الناس كأسنان المُشط..!!

أسمعني يا حاج لا تضيق..
خليني أوريك الحصل..
أشرحلك الواقع أنا..
ضاقت علي يا بوي هِنا..
اتقفلت كُل الدروب..
مافي حتى بصيص أمل..
تقديري كان درجة شرف..
الليلة عاطل عن عمل..
معيارنا يا بوي الولاء..
عارفين كمان وين الخلل..
يفشل الناجح قبيل..
فوق المُدن عايش طرف..
اتوظف الراسب زمان..
الليلة عايش في ترف..
سامحني يابا على الحصل..
مرت سنيني على عجل ..
فيها حاصرني الفشل..
ما قدرت أوفيك حقها..
خايف عليك من الخرف..
قبال تشوف ولدك وصل..
أطلق سراحي خلاص أنا..
خليني يا بوي شان أصل..
لي دُنيا فيها الناس سوا..
عايشين يعمِروا في بلاد ما ليها سيد..
أسيادا هُم والكُل عبيد..
شان البلد تكبر تزيد..
ما فيش مجال لي زول وحيد..
يحكُم يصول فيها ويجول..
الناس كأسنان المُشط..
ليهم حقوق ..تتساوى فيها الواجبات..
ما فيها أبداً زول كبير ..قانون وبس يحكُم يسود..
في دولة خالية من الصراع..
مرسومة من بدري الحُدود..
من قبل ما يفوتوا الجُدود..
جايز أصل..
اتخطى لي كُل السدود..
يمكن كمان في يوم أعود..
ألقى الوطن فرحان سعيد..
زال الغُبُن صِفت النفوس..
والبسمة ذاتا كمان تعود..