محمد عبد الماجد

ما عاوزين كلام كتير ..رجعوا لينا قروش (نفرتنا)


عاملين ليكم (نفرة).
وتحويل رصيد…وكلام جرايد.
وسلك يشيل ويشجع فيكم.
يشيل وينفخ.
وغلاط.
وتعب.
وتأجيل مباريات الدوري الممتاز.
اي مباراة صعبة في الدوري الممتاز يقولوا ليكم نحن ما بنلعب ..عندنا ظروف.
تاني ح تقولوا شنو؟.
هلال كادوقلي منتظركم.
والاهلي شندي.
وشيبوب.
تاني ما في اي عذر.
ما بنقبل ولا كلمة.
شيلوا شيلتكم ..وبلوا رأسكم.
شايلين قروش (الحكومة).
ولجنة تسيير…يشيلوا ويمددوا ليها.
وفانيلتكم كلها (اعلانات) ، تقول (عريضة) – ديل قالوا ليك اعلانات قناة انغام شالوا منها 20 %.
لجنة التسيير حقتكم دي مفروض يسموها (لجنة الاعلانات).
شغالين يلقطوا من (المريخ).
وبتغلبوا بعد دا كلو 0 / 2.
مفروض بعد مباراة امس …اسامة ونسى طوالي يطلعوا عليه (امر قبض).
بعد كورة امس ، يستاهل (امر القبض).
ما معقول ..دا ما فريق يمثل بيه في بطولة افريقية.
امر القبض المرة دي مفروض يطلعوا (جمهور المريخ).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
مشتكين (شيبوب) – عشان تجوا تطيروا لينا بالطريقة دي.
شيبوب ذنبو شنو؟.
ركزوا في (شيبوب) اكتر من تركيزهم في (الكوكب).
اقول ليكم ألحقوا (التسجيلات).
ألحقوا السوق اشطبوا ليكم (22) لاعب.
عندكم 48 ساعة ممكن تشطبوا فيها.
علاءالدين يوسف شطب.
امير كمال شطب ، وتجريد من (الشارة).
تراوري ..(تذكرة ما تقطعوها ليه) ، يرجع مالي باللواري.
طيارة كتيرة عليه.
ضفر شطب.
رمضان عجب شطب.
بكري المدينة شطب.
عنكبة (اعارة).
مصعب عمر شطب.
كوفي شطب.
جمال سالم يمنح فرصة اخرى.
بخيت خميس ينزل (الرديف).
مازن شمس الفلاح ….استاد المريخ بي جوارو تاني ما يمر.
عمر بخيت من (المغرب) ما يرجع..يقعد قبلو.
وشيلوا (ملياركم) من علي جعفر.
احسن الكلام نقوله ليكم عديل كدا.
علي جعفر (75) الف جنيه كتيرة عليه ..انتوا يا اسامة ونسى تمنحوه (مليار) ليه؟.
اختصاصي جراحة هو؟.
اختصاصي غدد درقية؟.
مخ واعصاب؟.
مليار في شنو؟.
تشيلوا (نفرتنا) ..عشان تعطوها (علي جعفر).
ما معقول تمنحوه (مليار) ، وتقعدوه في (الكنبة).
على الاقل كان تشركوه – عشان يحلل ليه (5) جنيه.
تعبتوا (السفير) السودان في المغرب ساكت.
مستعجلين على شنو؟.
عشان توقعوا معاه وتصوروه مع السفير وتقعدوه في (الكنبة).
خسارة (صور) ساكت.
دي طريقة يطير بيها فريق محترم ..وكمان بيضاربوا في (الحكام).
الحكم عمل شنو؟.
ضربات جزاء صحيحة وما فيها كلام.
فضحتونا وشرطوا عينا.
انتظروا (العقوبات).
تاني ما اظن نشوفكم في البطولات الافريقية قريب.
مراسل قناة انغام ، رغم انه متابع المباراة من الاستاد ومعلق عليها ، لكن واضح عليه بيحضر فيها في الراديو.
المراسل كل ما يسألوه عن حاجة ..يقول الحكم احتسب ضربات جزاء غير صحيحة.
يا زول انت قايل نفسك (سيحة).
الكلام دا خليه لي سيحة.
وحاتم محمد أحمد بيضارب في الحكم.
حاتم محمد أحمد من زمن ضربة الجزاء التى ارتكبها مع زاهر مركز وزيكو شال الكورة وهرب ..حاتم ما قادر يمسك اعصابو.
ما قادر يركز.
بقى عندو (فوبيا) من ضربات الجزاء.
هسع عليكم الله ضربات الجزاء التى احتسبها الحكم على المريخ فيها شنو؟.
ما فيها اي حاجة.
الحقيقة قالوها ناس خالد احمد المصطفى ومحمد موسى في الاستديو التحليلي.
تحليلهم كان في منتهى (الشجاعة).
غايتو لو دا فريقكم ..السنة دي برشح للهبوط من الممتاز الامير البحراوي والمريخ العاصمي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
لكن احسن نقول ليكم الحقيقة.
ما بنغشكم.
ولا بنخدعكم.
شيبوب لو قاعد – دا كلو ما كان حصل.
ليكم حق تشتكوا الكاردينال.
كلو من الكاردينال.
بكري المدينة امس جابوه في المباراة تقول سائق ليه لوري تراب.
بكري فكت منو خلاص.
يا حليل (الجري) الكان بعمل فيه بكري المدينة زمان.
بكري المدينة دا ما بجري ليكم إلّا لمن يشوف جمال الوالي.
جري لي الله كدا ما بجريه.
وتراوري تقول شغال (مراجع حسابات).
لا عاوز يجري.
ولا عاوز يتعب.
ولا عاوز يعمل اي شيء.
يلعب على مزاجو.
على راحتو.
ما في زول بيسألو.
ولا في زول بقدر يقول ليه حاجة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
لكن نحن (نفرتنا) ما بنخليها.
تشيلوا (نفرتنا) وتطيروا كمان.
10 مليار و600 مليون جنيه راحت ساكت.
رميتوها في البحر يا ناس الحكومة.
لو في مؤسسة ما دفعت لغاية الآن ..مفروض ما تدفع للمريخ قرش.
يدفعوا ليهم على شنو؟..والجماعة طاروا.
انتوا وقت بتطيروا بالطريقة دي فرقكم يبقى من (الامير) شنو؟.
تشيلوا في (النفرات) وتطيروا من (المغرب).
خلوها تضلم شوية.
من المغرب.
قناة انغام امس من (الغنا) قلبت (نويح).
بكي شديد.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
لكن بتاعين الشكاوي ديل ما قاعدين يتحيروا.
بلقوا ليهم (شكوى).
ديل وقت الدوري وقف قالوا يشتكوا (الكاردينال).
دحين هسع دي ممكن ناس المريخ يقدموا شكوى في (يوسف الفقيه) لاعب المراكش المغربي.
ممكن يطعنوا فيه ..يقولوا (الفقيه) دا ما عندو اي علاقة بـ (الفقه) ، فقيه في شنو يعني؟ – عشان كدا اهدافه في جمال سالم (لا تجوز).
كما ان ضربات الجزاء غير (شرعيات).
غايتو يوسف (الفقيه) دا ، إلّا يكون فقيه في الكورة.
(فقيه) في ضربات الجزاء.
قالوا ليك في زول صعب اسمو (الفاتح قطع البحر).
الفاتح قطع البحر دا ..قال لي ولدو اوعك تجينا البيت انصاص الليالي.
الولد قال لي ابوه (الفاتح قطع البحر) جدا يا حاج ..ان شاءالله من (المغرب) اكون في البيت.
المريخ وقت اتغلب امس …(الفاتح قطع البحر) ومشى وقف في الباب ..منتظر ولدو يرجع.
ولدو اول ما رجع قال ليه يا ولد تاني اوعك تجينا البيت دا في (المغرب)..من (العصر) تتلم على اخوانك.
الولد فهم ليكم الحاصل ..قال لي الفاتح قطع البحر ..والله يا حاج لو تابعت لي (المريخ) دا ..ترجعنا البيت من (الصباح).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………..
و
الليلة تعالوا احتفلوا بي (شيبوب).
يوم القيد الرسمي.
افرحوا بي (شيبوب) بس ..الكوكب المراكشي ..مالكم امالو انتوا؟.
ما تشتغلوا بيه كتير.
خليكم في (شيبوب).
الهلال امس واصل في دعم الرديف وسجل مؤيد ام بدة.
مؤيد الصيني.
غايتو الهلال السنة دي ما شاءالله عليه.
عماد الطيب ..اشتغل صاح.
يستحق الاشادة.
بس يجب ان يلعب الهلال بصورة مستمرة مباريات ودية ..حتى يجرب هذه المواهب ويمنحها فرصة المشاركة باستمرار.
شباب الهلال ورديفه فيه مواهب كروية خطيرة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
السيدة (ل) – جعلها الله امطار خير و (قهوة).
وقرّط على كدا.