زواج سوداناس

اوعي تغير المحطة


شارك الموضوع :

اوعي تغير المحطة – محمد عبدالماجد 26 يونيو 2016

888 views مشاهدة
أخر تحديث : الأحد 26 يونيو 2016 – 4:09 مساءً
اوعي تغير المحطة – محمد عبدالماجد 26 يونيو 2016
بدل (شيبوب) مفروض تشتكوا (مصعب عمر)..شيبوب (نطه) من الرابع ومصعب (نطه) في شيبولا
لو اسامة ونسى رئيس للمريخ كانوا قالوا ضربة الجزاء ارتكبها (الطاهر الرشيد).
تراوري في (مالي) يبقى لحين السداد وجمال سالم اتلخبط في (الصلع)
تشكيلة (اغاني واغاني) المشاترة مهاب وعصمت وبركات وامنة ورانيا ورندا هل وضعها (محسن سيد)؟
لجنة تسيير المريخ.. (26) عضو كلها (مساعدين) للرئيس (طرف شمال) واحد ما فيها
طه سليمان يغني ويقدم ويمثل ..السنة دي ما فاضل ليه إلّا يكون (عضو) في لجنة تسيير المريخ
من اول السطر

والي الخرطوم (غلطان) ..لجنة التسيير بتاعة المريخ كان يعين فيها (طرف
شمال) بدل (مصعب عمر).
لجنة فيها (26) عضو – وما فيها (طرف شمال)
لجنة كلها (مساعدين) للرئيس …(طرف شمال) واحد ما فيها.
مساعدين الرئيس عاوزين يلعبوا ليكم.

فهم السؤال

قالوا ليك (ضفر) وقت شاف (الوضعية) والسعادة العايش فيها (شيبوب) هذه الايام ، سأل شيبوب سؤال وقال ليه يا شيبوب النطة من الطابق الرابع
حارة؟؟
قالوا ضفر قال لي (شيبوب) : وصف لي يا شيبوب (نطيط) كيف؟.
صاحبكم – شكلو عاوز (ينط) في نوفمبر القادم.

حكاية غريبة شوية

جمال الوالي هاجم (تراوري) ، وبي شكل غير مباشر هاجم (لجنة تسيير اسامة ونسى) ، وقال ما عارف (تراوري) رجع كيف للمريخ.. نحن كنا قد بدأنا في خطوات شكوته للفيفا.
يا جمال الوالي ..اشمعنا (الانضباط) بتتطبقوه فقط على (تراوري)..ناس بكري المدينة وعلاءالدين يوسف وجمال سالم ديل ما شغالين على كيفهم.
تراوري لو ما دفعتوا ليه (دولاراته) ما برجع ليكم.
تراوري زول واضح وصريح …طبق نظرية (يبقى لحين السداد)..عشان كدا مشى (مالي).
وهو اصلا زول (مالي) شديد.
اقلب الصفحة

انتوا ما تكونوا واضحين وصريحين – بدل ما تشيلوها (موزة) بالشكل دا.
بدل ما تشتكتوا (شيبوب) – امشوا اشتكوا (مصعب عمر) في الفيفا…الفيفا لو
شافت (ضربة الجزاء) التى ارتكبها مع (شيبولا) بتعيد ليكم المباراة.
ولو ما عادتها ليكم ..بتأجل ليكم المباراة.
يقولوا ليكم الكلام الف مرة.
مباراة القمة الاخيرة عملها فيك (مصعب عمر).
صحيح شيبوب (نطه) من الطابق الرابع ….لكن مصعب عمر (نطه) في شيبولا.
حالة شبه

مريخابي بلع ليه (سيخة).
اهلو شالوه وجري على الدكتور….
الدكتور عاين ليه كدا – وقال ليه ..السيخة دي بلعتها متين؟.
المريخابي قال ليه بلعتها مع هدف شيبولا الاول…
الدكتور قال ليه : الحمدلله الما بلعت ليك (شوال) اسمنت.
كرسي فاضي

معليش يا جمال الوالي ..خلينا نقولها ليك عديل كدا.
جمال الوالي قال مجلسو ناقص ..وطالب بضم عضوين لمجلسه المعين.
يا جمال الوالي …الناقص ما مجلسك …الناقص فريقك.
يمكن تكون عاوز ليك عضوين في المجلس – لكن صدقني عاوز ليك (25) لاعب جديد
للفريق الاول.
الرديف والشباب ..ما بنسألك منو.

رسالة خاصة لمساوي وكاريكا وبشه والشغيل وسادومبا

تحويل لاعب في قيمة وموهبة محمد عبدالرحمن لكي يتمرن مع (الرديف) ، قد
يكون امر صعب عليه ، خاصة ان محمد عبدالرحمن وهو في سن صغيرة عاش احساس النجومية بين الاعلام والجماهير.
لذلك من الطبيعي جدا ان يشعر محمد عبدالرحمن بالضجر وان يعلن (الرفض) الذي يصل مرحلة (العصيان) لينقطع عن التمارين ويدخل في (توقف) رسمي.
لا نريد ان نتدخل في قرار المدير الفني للهلال الروماني بلاتشي ..هذا من
حقه ..وما اتبعه المدير الفني للهلال يحدث في كل الاندية العالمية
الكبيرة.
الاختلاف الوحيد قد يكون في ان بلاتشي لا يعرف طبيعة اللاعب السوداني
..لأن قرار مثل هذا القرار قد يؤثر سلبا على اللاعب وقد ينهى موهبة في
قيمة موهبة محمد عبدالرحمن.
لذلك لا بد من مجلس الهلال ودائرة الكورة والجهاز الفني ولاعبو الهلال من التدخل لمعالجة هذا الامر.
على الاقل يجب ان يفهم محمد عبدالرحمن ان هذه الخطوة تأتي من اجله.
محمد عبدالرحمن تعرض لاصابات كثيرة ..وتوقف كثيرا ..هو يحتاج الى ان يعد نفسه بصورة اسلم بعيدا عن الضغط والاعلام والجماهير.
يحتاج محمد عبدالرحمن ان يكون بين لاعبي الرديف ..وهم في سنه ويمكنه من خلالهم ان يصل الى المستوى والفرومة التى تعيده للفريق الاول.
لا خلاف في ان الفريق الاول للهلال يحتاج لمحمد عبدالرحمن بل هو في اشد الحاجة اليه.
لكن الفريق الاول يحتاج اليه وهو معافيا وهو في كامل جاهزيته.
الابعاد للرديف ..لا يعني ان اللاعب اصبح خارج الحسابات ..بقدر ما يعني
ان اللاعب يحتاج الى اعداد وجاهزية اكبر.
لم يبعد محمد عبدالرحمن ويحول للفريق لضعف مستواه او موهبته ..ابعد محمد عبدالرحمن لأن جاهزيته (البدنية) لم تكتمل ..وهذا ما كان يعرضه دائما للاصابات.
اي لاعب في الهلال بما في ذلك مساوي وبشه وكاريكا وسادومبا والشغيل ونزار حامد لو تعرض لا قدر الله اي واحد منهم لاصابة وخرج من الفورمة سوف يحول للرديف.
هذا نظام يتبع في كل الاندية.
محمد عبدالرحمن عليه ان يفهم ذلك ..وعليه ان يعلم ان هذه الخطوة تأتي لصالحه.
اتمنى من الكبار في الهلال القائد مساوي وبشه وكاريكا والشغيل وسادومبا
..ان يكونوا في هذا الوقت قريبين من (الغربال).
هذا هو الوقت الذي يحتاج فيه الغربال لخبرات الكبار في الهلال ..محمد
عبدالرحمن مازال صغيرا وتنقصه الخبرات.
اجسلوا معه ..وناقشوه واسمعوا وجهة نظره ..ليعود محمد عبدالرحمن سريعا
للفريق الاول.
نحن الاكثر (زعلا) وغضبا لابتعاد محمد عبدالرحمن وتحويله للرديف…لكن نعرف ونثق ان الخطوة تأتي في صالح الغربال.
مجلس الهلال ايضا يجب ان ينظر الى الامر نظرة تربوية …رئيس الهلال عليه ان يكون قريبا من الرديف.
يفترض ان يقوم المجلس بتحفيز محمد عبدالرحمن وصلاح الجزولي بما حفز به سادومبا وشيبولا وكاريكا وبشه.
الحافز في هذا الموقف ..يحتاج له الغربال وصلاح الجزولي اكثر من مكسيم وعمار الدمازين ومساوي.
لا بد ان يشمل (الخبر) والحافز كل لاعبي الفريق الاول في الهلال.
اخيرا اتوقف عند صلاح الجزولي الذي تقبل الامر والتزم بتعليمات الجهاز
الفني وهو يقدم الآن ما يؤهله للعودة للفريق الاول.
صلاح الجزولي ايضا لاعب كبير ..وذو قيمة ..حافظوا عليه ..وابقوا قراب منو.

نجمة مربع ارسال

اطرف حاجة …محسن سيد قال فريقه امام الهلال كان ناقص (10) لاعبين..
طيب يا محسن سيد زي ما قال رمضان احمد السيد …انت ناس بكري المدينة وضفر وجمال سالم وعنكبة وعلاءالدين يوسف واكرا وكوفي ومصعب عمر وبخيت خميس ..ديل في مباراة القمة كانوا (رجال خطوط)؟؟.
محسن سيد الظاهر عليه لخبط بين الحاجات.
محسن سيد عاوز يقول الفرق بقى (10) …قال المريخ ناقص (10).

ذكري خالدة

ضربة الجزاء التى ارتكبها (مصعب عمر) مع (شيبولا) – كل ما يلاقيني
مريخابي في الشارع بمنحه (كرت اصفر).
لو لاقني في الفطور …بكرتو ليكم.
حكاية هذا المساء

كل ما افتح قناة النيل الازرق بلقى فيها طه سليمان.
يا قاعد يضحك ..يا قاعد يغني…
والله خايف امشي الفطور في الشارع ..القي ليكم طه سليمان شايل صينيتو ونازل.
اقصد شايل صينيتو وبضحك.
بالله رمضان كلو عملو لينا (ضحك).
مسلسل تركي

منتظر (اول مطرة) تنزل في الخرطوم ..عشان اقول لي والي الخرطوم …خلى لجنة تسيير المريخ تنفعك.
ان شاءالله المطرة السنة دي يكون حدها (النخرة)…عشان نشوف الولاية ح تصرف كيف؟.
كوارع بالشطة

دي قابلتكم…
في زول في الدنيا دي بتسحر بي (كوارع).
ومعاها (شطة) كمان.
في مريخابي عملها واتسحر بي (كوارع) بعد هدف سادومبا في المريخ.
صلعة (سنتر) وجلحات (ناصية)

عارفين الفرق بين (صلعة) ادوارد سادومبا و (صلعة) الطاهر سادومبا شنو؟.
(صلعة) ادوارد سادومبا …(رأس حربة) صريع ..و (صلعة) الطاهر الحاج سادومبا (طرف يمين).
شفتوا فرق (لصلع) دي كيف؟.
نحن اي (صلعة) عندنا بي نظام.
يتخيل لي كدا جمال سالم في المباراة ما كان مركز.
جمال سالم اتلخبط في (الصلع).
الهلال كلو بقى (صلع) ..تقول (مجلس الامن).
(اغاني واغاني) السنة دي زي (الضيوف) الما بتعرف فيهم واحد

وضح تأثير غياب عصام محمد نور وعاصم البنا وطه سليمان ذاتو على برنامج
(اغاني واغاني).
البرنامج هذا الموسم بقدم لينا مجموعة ما بنعرف فيها اي زول …غير (السر قدور) وجمال فرفور.
هدي عربي ذاتها مرات بنعرفها ..ومرات بنقول دي منو؟.
اغاني واغاني هذا الموسم متل (الضيوف) وقت يجوك في البيت وتعاين ليهم (جت) وتلقى نفسك ما بتعرف فيهم اي واحد.
الناس ديل الاختارهم منو؟ …عصمت بكري واحمد بركات ورانيا وامنة ورندا ومهاب – عليكم الله الاسماء دي لاقتكم قبل كدا.
في زول فيكم بعرفها.
المجاملات واضحة في الاختيارات ..وصاحبي وصاحبك ..وشيلني وبشيلك.
تشكيلة اغاني واغاني السنة دي تقول وضعها (محسن سيد) تشكيلة غير معروفة وغير متجانسة ..وما في زول سمع بيها.
اغاني واغاني فقد مكانته وفقد تأثيره ..وبقى ما في زول شغال بيه ..ولو
الجرايد ما بتكتب عن هذا البرنامج ..ما كان في زول ذاتو بيشعر بيه.
النبق النبق

بعد مباراة القمة الاخيرة …. قالوا ليك الحكم الرابع …لقى (ضفر) في
غرفة ملابس اللاعبين بعمل في (النبق …النبق).
ضفر المسكين يكون مفتكر المباراة انتهت على قونو.
رسالة فاضية

الكلام دا ما يطلع من هنا…قالوا ليك السر أحمد قدور ..وقت شاف هدف
(شيبولا) بدون ما يشعر قعد يكورك (هائل …هائل …هائل …هاااااائل يا
شيبولا).
اقيف في الصف

منافسات كاس السودان لا بد ان تتاح الفرصة فيها للاعبي الرديف ..عاوزين نشوف في كاس السودان محمود ام بدة وبشه الصغير ومؤيد الصيني وعماد الصيني وابوحليب وابودجانة وحسن الحرية والكسمبر.
60% من تشكيلة الهلال في كاس السودان يجب ان تمنح للاعبي الرديف او الصف التاني في الهلال.
هم قادرون على الفوز بالبطولة ..لا بد من ان يكون هناك تحفيز لهم بهذه المشاركات.
خاصة ان الهلال يعتبر هذا الموسم هو اعداد رسمي للبطولة الافريقية في
الموسم القادم.
حكاية هذا النهار

جمال الوالي في موقف صعب شديد…
جمال الوالي اذا انتصر فريقه ..مطلوب منه ان يحفز اللاعبين ..ويحفز (المجلس) ايضا.
ناس نادر مالك وعصام الحاج ومتوكل احمد علي ديل براهم عاوزين ليهم (تحفيز).
حصة رياضيات

تاني ..وتاني …(يقولوا ليكم الكلام الف مرة).
محسن سيد قالوا قال عاوز ليه (طرف شمال)…ومساعد للرئيس لاحتساب ضربات
الجزاء للمريخ من برة الخط!!.
صاقعة ناصية

يا جماعة يا شباب في زول وقعت منو قروش هنا؟؟؟.
مالكم كلكم رفعتوا رأسكم.
دقت في العراضة

هسع لو كان اسامة ونسي رئيس لنادي المريخ ..كانوا قالوا ضربة الجزاء التى
احتسبت لصالح الهلال ارتكبها (الطاهر الرشيد).
والله الله شافكم يا ونسي.
حكايات في منتهى القسوة

مريخابي ..قام الصباح لقى ليك (كورية) الحلبة بتاعة السحور جنبو بي حالها
…ما في زول هبشها.
المريخابي عاين لي الكورية كدا ..وقال والله ناس الهلال ديل حركاتهم دي
اصلو ما بخلوها.
هسع (الكورية) دي لو شلتها ومشيت بيها على ناس لجنة الاستئنافات بتاعة
ناس (سمير فضل) ما بلقي لي عندهم (فتوى) ، تشربنا ليها.
حصة عربي

في محاولات جارية شديد ..لضم (شيبوب) لقائمة برنامج (اغاني واغاني).
لكن شيبوب عندو رأي في احمد بركات ومهاب عثمان.
اقول ليكم الحقيقة…شيبوب عندو رأي في السر احمد قدور ذاتو.
منطق فرنسي

الظاهر كدا محسن سيد اتعلم ليه حاجة غير (رص العلامات).
الزول دا بقى (خطير) عديل كدا.
بصرح كتير.
يا محسن سيد والله العظيم (رص العلامات) ما عاوزات ليهن (تصريحات) قدر دا.
هام ومستعجل

الفرق بين الهلال والمريخ (10) نقاط.
شيلوا الفرق دا وامشوا بيه على (سمير فضل) – بشيلو ليكم نهائي.
بخلي ليكم الحالة واحدة.
خاص وضروري

قالوا ليه (العيد) باقى ليه تسعة ايام.
قال ليهم نحن عيدنا من قون شيبولا.
جواب باليد

نفسي اعرف بس …ليه (العجور) بفكها في نفسو كدا في رمضان.
كلام عادي

مدثر خيري ..بيفتكر (قوانين الفيفا ولوائحها) …حاجة بعملها مجلس شوري المريخ.
الزول دا قولوا ليه اللوائح دي ما كدا.
فكرة مختلفة

رأيكم شنو تعملوا لينا مباراة هلال مريخ …تانية العيد …شيبولا قال
عندو كلام ما كملو.
والله ناس مصعب عمر ديل نلقاهم تانية العيد …نكون عيدنا جنس عيد.
التداوي بالاقوان

سادومبا لو مشى اهلو وقعد (10) سنوات ..وجاء راجع تاني ..بجيب قونو في المريخ.
اصلو ما عندو مشكلة.
شاحن جلاكسي

في ناس في رمضان دا …السحور بتاعهم …انهم يختوا التلفون في الشاحن
..وينوموا على كدا.
صالون حلاقة

يا حسين الصادق حلاقتك دي في (نجوم الغد) في الفطر ما بتنفع ..تظهر لينا
بيها في (اغاني واغاني) وفي شهر رمضان كمان.
طشاش شديد

جمال سالم وزنو زايد شديد …تقول عضو في لجنة التسيير.
قصة زي البامية المفروكة

اول مرة اتلاقينا بدون ما اشعر وقعت مني (عيني الشمال) و(11) ضرس و (4) سنون.
جدادة الخلا

كل ما اتذكر ان الفرق بين الهلال والمريخ (10) نقاط ..اقول (الوصيف) دا
لو ما ناس اسامة عطا المنان ..عادي جدا يلعب في التانية.

كلمات من طرف الشارع داك

• من دفتري الخاص توقفت عند هذه الاقوال.
• عباس محمود العقاد:
• إنما تفسر أعمال الإنسان بالبواعث والدوافع قبل ان تفسر بالنتائج والغايات.
• ….
• انيس منصور:
• عندما ذهبت رئيسة وزراء فرنسا (اديت كريسون) الى لندن قالت : الشعب
البريطانى اكثره من الشواذ … ففى كل مرة إلتفت ورائى ، لا اجد احداً
يتابعنى بعينه مع ان لى ساقين جميلتين … وكان رد (مرجريت تاتشر): هذا
الذى يفعله البريطانيون نسميه الادب .
• ……..
• سيد احمد الحردلو:
حين نلتقى بعد زمن من غياب
اشعر انك تريد ان تقولى شيئاً
واننى اريد ان اقول شئياً .. لكننا لا نقول
• حسب البارى سليمان:
• عندما كتبت (حبيبنا الما منظور ينسانا) تعمدت ان لا يرانى حسن خليفة
العطبراوى حتى لا يرفض التغنى بالاغنية لصغر سنى.
• …….
• الصادق المهدى:
• استمع للاغانى السودانية ولا استمع للاغانى الغربية وهذا عيب فى, وليس
عيباَ فى الاغنية الغربية.
• ……………………..
• اروع اغنيات الوصف المكانى جاء بها الشاعر محمد بشير عتيق ، عندما تغنى
لحى البيان وهو من الاحياء الام درمانية التى تميز سكانه بالجمال الى
جانب حى القلعة ، وعتيق يقول عن ليالى (البيان) :
قضينا ليلة ساهرة فيها (البيان) تجلى
الجو نسيمو رايق ..والغيم نشر مظلة
• المعروف ان عتيق كتب هذه الاغنية فى حفل زواج عربى البارودى وهذا ربما
يفتح لنا مجال اخر للاغنيات التى كانت امكنتها الحافلات والمناسبات وهو
مجال يحتاج الى متسع اخر.
• وعتيق هو ايضا الذى غنى للقوز (للقوز ما نسينا وللقوز كيف بننسى ) ،
وهو صاحب (ما بنسى ليلة كنا تاهين فى سمر، انا وانت والنيل والقمر) التى
قصد بها شواطئ ابوروف .
• ………………..
• الشاعر ابراهيم الرشيد ما زال (وسيم الطلعة) يحدثك بلطافة (عقد
الجواهر) ويونسك (بسليم الذوق).. عندما تسمعه وهو يحدثك عن بيت المال أو
عن البرلمان أو عن الطيان المدني تحس أن إبراهيم عوض يغنى (يا زمن وقف
شوية).

ما في حتى رسالة واحدة …(نتم بيها فطورنا)

• مرة اخري نجد انه لا بد لنا من العودة الي الجابري …ها نحن نعود من
حين لأخر لاحمد الجابري.
• الخطابات والرسائل العاطفية احتفت واحتفلت بها الاغنية السودانية كثيرا
وهذا اثبات الي ان (الجوابات) كانت لغة تواصل بين العشاق قبل ان تقضي
عليها الثورة الكترونية العالية ووثبت الاتصالات الكبيرة حيث اصبح
(الموبايل) يقوم مقام الوصل وكذلك (الانترنت) عبر خدماته المختلفة التي
اغنت حتي عن (شوف العين) .. وكان الشاعر عبدالوهاب هلاوي قد قال لنا في
افادة سابقة ان (الاشواق) نفسها بردت بين العشاق لان (الغيبة) لم تقع بين
الاحباب.
• لذلك نحسب ان زمن التواصل بالرسائل كان يغلب طبع الشوق وكانت العاطفة
اكثر صدقا .. لذا نجد (البوستة) تلعب دور كبير في حياة العشاق .. بل نجد
ان نفوز البوستة شغل حتي الاوساط الفنية .. اذ جاء من هيئة البريد والبرق
الكثير من المبدعين.
• نعود الي موضوع الرسائل في الاغنية السودانية ونجد ان الفنان احمد
الجابري من الفنانين الذين تخصصوا في ذلك الجانب حيث غني لسيف الدين
الدسوقي (ما في حتي رسالة واحدة بيها اتصبر شوية) .. وغني كذلك (من طرف
الحبيب جاءت اغرب رسائل) .. والمدهش ان اخر اغنيات احمد الجابري كان تدور
مقاطعها ايضا عن الرسائل حيث كتب له ذو النون بشري اغنية عن الرسائل
ايضا.
• اما الفنان عبدالعظيم حركة فقد غني غاضبا من الحبيب وطالب برد رسائله
وعمل لاعادة (الصور) والتي تحظي هي الاخري في دنيا العشق بالكثير من
الزحم .. حركة غني (رجع لي رسائلي والصور العندي شيلها .. شيلها).
• ومن قبل كان الفنان الراحل ابراهيم الكاشف قد تغني للرسائل ايضا (حبيبي
اكتب لي وانا اكتب ليك .. بالحاصل بي والحاصل بيك) .. وفي الاغنية التي
كتبها السر قدور (الشوق والريد) ايضا اشارة الي الرسالة ..(ليك رسالة ..
لو روحك يوم تنسي دلالها .. تشوفنا قريب ما تتعالي تسألني وتسأل عن
حالها.. ونعيد الكان).
• ويغني صالح الضيء (يا طير يا ماشي لا اهلنا .. ارجوك بلغ رسائلنا) ..
والاكيد ان تلك الرسائل التي سوف يبلغها الطير ليس رسائل ((sms.
• ومن كلمات الشاعر الراحل مصطفي سند يغني صلاح مصطفي (اكتب لي يا غالي
الحروف) .. ويذهب محمد وردي الي منقلب اخر في (المرسال) الاغنية التي
كتبها محمد علي ابوقطاطي (خطاباتي البوديها تقول لا بتمشي لا حاجة).
• هذا الوضع يثبت احتشاد الاغنية السودانية بالرسائل التي كانت تشكل حلقة
وصل بين العشاق.
• الاكيد ان اغاني الرسائل الان لم تعد تشكل حضورا .. وانما يمكن ان تكون تراثا.

شارك الموضوع :

تعليقات الفيسبوك

تعليقات


1 التعليقات

      1. 1
        ABOUSH

        هسه انت نصيح كاتب ليك صفحة كاملة البقراها ليك منو
        دي

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *