لو الوزير رجّع ليكم (جمال الوالي) برجّع ليكم (شيبوب)؟؟

مريخابي قال : سادومبا رفع ليه ضغطو.
قلنا ليه انت لو عندك احساس ..ضغطك يرفعو ليك علي جعفر.
علي جعفر شايل ليه (مليار) عشان يمشي يسخن بيها في (المغرب).
المليار دي لو لقاها (سلك) – في شارع الاربعين بيسخن ليكم.
ولا في داعي للمغرب.
الستخينة ناس اسامة ونسى بيدفعوا فيها (مليار).
الفريق الذي اخرج المريخ من دور الترضية سوف يهبط للدرجة الثانية في المغرب.
فضيحة السواد.
متل الخميس البيقع تلاتاء.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).

الزعل والاستقالات البقدموها في المؤتمرات الصحفية ويسحبوها في مكتب
الوزير – انتوا قايلنها من شنو؟.

من شيبوب.
السبب شيبوب.
كلو من شيبوب.
يقدموها السبت ويسحبوها الاحد.
الاستقالة عندهم زي (علبة الحلاوة) – يقدموها ويسحبوها.
الفوضى التى يعاني منها المريخ الآن السبب الاول والاخير فيها شرف الدين شيبوب.
الموضوع ما بدس.
كلو من شيبوب.
ارتفاع الدولار.
قطوعات الكهرباء.
ارتفاع السكر.
كلو من شيبوب.
ملامح شيبوب – حايمة في شوارع ام درمان.
واقفة لينا في بوابة عبدالقيوم.
المغصة عاوزة تشق المريخاب.
المريخابي الما عندو مصران – الايامات دي يلاقيك يقول ليك والله عندي
(طعنة) هنا ما عارفها من شنو؟.

من شيبوب يا استاذ.
مغصة (الشغيل) الشطبوه براهم – لسه ما طلعت – جاتهم مغصة شيبوب
القلعناه من كشف المريخ قلع.

وبالحيل صعب فراق الزول بعد ما يوالف.
جربتو ليكم زول يلاقيك شايل ليه تلفزيون ..يقول ليك اشتري التلفزيون دا.
تقول ليه التلفزيون دا كويس ..يقول ليك والله التلفزيون دا ما فيه اي
حاجة بس (صورتو) ما نضيفة.

هو التلفزيون شنو غير (صورة)؟.
وقت صورتو ما نضيفة اعمل بيه شنو؟.
لاقيتو ليكم زول بيعرض ليك (موبايل)..تقول ليه الموبايل دا كيف؟..يقول
ليك الموبايل دا ما فيه اي مشكلة – بس (شاشتو) حرقانة.

هو الموبايل شنو غير (شاشة)؟.
وممكن زول يقول ليك والله عروستو ظريفة بس كبيرة شوية.
وكبيرة شوية دي في الحالات الزي دي – يعني عمرها (61) سنة.
طبعا بالكريمات ممكن تنقص (9) سنوات.
لكن في السودان دا الكريمات بتنقص النسوان (9) سنوات – وزيادة الاسعار
بتزيدهن (14) سنة.

انبوبة الغاز الصباح بي سعر.
والمساء بي سعر.
تقول المساء بتمشي الكوافير.
ناس المريخ هسع فريقهم بقوا يقولوا ليك عاوز ليه مجلس ادارة جديدة.
ما عارف انا المشكلة في جمال الوالي – ام في شيبوب؟.
قولوا الوزير رجع جمال الوالي – برجع ليكم شيبوب؟؟.
انتوا مشكلتكم (شيبوب).
الجقلبة البتعملوا فيها دي سببها (شيبوب) – وعاملنها في جمال الوالي.
ما عاوزين تعملوها واضحة.
شايفنها شينة لو قلتوا السبب (شيبوب) – عشان كدا شالها ليكم (جمال الوالي).
تمارين المريخ فيها (13) لاعب.
غايتو اهلي شندي إلّا تلاقوه في صالة مارينا.
في استاد – اصلو ما بتقدروا عليه.
تمارين المريخ فشلها (شيبوب).
المريخاب نفسهم مرقت من الكورة.
مرة يقولوا ليك المريخ عاوز ليه مجلس ادارة جديدة.
ومرة يقولوا ليك عاوز ليه جهاز فني جديد.
ومرة يقولوا ليك عاوز ليه لعيبة.
عاوزين (تيم) كامل.
خليتوا شنو لجزيرة الفيل بعد كدا؟.
جمال الوالي مرق من نفس المريخاب ..من يوم ترك لاعب في قيمة وموهبة شيبوب (هاوي).
يا الهاوي يا الهاوي – عبدالرحمن عبدالله عندو اغنية بالشكل دا.
بقول فيها يا الهاوي يا الهاوي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).

اسامة ونسى اصبح غير مرغوب فيه في المريخ منذ ان جلس مع شرف شيبوب
الصباح ..والمساء شيبوب رجع لاشرف الكاردينال.

قعد معاه للصورة.
يعني التفريط الاول في شيبوب ..الذي غادر بسببه شيبوب الى (جوبا) ،
السبب الاول فيه كان جمال الوالي.

التفريط التاني في شيبوب والذي غادر بعده اللاعب الى شيبية القيروان في
تونس السبب فيه اسامة ونسى.

رئيس خلاه (هاوي).
ورئيس قعد واتصور معاه وسلمو الكاردينال.
اصلو ما قصرتو معانا يا مريخاب.
عبدالحي عبدالتام اتصور مع اللاعب في المطار – تقول عاوز يطلع ليه (جواز سفر).
والكاردينال استلم اللاعب بعد ذلك.
الكاردينال قال ليهم اتصوروا معاه ..وجيبوه لي.
الكسكتة جاهزة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).

الوضعية التى فيها المريخ الآن – اصلها ما سببها مجلس الادارة.
الموضوع ما (امر قبض) طلع على اسامة ونسى.
الحكاية ما قروش.
ولا هي رغبة في عودة جمال الوالي من جديد.
الموضوع كلو (شيبوب).
لو شيبوب رجع المريخ المشاكل دي كلها ممكن تتحل.
المريخ من البطولة الافريقية الكبري ما كان طلع – ناهيك يطلع امام فريق
هبط للدرجة الثانية.

المريخ في حالة توهان.
العيشة صعبت عليهم.
والحياة ذاتها مسخت ليهم.
هذه الحالة ما عندها تفسير غير ظهور شيبوب في (الهلال).
شيبوب ظهر في الهلال ومعاه سادومبا كمان.
صدمة واحدة ممكن تكتل ليها مريخابي.
ديل بقوا اتنين.
سادومبا وشيبوب.
وشيبولا قاعد يفرفر هناك.
ديل يتصرفوا معاهم كيف؟.
بقت عليهم ميتة وخراب ديار.
مريخابي قال لي نحن سادومبا ممكن نصبر عليه – باعتباره ولدكم.
ما غريب عليكم.
لكن شيبوب دا نتصرف معاه كيف؟.
الواحد بقى يقوم من الصباح بي صداع.
لا يعرف الصداع من شيبوب لا يعرفو من سادومبا.
قلت للمريخابي لو صداعك نصفي من سادومبا.
لو صداعك كلي ..من شيبوب.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).

المريخاب لو جمال الوالي رجع ليهم ما بحل مشكلتهم.
المريخاب ديل إلّا يرجع ليهم (شيبوب).
ما تعملوا الحكاية كلها في (اليسع).
اليسع ما قال ليكم سجلوا شيبوب (هاوي).
………….
و

في زيادة ح تحصل في البطيخ.
برضو قولوا السبب (شيبوب).
والتلج الايامات القادمة ح يطير السما.
قولوا السبب شيبوب.
والليمون.
الكوم قالوا بقى بي عشرة.
ناس الصدي قالوا الوك رجع يشارك في تمارين المريخ.
عليكم الله يا ناس المريخ خلوا الوك يتصور مع عبدالتام.
ويقعد مع اسامة ونسى.
عشان الموضوع يبقى سلسل شوية.
المريخ بوضعه الحالي هل سوف يلعب امام الاهلي شندي يوم 15 يونيو ..ام
ان الاتحاد بشوف ليه مخرج للمريخ.

يمكن يعيدوها.
يعيدوها كيف وهي في الاصل ما اتلعبت.
غايتو جمال الوالي لو مسك المريخ ..اسامة عطا المنان بعيدها ليكم.
بدون ما تلعب بعيدها.
والمريخ يفترض ان يواجه هلال كادوقلي يوم 10 يونيو.
يعني بعد عشرة ايام.
والمريخ سوف يواجه سيد البلد يوم 20 يونيو.
والناس ديل لغاية الآن ما عارفين رأسهم من كرعينهم.
شيبوب وسادومبا لو قابلوكم بي حالتكم دي ..استنجدوا بي (زيكو).
القمة القادمة عاوزة ليها (زيكو).
زيكو او حاتم محمد احمد.
ناس علي جعفر ديل ما عندهم خبرات للموضوع دا.
بالمناسبة ..ترقبوا قرار الاتحاد الافريقي.
وافتحوا عينيكم.
الموضوع استوى خلاص.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).

……..
السيدة (ل) – شاي اللبن لو عاوزنو بدون لبن نعمل شنو؟.
وقرّط على كدا.