رمضان جانا
كان علي ان اكتب هذا المقال منذ بداية رمضان ..في البداية خفت من الاتهام بالتغريد خارج السرب ولكن الامر استفحل ..وصار واجبا التدخل ..سجن سجن ..غرامة غرامة ..كل القنوات الفضائية في سباق محموم لاستقطاب اكبر عدد من المشاهدين لمتابعة اكبر عدد من المسلسلات التي تذاع طوال الوقت ..كذلك تتنافس قنوات المطبخ .لجذب انظار الالاف من ربات البيوت اللاتي يمضين اغلب الوقت في رحلات مكوكية بين المطبخ والتلفزيون في محاولة يائسة لابتكار وانتاج اطباق جديدة ..تنال بها نظرة رضا … ..ويمنحها (تمساح الدميرة الما بكتلوا سلاح ) كلمتي ثناء وشكر ….قل ان يجود بهما الزمان …. عزيزتي المرأة ..اليك (الزيت) ..المفيد ..المختصر ..حفاظا على صحتك ووقتك ..اليك يا سيدتي نصائح سعدية النكدية ..للايام الرمضانية ..حتى تصير عيشتك هنية ..اولا بالنسبة للمطبخ ..تقول لك النكدية …مهما جلبت من وصفات ..واجتهدت في طبخات ..مهما حفظت من أسماء مثل (السيمون بوفيه )..و(الكريم شانتيه) ..و(الكريب جورجيه) ..الاخيرة دي اسم قماش..بالله مافي زول يمشي يفتش الوصفة …كل الرجال السودانيين ..ماركة تمساح الدميرة ..على اختلاف مشاربهم ومذاهبهم ..على اختلاف الوانهم واطوالهم واوزانهم ..كلهم بدون فرز ينقسمون الى اثنين (اكلي العصيدة ..واكلي القراصة)…لا ثالث لهما ..ولو اخبرك غير ذلك ..فهو اما مدعى ثقافة ..او ينتوي شيئا في قرارة نفسه ..فاحذري ثم احذري اي رجل سوداني يشتهي غير هاتين الاكلتين او يطالب بغيرهما ..فلا ترهقي نفسك في اعداد ايه.. ومش عارف ايه ..من افكار القنوات الفضائية ..قومي علي عجينك عوسيهو ..والويكة افركيها …وبس خلاص ..بالنسبة للمسلسلات ..اختاري مسلسل واحد للمتابعة ..البقية تشبهه مع تغيير في بعض الاحداث فقط لا غير …كل المسلسلات تبدأ بمشكلة وفي النهاية تتحل المشكلة والخاين بيدخل السجن او يموت ..والبطل يتزوج البطلة ويعيشوا في تبات ونبات ..تشابه المسلسلات انتبهت اليه باكرا ..كنت اتابع مجموعة من المسلسلات في وقت واحد ..كان زوجي يحضر في اثناء احداها ليقول (انتي الزول دا مش مات امبارح؟ )..ارد قائلة (لا ياخ داك مسلسل تاني ..دا نفس الممثل بس هنا اسمه عادل ..وهناك اسمه خورشيد)…او يسألني قائلا(الزولة دي عرست الصباح ..اجي المساء القاها حبوبة؟)..ياخ داك مسلسل تاني …حتى كان يوم ..توقف زوجي فجأة وهو في طريقه للخروج ..سألني بجدية (عايز أسألك سؤال مهم جدا ..تجاوبي عليه بصراحة شديدة وانا ما حأزعل منك )..توجست خيفة ..يا ربي الراجل دا مالوا؟ ..قال لي بكل هدوء (انا عايز اعرف انتي بتقدري تتابعي كل المسلسلات دي بدون ما تلخبتي بينها كيف؟؟ ) انفجرت ضاحكة ..لكنني في ذلك الوقت توصلت الى هذه الفكرة ..كل المسلسلات واحد ..لذلك اختاري واحدا لمتابعته ..وترشح لك النكدية مسلسل الساعة العاشرة بعد العودة من التراويح ..عشان تنومي بدري وتقدري تركزي وتنتبهي بتحركات تمساح الدميرة …ما يغشوك ويشغلوك بمتابعة المسلسلات وقنوات المطبخ ..وتنشغلي عن متابعة تحركات ادم …فتحي عينيك ..اني لك من الناصحين
د. ناهد قرناص
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
تابعت لقاء معك في إحدى القنوات
وكان شكلك مختلفا تماما …إذن لماذا تصرين على وضع هذه الصورة الكئيبة ؟
فعلا كما ذكرت …الرجل السوداني لا يتقبل التغيير بالهين …ياها قراصتنا أو عصيدتنا ولا ثالث لهما …وأحينا قد يكون هناك ثالث
الفول حبيب الشعب !!
جمعني واحد من القروبات بواحدة من بنات حواء …تحكي عن كيف أرادت أن تغير العشاء …فقامت وتشمرت وعملت كيكة رهيبة
وجاء تمساح الدميرة كما وصفت …ووضعت كيكتها بفخر مع كوب معتبر لشاي بالحليب
عمك شفط الشاي وتلمظ بطعم الكيكة ، ثم مسح فمه والتفت إليها سائلا : أها الليلة العشاء بشنو ؟
فخرجت عيونها من محاجرها وردت عليه : أومال دا كان شنو ؟
رد عليها ياخ مافي فول ؟
برضو كتر خيرك ما قصرت ان شاء الله الحريم يفهمو كلامك دا ويعملو بيهو .. ولا احسن اقول ليك كلام غير كلامك دا مسلسل شنو عليك الله في رمضان دا والله حاجة غريبة كان الله في عون المشاهدين كل الشاشات حريم وكلها تبرج وما فيها حاجة مفيدة نهائيا كلها غنى في شهر قال الله تعالى عنه وهو يمدحه ( شهر رمضان الذي انزل فيه القرآن هدى للناس وبينات من الهدى والقرآن ) صدق الله العظيم .