مقاطع

(1)
قبايل العيد حماس وأفراح.. وكل الناس بتمشي السوق
وعيدي براي أسى وأتراح.. كئيب من الفرح ممحوق…
متين يا عيد تعود بالخير.. وتصفى وفيك همومي تروق…؟
سألت القادر المنان.. سعادتي تكون رضا وإيمان.. وما مرهونة بي مخلوق..
*******
(2)
منو القال إني بستحمل.. أشوف أهوال وأمشي دروب؟
وأسامح ديمة كل الناس.. وأغفر زلة المحبوب؟
منو القال إني يا خي ملاك.. جمييييل ما فيهو أي عيوب؟!
يمين والله زول من طين.. ولااااامممكن أكون أيوب!!!
*****
(3)
فصلت عليك إحساس فضفاض.. لكن إحساسك كان أضيق..
وبديتو معاك مشوار الريد.. لكن خطواتك مااا بتلحق…
البحر الواسع كان شبهك.. بس لون عينيك ما كان أزرق
قلبك محكوم بي عقلك دوم.. وأنا قلبي براو شافع أحمق…
كم مرة بحاول أرتب فيو.. لكن ترتيبي بيكون أخرق !!
**********
(4)
أديني فرصة أفهمك.. إنك بتخسر في هواي…
وبكرة الحكاوي تكلمك.. إنك بقيت شقيان بلاي…
والذكريات حتعلمك.. كيفن سعادتك كان معاى…
وانا زيي ما بتلقاو أكيد.. أنا ياخي ما بشبه سواي…
ولما الليالي تألمك.. حتكوس حناني وصوت غناي…
وحتهاتي بي إسمي وتنوح.. وتفتش إحساسي ووفاي…
لكن مع الأسف الشديد.. أنا ما بعاين لي وراي!!!
***********
(5)
ما كل الجروح بتطيب مع الأيام…
وما كل الدروب بتودي لي قدام…
آخر الظن ندم.. وآخر الغرور أوهام…
عز الريد عشم.. وعز النجاح أحلام!!
*تلويح:
هو الشعر يكتب الدواخل بالصدق اللازم للإدراك.