د. ناهد قرناص : بريطانيا تغادر

الطريقة التي غادرت بها بريطانيا منظومة الأتحاد الاوربي ..كما لو انها مجموعة واتساب ..جعلتني اتخيل السيناريو الاتي:
الواتساب خاص بين فرنسا وبريطانيا

فرنسا: يا زولة طولي بالك ..شنو تغادري كدا ..انتي المانيا دي ما عارفاها؟ ما ياها حركاتها من زمن هتلر ..

بريطانيا: لا …لا …لكن المرة دي ..كترتو شديد ..المطاعنات بقت عيني عينك ..شنو كل مرة تقعد تفتح لينا قصة اللاجئين ولا تحرش اسبانيا تفتح موضوع جبل طارق ..انا كلام زي دا ما بنفع معاي
فرنسا: خلاص انتي عارفاها ..وعارفة حركاتها ..ما كان تفوتي ليها القروب ..هسع يا داب ما قعدت كدا واتحكرت ..من زمان كانت بتفتش ليها فرصة ..

بريطانيا : هي لو عايزة تفتح الملفات ..انا الفايلات العندي ليها ما شوية ..بس لكن انا قلت مالي ومال الكلام الكتير ..احسن لي أغادر ..انتي بس قولي ليهم اني حاتواصل مع العايزني في الخاص

فرنسا: هي لكن تمشي تتوحدي كدي براك ؟

بريطانيا: اتوحد كيفن ؟ انا ياختي عندي مجموعة الكومنولث ..شايلني فوق راسهم ..كل ما افتح المجموعة يصفقوا ويرسلوا لي في القلوب قلوب

قروب واتس الاتحاد الاوربي

فرنسا: والله يا جماعة مساعينا لم تنجح في ارجاع بريطانيا ..هي تبلغكم التحايا ..وممكن اي زول يتواصل معاها في الخاص ..قالت ما حتغير الرقم ..وكمان ما حتعمل حظر لي زول
المانيا :??…المشتهي الحينطير يطير ..هي اصلها من البداية ..كراع هنا وكراع هناك ..لا عايزة تنضم لليورو ..ولا عايزة تدخل الشنغن ..شن طعم قعدتها في القروب

النمسا : ?? انا كنت خاااايف من كدا

اسبانيا .:???? بلا وانجلى

هولندا : ??خايف تفوت والسكة بيك ما تلمني وما تلمني

ثم ينزل سهم الله علي القروب ..ويسود صمت عميق ..لا تقطعه الا صور ..مكتوب عليها صباح الخير ..ومساء الخير