرطوم ! جيبو كعب التذكرة بنرجع ليكم القروش ! رجعنا للانترنت قلنا نتذكر صور الجماعة الشاركو في الذراع الطويلة لقيناهم مسحوا صورهم .. الشينة منكوره .. تاني بتجو !! التوبه

شيبوب عبر وكورتو ما عبرت .. الزول ده كان اسمو بوغبا السوداني .. فجأة بقي اسمو شيبوب الاناني .. قالوا كبير ومزور عمروا وبلعب في الرديف باسم اخو .. قلنا ما يكون اسمو شيبوب شمس الفلاح ! قالوا الحكم كلاموا صاح .. والقون ما صاح .. قلنا نحن ذاتو عايزين اقوانوا تبدأ من هنا ! قالوا (تلب) من الطابق التاني .. قلنا ليهم نحن يا دوووب بنعمل في الطابق التاني ! قلنا ما بتشوفو تاني .. قالو بنكلم بلاتر ! قلنا ليهم انتو من زمن بلاتر نائمين .. قالوا لا نعسانين ! قلنا ليهم ابقوا عشرة على ..النعسان .. ما تدقسوا مع الكاردينال ده !!

شيبوب ضربة موجعة وحدث استثنائي في تحدي التسجيلات بين الهلال والمريخ .. فلاول مرة في التاريخ يتم خطف لاعب من ناديه عنوة واقتدارا .. يشيلوا كده رجالة وحمرة دولار .. لا ذراع تلحقوا لا والي يوقفوا لا ونسه نفعت معاهو ! كاش وقلل النقاش .. لاول مرة في التاريخ لاعب من الكشف عنوة واقتدارا يجي للهلال من المريخ ! لسه عندو سنين في كشف المريخ .. لسه صغير .. لاعب رديف .. ضربة في الارتكاز تاني بس المرة دي من جوه الكشف .. شيبوب ضربة موجعة لكن الطاهر سادومبا ضربة مفرحه .. لاعب حريف وخفيف وجوكر واكتسب خبرات عالية في الدوري الممتاز والمنتخب . لاعب يؤكد بان المريخ يفتقد للعين الفاحصه ! الطاهر سادومبا مكسب كبير .. شكرا عاطف النور وكل الذين شاركوا في اختيار هذا اللاعب .. ومبروك للطاهر الاختيار الصحيح .. ضيعت سنينك يا ولدي !! معليش تتعوض زي شيبوب ..

اما سادومبا سيد الاسم فاعتقد انه امام تحدي الزمن . فعندما يتقدم العمر باللاعب خصوصا الذي يعتمد علي السرعة فانه يحتاج الي مجهود مضاعف خصوصا في المباريات الكبيرة .. نحن ضد تسجيل سادومبا باعتباره لاعب قدم واخلص وامتع وسلم الراية لجيل جديد .. ولكننا نحترم خيار من اختار واتخذ القرار ونتمني لسادومبا التوفيق وان يمتعنا مرة اخرى باهداف من عينة اهدافه في شباك اكرم ! الله كريم ..

نبقى مع الجزء الثاني من قصة شيبوب لاحقا بعد ان نقرأ شكوى المريخ للفيفا !!