زواج سوداناس

سبعة صلايع والبخت ضايع


شارك الموضوع :

> عندما نتحدث عن الاستثمار لا نتحدث من فراغ > فأي حل لا يشتمل على الاستثمار كهدف أساسي ببقي علوق شدة ساي > والاستثمار الذي نقصده يشمل الاستثمار بشقيه > الاستثمار العقاري لان استثمار أنسب منه في هذا البلد مافي > فالتصنيع له مشكلاته وعراقيله التي حولت المصانع لمخازن ودكاكين وأوقفت الأمل فيه حينما وقف المكن بأمر رسوم الإنتاج والآتاوات صاحبة المسميات المتعددة > والاستثمار الزراعي هو أُس البلاء والابتلاء في وطن يفشل فيه أكبر مشروع زراعي في إفريقيا > دولة كان مشروع الجزيرة > بل نجد أن الملكة في انجلترا لو سألوها ماذا قدمتم > لقالت بكل فخر > قدمنا مشروع الجزيرة وسكك حديد السودان > اما الاستثمار التجاري فحدث بلا حرج > اذا قمت باستيراد سلعة وحسبت تكلفة الوحدة منها الى ان تصل دكانك > ثم وضعت ارباحك عليها بعد خصم نصيبها من الرخصة،التجارية والضرائب بكل مسمياتها والمطافي والنفايات والزكاة وحق الخفير > تجد مثلاً أن بيع الوحدة من تلك البضائع بهامش ربح بسيط لا يقل عن العشرة جنيهات مثلاً > بفرض أن التكلفة تسعة ونص والربح نص > ولكنك قطعاً ستضطر للخسارة عندما تعلم أن جارك يبيع نفس الصنف المستورد من نفس الدولة ومن نفس المصنع والذي وصل بنفس الباخرة ودخل بنفس الميناء عن طريق نفس المخلص وتم ترحيله لام درمان على نفس البطاح بنفس السعر وفي نفس اليوم في نفس السوق > تجد جارك يبيع تلك الوحدة بتلاتة جنيهات > يبقى في شيء ما مفهوم يجعل من الاستثمار التجاري ضرباً من ضروب الجنون > لذا لابديل غير الاستثمار العقاري من جهة > ثم الاستثمار في الإنسان > لان اهم عناصر الإنتاج هو الإنسان > فماليزيا نجحت لأنها استثمرت في إنسانها > تعليم وصحة وتهيئة ظروف البحث العلمي وتوفير الخدمات التي تجعل الإنسان لا هم عنده سوى الابداع والاكتشاف فيصبح بشراً خلاقاً > ايها الناس > الاستثمار هو ما يلزمنا كضرورة حالية لنسند المريخ ونضمن له مستقبل مستقر > فأي حل وقتي يأتي بالأموال متدفقة دون تفكير في غد ببقي ليس حل وإنما مسكن لورطة جديدة > وإدمان المسكنات يجبر مدمنها على تغيير الجرعة بأعلى منها ليتخدر > ولكنها لا تشفي > يبقى حل المشكلة ليس في علوق الشدة الذي سيقف معه حمارنا على عقبة المنصرفات العالية > وإنما الحل في من يقود النادي نحو استثمارات تضمن له البقاء بكرامة وقوة في المستقبل > الحل في من يجعل من النادي قوة استثمارية ضاربة تجعله غير مجبر على تنفيذ تدخلات الدولة في الشأن المريخي > وليس مجبراً على قبول أية لجنة تأتي بها امانة اي شباب في البلد بي مزاحها > فكل اللجان تلوح لها امانة الشباب بكرت الدعم > ولان الاندية لا تملك استثمارات تستجيب لتلك التلويحة ويسيل لعابها لذلك الكرت > ايها الناس > الاستثمار الاستثمار الاستثمار الاستثمار الاستثمار > والخروج من لجنة تسيير للجنة تسيير هو تفسير للماء بالماء > هو في ماء؟؟ > آها > ناس روشا عملوا زي جحا > جحا قاعد جمب بيتهم اي زول يقول ليهو بهناك في الشارع داك في ربة كبيرة > انتشرت اشاعة جحا واصبح الناس يتوافدون صوب الشارع داك جماعات جماعات > وبرغم ان جحا هو مصدر الاشاعة > إلا انه لما شاف الناس ماشه ارتال > قال يمكن يكون الكلام ده جد > دخل الكرسي وقفل الباب وجرى لحق الناس في الشارع داك > لما وصل ما لقى حفلة ولا حاجة > ده العملو روشا > كتب للناس الهلال الجديد الهلال الشديد شيبولا وشيبون > المدرب صائد البطولات > الخطة الجهنمية > ابو عاقلة في الخانة الجديدة > سادومبا زي الغزالة والطاهر سادومبا يتحدى > موعودون بسهرة رائعة ولا تفوتكم الفرصة > روشا لما شاف الناس ماشة كيمان كيمان > بالذات واي هلالابي عطشان > ناس من يناير عيد الاستقلال حمامهم طار > روشا قال يمكن صحي > قفل الجريدة وجرى الاستاد > لقى الكشافات ضعيفات > لقى المستوي سجم رماد > سادومبا عكسوا ليهو كورة في خط ستة ارضية > رفع كرشو عشان يشوف الكورة > عبرت بين دهشة ما شافو روشا وما كتبو روشا > الطاهر سادومبا يا هو الطاهر سادومبا > انقلعت منو قربت تدخل قون وصاحبنا راقد في واطات الله دي > اما شيبولا فالناس بتسأل شاطبين شيخ مكورو ليه؟؟ > وما اضحك الناس شيبوب > وصلتو تسعة كور وقع حداشر مرة > سموهو سيقوط يا روشا > تيمنا بالسقوط الكتير ده > لكن الهلال الجديد احسن من الهلال القديم ياروشا > لأنو الهلال القديم اتغلب من قورماهيا والهلال الجديد درن مع سانت جورج برغم انو سانت جورج مطرود منو زول وعندو بلنت اخطأ الحكم في عدم احتسابها لكنه لم يظلم سانت جورح > روشا > الهلال يا هو الهلال > والتحكيم يا هو التحكيم > والصفر يا هو الصفر > والفريق اتملي صلع ساااي > سادومبتين عندهم تلاتة صلع > وكردنة الرابعة والباشمهندس الخامسة > السادسة حلقها فداسي براهو > والسابعة مدسووووسة > سبعة صلايع والبخت ضايع > وعاد الاهلة بخفي حنين > ايها الناس > لعب الهلال على ارضه ولكن ما بين جمهوره > لأنو الحبش في البلد دي اكتر من جماهير الهلال > فكان الهلال غريباً على ارضه > ايها الناس > الحلول عندنا ليست في الاساءة للآخرين > اي زول قدم قدرتو وطرح فكرتو > ومافي زول اصاب كل النجاح ومافي زول الفشل كان عنوانه المطلق > لكن الشكر واجب لاي زول جك جكتو > والاستفادة من تلك التجارب هي طريقنا نحو النجاح الذي يقوم علي اكتاف الاستثمار > ايها الناس > ان تنصروا الله ينصركم > اها > نجي لي شمارات والي الخرتوم > كان شفت يا والينا > رمضان من ناحية جايينا جايينا > عندك كهربا لينا؟ > الموية في المواسير بتكفينا؟ > السكر برخص لينا؟ > سعر اللحمة بنزل لينا؟ > ولا اخير نشوف دكتور يفطرنا ويحن علينا؟ سلك كهربا ننساك كيف والكلب قال خايفين من رمضان وهو الشهر الوحيد البتاكلوا فيهو.. السنة كلها غير رمضان ختيتوا صينية متين؟ والي لقاء سلك

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *