لميتوا (الجري والطيران) في وقت واحد

قال ليه : (الجدادة) عندها (سنون)؟.
سؤال محرج كدا!!.
ما لاقانا قبل كدا في (العلوم).
لو ناس الضرائب اكتشفوا (الحتة) دي ..ممكن يفرضوا (ضريبة ضروس) على (الجداد).
(الجداد) من غير (ضروس) طار السماء.. لو عمل ليه (سن) واحدة بورينا النجوم عز الضهر.
قال ليه : غايتو لغاية امس ما في كلام بالشكل دا (ما شفنا لينا جدادة عندها سنون) – لكن الكاردينال مع (تسجيلاتو) دي لو عاوز يركب ليها (طقم اسنان) بيعملو.
الكاردينال سجل جمعة في كوبر ..واعارو.
ناس المريخ لغاية الآن قاعدين يتلفتوا.
الزول دا جاب ليك (شيبوب) من كشف المريخ.
الصدمة التى حصلت على المريخاب في شيبوب انعكست عليهم في (المغرب).
والله شيبوب بي شعار الهلال زي الشاي باللبن ..حاجة ما تخلص.
بكري المدينة بالزي الاحمر زي (الطالب) البيجي بعد (طابور الصباح).
يومو كلو بكون (مخلوع).
او زي (ضلفة) الدولاب الما بتتقفل.
قدر ما تعصرها بي ورقة او كرتونة ما تتقفل ليك.
بكري المدينة بقى كدا.
الكاردينال رجع سادومبا.
وعشان ما تتغالطوا كتير.
واحد في الدفاع.
وواحد في الهجوم.
ولو عاوزين ليكم (سادومبا) في الوسط ..الكاردينال ممكن يشوفو ليكم.
واعاد قيد مدثر كاريكا ..في (صباح) اجمل من كدا.
في صباح كدا وقت يكون جميل ..بيجيك شايل (زلابيتو) معاهو.
تشغل (المروحة) تلقى (المكيّف) ظرافة منو كدا اشتغل براهو.
عشان كدا (جداد) بي (سنون) احسن ما تجيبوا لي سيرتو.
بقوم افتح ليكم (نضمي) للصباح.
انا الحاجات دي صعب فيها – لو فتحت فيها تاني ما بقيف.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
هسع لو عاوزين (نحلل) المسألة ونضع ليها قالب (فني) ..بنقول المريخ (طار) وإلّا المريخ (جرى)؟.
سؤال.
يعني مع (السك والجري) العملوه ناس علاءالدين يوسف ما اظن حكاية (طيران) المريخ دي مناسبة لوصف خروج المريخ من الكونفدرالية.
المثل الشعبي بقول ليك (النعامة) ما لقت الجري والطيران.
تتخيلوا ناس المريخ لقوا الاتنين.
طاروا.
وجروا.
وفي وقت واحد.
تاني اقول ليكم اكتر من كدا شنو؟.
غايتو ممكن نلقى لينا مذهب يحلل لينا الموضوع دا – نقوم نقول ان (جري) لاعبي المريخ بعد مباراتهم مع الكوكب المراكشي كان (طيران) عديل كدا.
وبي كدا نكون حققنا (الجري والطيران) في وقت واحد.
وقفلنا الباب دا.
شوفوا (العلم) دا سهّل اي حاجة.
زمان كنا بنشطح ..وبنتصور لينا حاجات كدا غير (واقعية) ، وبنقول على الحاجات الما ممكنة دي (خيال).
هسع (العلم) هو (الخيال) بتاع زمان.
يعني الحاجات (الخيالية) الكانت في الماضي – هسع بقت (واقع) نتيجة (العلم).
بقى ما في (خيال) مع (العلم).
شفتوا الكلام دا كيف؟.
يعني شنو؟.
يعني المريخاب ما ممكن يقنعونا مع الفضائيات والنقل المباشر ان ضربة جزاء بخيت خميس ما ضربة جزاء.
وان ضربة الجزاء التى ارتكبها مصعب عمر ما ضربة جزاء.
اللهم إلّا اذا كنا بنتابع في المباراة بي تلفزيون ابيض واسود.
وشغال بدون كهربة.
وبدون شاشة.
وما فيه صورة.
ولا فيه صوت.
لو المخالفة التى عملها مصعب عمر ما ضربة جزاء ..ورونا تكون شنو؟.
جنة الاطفال؟.
شنو بس؟.
(عزيزي المشاهد).
الثورة بالنص؟؟؟.
يا جماعة نحن الكورة دي قاعدين نتابعها معاكم.
وبنشوفها زيكم.
كلام الجرايد دا ما بمشي علينا.
حاتم محمد احمد ضرب الحكم (بونية)..محمد علي كلاي ما بنفذها بالاحترافية التى نفذها بها حاتم محمد احمد.
نحن شفنا (البونية).
والضرب حصل قدامنا.
ما معقول بعد (البونية) دي ..يطلع لينا واحد من ناس المريخ ويقول لينا حاتم ما ضرب الحكم.
طيب ضرب منو؟.
يكون ضرب ليه تلفون ساكت.
لو الضربة دي ما (بونية)..البونية بتكون شنو؟.
غايتو تلفزيونا دا مرات بقطع ليه (ضربة جزاء) من رأسه.
بجيبها ساكت كدا.
عندنا (طبق) مجنون ..بجيب ليك (مصعب عمر) بيضرب داخل خط 18 في مهاجم الكوكب المراكشي.
والله دي طبق بيض ما بعملها.
والريسيفر (المكشكش) حقنا دا بجيب لينا بحيت خميس بشد في مهاجم الكوكب المراكشي من قميصو.
الكلام دا كلو ما من لاعبي المريخ.
عداكم العيب.
الكلام دا من (تلفزيونا).
تلفزيونا (مدروش) عديل كدا.
تلفزيونا مطرطش.
مرة كنا قاعدين نحضر في المسلسل ، قام تلفزيونا جاب لينا ناس نقد والرشيد المهدية قاعدين يحللوا.
قلنا ليهم ديل بحللوا في شنو؟.
قالوا لينا بحللوا في قطوعات الكهربة.
ما عرفنا المشكلة وين؟.
من القطوعات وإلّا من تلفزيونا.
عشان كدا جرية علاءالدين يوسف دي ما تستبعدوا تكون حركات من بتاع الدكان ساكت.
يعني احتمال ..بقول (احتمال) علاءالدين يوسف ما جرى…يمكن الجرى دا يكون معاوية فداسي.
واحتمال (بونية) حاتم محمد احمد دي (خيال) ساكت.
بونية البرير نحن ما شفناها.
لكن بونية حاتم محمد احمد دي اي زول شافها.
زمان دخلنا السينما ..قلنا نحضر لينا فيلم هندي.
كانت الحركة دي عندنا كل خميس.
مشينا السينما.
قعدنا قدام.
بطل الفيلم مات في المشهد التاني.
اتغظنا في الدنيا دي غاظة شديدة.
طوالي طلعنا من السينما وقلنا لبتاع التذاكر عاوزين قروشنا ..انتوا وقت بتكتلوا لينا (البطل) من المشهد التاني ..نحضر ليكم شنو يعني؟.
البطل مات ..فيلكم دا نتمو ليكم (نشرة جوية).
شفتوا انا جني وجن (خيانة) الافلام الهندية.
الواحد فيهم تلقى عندو (صلعة) ..وما بموت ليك إلّا في اخر الفيلم.
بعد روحك ما تتطلع.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
في واحد اقترح حاتم محمد احمد يشارك في اولمبياد البرازيل.
ممكن يمثل السودان كويس في (الملاكمة).
وكان لي علاءالدين يوسف …الزول دا بي بساطة كدا ممكن ينافس ابوبكر كاكي.
كاكي ظهر ليه منافس خطير.
مساكين الصدمة عليهم شديدة.
طاروا مرتين.
نحن الحمدلله طرنا مرة واحدة.
المريخ طار مرتين.
الابطال طاروا.
الكونفدرالية طاروا.
حكايتكم دي عارفنها زي شنو؟.
زي اليوم العالمي للطيران.
طيران مركب.
مرة طاروا في الجزائر.
ومرة طاروا في المغرب.
عارفين تونس طار منهم شنو؟.
تونس طار منهم شيبوب.
تاني فاضل ليكم شنو؟.
ما خليتوا لينا حاجة نقولها.
كملتوا الكلام.
………
و
اعادة قيد مدثر كاريكا بتستحق ليها عمود براها.
عشان كدا كاريكا بنرجع ليه ان شاءالله في برمجة خاصة.
كرت شيبوب ذاتو عاوز ليه يوم مفتوح.
واتير توماس.
ويونس الطيب.
ايه الحلاوة دي كلها.
تتخيلوا الحاجات كلها من غير (الجوهرة الزرقاء).
والمريخ بي حالتو دي سوف يواجه هلال كادوقلي.
وسوف يواجه اهلي شندي.
والهلال.
والله كان ارحم ليكم الكونفدرالية.
تاني ما في طريقة هروب من الممتاز.
ما في حاجة بتمرقكم منو.
قالوا ليك حافز تسجيل شيبوب ….مواجهتو للمريخ يوم 20 يونيو.
راجيكم (جري) تقيل.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
……..
السيدة (ل) – لو قلت ليك بتصدقي .. من هسع بقيت افكر في عيد الفطر ..عشان (خبيزكم) الخطير داك.
وقرّط على كدا.