محمد عبد الماجد

شيبولا طلع بحب (سليقة) الحمام


من رأسي:

شيبوب لعب (5) دقائق فقط – ناس المريخ قالوا ح يمشوا (الفيفا) – لو لعب ربع ساعة …كان ح تعملوا شنو؟.

كان ح يمشوا المحكمة الجنائية.

من كراسي:

(هم في الغرب ليسوا عباقرة ونحن لسنا أغبياء؛ هم فقط يدعمون الفاشل حتى ينجح، ونحن نحارب الناجح حتى يفشل!).

بي صراحة نحن الفلهمة ما بندورها …(الشوربة) بنقول ليها (سليقة)….كلام ناس الخرطوم ما بنفع معانا.
سليقة سليقة.
خاصة لمن يكون عائم فيها (عضم).
لمن تكون كاربة كدا بي عضامها بنقول عليها (سليقة) ليها (ضل).
في ناس بتحسسوا من كلمة (الضل).
بيتعقدوا – وبيشعروا بالحرج.
عليكم الله انتوا لو ما (ضل) في اربعين لقاء في الممتاز فزتوا فقط على الهلال (6) مرات ..مقابل (18) انتصار للهلال.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
حقيقة كدا ومن حيث المبدأ وقطوعات الكهرباء …(حمام) امس الاول دا كان فيه (سليقة) عجيبة.
واضح ان شيبولا بحب سليقة الحمام.
الكلام دا واضح من هدفو الاول.
حمام يتقدم في الدقيقة اربعة ويطلع خسران من الشوط الاول.
وقدر ما يعمل في الشوط التاني ما يقدر يعادل النتيجة.
حمام امس الاول (شوربة) كتيرة عليه!!.
دي (سليقة) حمام (دافئة).
قبل ما اخش وادخل ليكم على الموضوع …عشان ما انسى ، امس الاول (النعسان) دا كان (نائم) عديل.
نعسان شنو؟…زولكم دا لو تم نومتو كان احسن ليه.
عليكم الله انتوا لو ما ساي …ضفر (الصاحي) وعيونو (مفنجلة) شرارة حمراء ما عمل حاجة…عاوزين خالد (النعسان) يعمل ليكم شيء.
الناس المصحصحة عملت شنو؟…عشان تتكلوا ليكم على زول (نعسان).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الخطاب الاعلامي (المشترك) لاعلام المريخ ..بعد المباراة اتفق كله على ان الهلال يستحق الانتصار.
وان المريخ يستحق الخسارة.
وكلهم قعدوا يبرروا ليك … كلهم قالوا الهلال كان مستعد كويس وعندو وفرة في اللاعبين واستقرار في الادارة وفي الجهاز الفني.
يا جماعة.
معقولة دا كلامكم.
نفس الجماعة البقولوا في الكلام دا ..يوم المباراة كانوا بتكلموا وبقولوا انهم يخشوا فقط من (التحكيم).
وان المريخ قادر على الفوز على الهلال والتحكيم.
بعد المباراة اعترفوا بافضلية الهلال …وعملوا جميعا لتبرير الخسارة.
الحقيقة ان مبررات اعلام المريخ واهية …عن اية جاهزية يتحدث اعلام المريخ؟.
المريخ خرج من دور الترضية في بطولة الكونفدرالية والهلال سبقه بالخروج من البطولة الافريقية منذ فترة طويلة.
يعني المريخ بحكم المشاركة الافريقية هو اكثر جاهزية ، لأنه لعب في مرحلة الـ (32) ولعب امام وفاق سطيف مبارتين ولعب امام الكوكب المراكشي في الكونفدرالية مبارتين.
اي ان المريخ يتفوق على الهلال في ان المريخ توفرت له (4) مباريات افريقية قوية بعد خروج الهلال.
خروج الهلال من البطولة الافريقية كان قد القى بظلاله على الهلال ، حيث تصدع البيت الهلالي وتم انهاء عقودات اربعة محترفين.
هذه الوضعية …تعني ان الهلال لم يكن مستقرا وانه عان كثيرا حتى يصل الى هذه المرحلة.
الهلال منذ شهر نشاط مبارياته الرسمية متوقفا ..بسبب مشاركة المريخ في البطولة الافريقية فقد لعب الهلال امام الخرطوم الوطني بعد شهر (راحة).
هذه الراحة السبب فيها كان المريخ الذي طالب بتأجيل مبارياته وترحيلها الى ما بعد التسجيلات نسبة لضغط المباريات.
توقف الدوري الممتاز وتعطّل من اجل المريخ …فهل عندما ينتصر الهلال يحسب ذلك التوقف لصالح الهلال.
انتوا قريتوا وين يا عالم؟.
ايقاف الدوري وتأجيل المباريات قرار اختاره المريخ ..حيث رفض المريخ ان يلعب مباريات الدورة الاولى في وقتها وكان نتاج ذلك ان تلعب المباريات بعد فترة التسجيلات.
تم ذلك من اجل المريخ…الذي فضل (الراحة) على المباريات المضغوطة.
يعملوا ليكم شنو؟.
الدوري يلعب ويستمر تقولوا المباريات مضغوطة.
الدوري يتوقف تقولوا الراحة أثرت سلبا على المريخ.
قبل توقف الدوري المريخ كان قد تعادل مع الخرطوم الوطني وخسر امام هلال الابيض.
وبعد عودة النشاط خسر المريخ من الهلال.
يعني في الحالتين ..انتوا ما عندكم شيء.
مقولة الهلال مستقر فنيا اكثر من المريخ ايضا مقولة غير صحيحة ..حيث اشرف على الهلال في النصف الاول للممتاز الفرنسي كافالي وهيثم مصطفى ثم المصري طارق العشري ومبارك سليمان ، ثم مبارك سليمان وهيثم مصطفى واخيرا الروماني بلاتشي ومبارك سليمان.
وينو الاستقرار دا؟ …المريخ انتقل من البلجيكي ايمال لوك الى برهان ومحسن سيد؟.
المشكلة وين؟.
عن اي استقرار فني يتحدث اعلام المريخ …انتوا بتغشوا في جماهيركم ساكت ..وبتخدروا فيها وبتبرروا في الهزيمة.
اعلام المريخ قال ان علاءالدين يوسف وبكري المدينة وعنكبة شاركوا في المباراة تحت (التخدير).
والحقيقة ان (المخدر) هو جمهور المريخ.
جمهور المريخ يعرف ان مباراة القمة هي المباراة الثانية لبلاتشي مع الهلال على النطاق الرسمي بينما يخبر برهان تية ومحسن سيد المريخ ولاعبيه واندية الممتاز.
حقيقة الامر ان اعلام المريخ يبحث عن مبررات للجنة تسيير جمال الوالي (بص الوالي) ، لأن هذه الظروف التى لعب بها المريخ امام الهلال عندما كان يخسر بها في الدوري كان مجلس اسامة ونسى يتعرض لهجوم وانتقاد شديد من اعلام المريخ.
اعلام المريخ يتحدث عن مشاركة عناصر جديدة على المريخ وبعيدة عن المشاركة مثل صلاح نمر وصابر عطرون.
طيب يا ناس المريخ (شيبولا) دا بيلعب في الهلال من سنة 1940.
العناصر الجديدة في المريخ بعتبروها (مشكلة) ، وفي الهلال بعتبروها سببا في الانتصار.
شيبولا ايضا هو جديد وهو لاعب اجنبي ومازال يحتاج الى الوقت للتجانس والدخول في الفورمة.
سادومبا نفسه شارك مع الهلال بعد ان كان متوقفا اكثر من (6) شهور عن المشاركة في المباريات الرسمية وقد اتضح ذلك في وزنه الزايد.
مع ذلك ..وبكل تلك العناصر استطاع الهلال ان يحقق انتصار على المريخ.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الغريبة ان اعلام المريخ كان بيسخر من عودة سادومبا وبيعتبرها (كارثة) في الهلال ، وقد سخروا من سن سادومبا وقللوا من خطورته.
كيف اصبح سادومبا هذا (الطاعن في السن) الآن هو سبب في انتصار الهلال؟.
اعلام المريخ كان يتحدث في ايام مجلس اسامة ونسى عن مشاكل المريخ باعتبارها مشاكل (مادية) وان المال اذا توفر كل مشاكل المريخ سوف تنتهي.
الآن بعد ان اشرف جمال الوالي على المريخ المشاكل كلها ردت على انها مشاكل (فنية).
الهلال طوال الفترة الماضية كان يجري تمارين وبعض المباريات الاعدادية وهي غير كافية ليصل الهلال الى الفورمة التامة وقد ظهرت الكثير من السلبيات في الهلال امام الخرطوم الوطني وامام المريخ ، لأن المباريات الرسمية هى وحدها القادرة على رفع المستوى وكشف حقيقته.
قد تكون الحسنة الكبيرة للهلال في الفترة الاخيرة ، هو الانضباط والحسم الذي فرضه الجهاز الفني ودائرة الكورة على الفريق فبدأ الهلال اكثر احترافية.
نحن شعرنا ان تمارين الهلال فيها جدية كبيرة وانضباط ..ولاحظنا كيف كان مدرب الهلال الروماني يبعد اي لاعب يحس بانه متراخيا او مستهترا الى الرديف.
هذا الامر رفع روح التنافس في الهلال وجعل (الانضباط) هو الفيصل في الهلال.
في الوقت الذي تفشت فيه (الفوضي) في المريخ …حيث يتمرد لاعبين ويدعى بعضهم الاصابة ويشاركون في المباريات على مزاجهم.
لا بد من الاشادة بالانضباط والالتزام والاحترافية التى اصبحت في الهلال في الفترة الاخيرة.
لذلك عندما تقدم المريخ …كان سهلا على الهلال ان يعادل النتيجة ثم يفوز.
لولا الانضباط والمسؤولية لما تحقق (الانتصار) للهلال.
المريخ بعد تقدمه فشل في المحافظة على هدفه ثم فشل على المحافظة على التعادل بعد هدف شيبولا …وفشل في الشوط الثاني من تعديل النتيجة.
هذه الاشياء تثبت الفوضى التى تضرب المريخ.
تلك الفوضى هي فوضى (ادارية) في المقام الاول.
لذا يجب ان توجه سهام الانتقاد لمجلس جمال الوالي ..وللسلطة التى اتت بهذا المجلس ومنعت ممارسة ديقمراطية لجمعية المريخ العمومية.
الاموال لا تحقق البطولات…المريخاب انفسهم جربوا ذلك.
سوف يعاني المريخ كثيرا مع هذه اللجنة التى تتكون من (26) عضو.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………..

و

زمان …كانوا بقولوا ان المشكلة الوحيدة في المريخ في مجلسه.
وكانوا بيعتبروا ان الحل يتمثل في عودة جمال الوالي.
عاد جمال الوالي وظهر المريخ بشكل اسوأ مما كان عليه.
………..
السيدة (ل) – عندنا محاولة مع السُلطة نعمل لينا اسبوع ثقافي لسلطة الروب وقت تعمليها براك.
وقرّط على كدا.


تعليق واحد

  1. يا سلام عليك انت يا رائع وانت تنبري لهؤلاء الصهاينة فتجلدهم بسياط يراعك..فتجعلهم يغلون كالمرجل …خاصة ..صاحبنا ابصلعة داك البقي مقاول الايام دي….