وجعة رباب..!!
موجوعة جات..
للقاضى تطلُب فى الطلاق..
من زوج أناني بلا قلب..
خلّاها فات..
والحالة صبحت لا تُطاق..
يا سيـدي طالباهوا الفُـراق..
من زول هرب لى بيتوا ساب..
سألوها وين خلاكي غاب..؟
هل جاكي منو قريب جواب..؟
واللهِ لا حس لا خبر ..
منّى شالوا الاغتـراب..
ولدين وبت..
رابع جنين جوة البطن..
خلاهوا غاب..
أصلاً قبيل كان مغترب..
+++
من أُسرتك ..؟
أو كان قريبك يا رباب..؟
أبداً غريب..
القسمة كانت والنصيب..
فى المدرسة ..والبيت قريب..
بالصُدفة جا..
لي زول مُدرِس عندنا..
شافني في نُص البنات..
منّي حاول يقترِب..
فى يوموا داك ما خلى شئ..
من بيتنا ما ضلّ الدرِب..
سألوهوا هُم..
جاوب سريع ..أنا مُغترِب..
أنا منكم..داير أقترِب..
بالسُنة طالب بتكم..
وافق أبوي..
شاور أخوي..
شان العِرِس..
قال الاجازة خلاص مشت..
وافق أواصل للدرِس..
+++
بعد العِرِس..
يا دوب شهور..
جابوهوا راجع للوطن..
قالوا ممنوع الدخول..
شان السلوك ما كان حسن..
فى كُلوا حول..
كان عندو زول..
خلانا فات..
والفاس وقع فى رأسي بس..
قربت يا مولاي أجنّ..
جيتك وطالباهوا الطلاق..
ضاعت سنيني خلاص مشن..
ولدي الصغير الكان جنين ..
الليلة شاب..
ما شاف أبوهوا المُغترِب..
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة