محمد عبد الماجد

ضل الفيل لمن يشرب (لبن الجُهال)


من رأسي :

تحليل اداء الحكام في الفضائيات السودانية مبني على لو قلت ان ضربة الجزاء التى احتسبت لك صحيحة – لا بد ان تقول وهناك ضربة جزاء صحيحة للفريق الاخر.

متل سيد الدكان البتشيل منه (كرتونة شعيرية) يقوم يديك معاها (علبة كبريت) هوادة.
من كراسي :

(اكتب كل شيء كما لو كان أول شيء تكتبه في حياتك. فاليوم الذي تعتقد فيه بانك تعرف كيف تفعل ذلك تنتهي فيه حياتك ككاتب).

وليام غولدمان

الكاردينال رئيس نادي الهلال – براهو من غير (قرش حكومي) واحد …عمل استاد الهلال من ثلاثة طوابق.
عمل الجوهرة الزرقاء.
الجوهرة الزرقاء ما شاءالله عليها.. تكون قاعد في الطابق الاول …ممكن تشاهد مباراة بتلعب في استاد المريخ.
ولو كنت قاعد في الطابق الثاني ..لو في مباراة بتلعب في استاد الخرطوم بتشوفها.
اما لو كنت قاعد في الطابق الثالث ..فيمكنك مشاهدة المباراة لو كانت تلعب في استاد التحرير بالخرطوم بحري.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
والكاردينال براهو ..عمل (كبري) القيروان.
مجلس اسامة ونسى السابق كان يطارد في (شيبوب) من مطار لمطار عشان في النهاية يرجع ويوقع في كشوفات الهلال بعد (6) شهور (نقاهة) في تونس من (المريخ).
والكاردينال براهو اسس للفريق الاول والرديف والشباب.
والكاردينال براهو بدأ في قناة الهلال.
والكاردينال براهو استلم قطعة ارض الاكاديمية.
و28 عضو في المريخ (بعد المول التجاري والنادي الاسري والفندق) الطلعت كلام جرايد ساكت ما لقوا حاجة يقدموها للمريخ غير (بيان) هزيل.
بيان يشبه (واعرب الامين العام للامم المتحدة عن قلقه).
بص الوالي مضى عليه قرابة الشهرين وتبقى لفترته اربعة شهور وشوية ..وما شفنا ليهم غير هذا (البيان) وايقاف بكري المدينة وعلاءالدين يوسف.
وفصل الطبيب الهلالابي من الجهاز الطبي للمريخ.
هذا كل ما قدموه للمريخ.
28 عضو.
لو كل واحد فيهم دفع ليه مليار كانوا عملوا ليهم (طابق) في استاد المريخ.
مجلس شغال لاهلي مدني اكثر من شغله للمريخ.
انتوا وقت شاطرين كدا – وقاعدين تنفعلوا قدر الانفعال دا كلو – بتخلوا الفارق بين الهلال والمريخ يصل (9) نقاط ليه.
في رمضان الهلال غلبكم بي شيبولا وسادومبا …منتظرين اهلي مدني يقلص ليكم الفارق.
بيان مجلس المريخ يشبه البيانات التى تدعوا الى (الحيطة والحذر) من الخريف والفيضانات والامطار والسيول.
وشيبولا.
بيان المريخ يذكرني ليك بالمسؤول الذي كانت (قريته) تحاصرها السيول والفيضانات وهو بيصدر في (البيانات) التى يقول فيها (الاوضاع مستقرة).
والبلد غرقانة.
القرية تغرق – والمسؤول بيصدر في البيانات (الاوضاع مستقرة).
البيوت توقع ..والناس بتموت – و (الاوضاع مستقرة) تماما.
والدولار تجاوز الـ (15) جنيه – وشنو؟.
و(الاوضاع مستقرة).
وامنة بت كرتونة الخبيز ..جات راجعة بيتها ..عيونها في نص ضهرها وشفعها السبعة كل واحد يكورك في اتجاه.
متل الزول الشايل ليه اربعة موبايلات كلها ضربت في وقت واحد.
ابوها سألها قال ليها مالك يا بنت؟.
قالت ليه : (الاوضاع مستقرة).
وورقة طلاقها في شنطتها.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
المضحك ..والحاجة التى تثبت ان المحرش ما بكاتل ..وضل الفيل عمرو ما بيبقى (فيل)..التصريحات التى اخرجها بدرالدين عوض الله.
هو (الفيل) ذاتو قاعد يثبت.
الفيل نفسو (هرب).
عاوزين (ضل) الفيل يثبت ليكم.
رئيس نادي الاهلي مدني عاوز يعمل لينا شغل المحاميين.
رئيس نادي الاهلي قال ان الحكم هو من اخطأ بعدم تنفيذه لركلة الجزاء مشيرا الى ان حارس الفريق انسحب من مرماه بسبب وابل من الحجارة و الشماريخ لجماهير الهلال و التي حولت الملعب لدخان وكادت ان تصيب اللاعبين و الحارس و انهم تفاجأوا بانهاء المباراة و كان على الحكم التواجد في منطقة الجزاء و تنفيذ الحالة واعلانها هدفا وهو ما لم يحدث.
فالح والله.
شوفوا الزول دا من خطأ احتساب ضربة الجزاء – حول الخطأ الى عدم تنفيذ ضربة الجزاء.
سبحان الله.
الزول دا الكورة اتعلمها كبير.
في ضربة جزاء بنفذوها والحارس (هارب).
رئيس الاهلي مدني الذي تعلم الكورة كبير – قال ان حارس فريقه انسحب بسبب وابل من الحجارة والشماريخ التى انطلقت من جماهير الهلال.
علما ان المباراة في مدني ملعب الاهلي.
خلوها دي – باعتبار ان ملعب مدني ذاتو ملعبنا …جمهور الهلال الذي احتسب له الحكم (ضربة جزاء) في الزمن البدل الضائع معقولة يرمي حارس مرمى الاهلي بالحجارة والشماريخ ..والهلال محسوبة له (ضربة جزاء).
يا عالم.
انتوا جدول تلاتة دي غيروه.
محامي الاهلي قال ان الاهلي ما انسحب ..طيب الزول النزل من المقصورة بي بدلته وسحب لاعبي الاهلي دا كان (فوزي المرضي).
وإلّا مزمل ابوالقاسم.
خايف يكون سحبهم تلفون من الخرطوم.
قول الحارس (هرب) خوفا من الحجارة والشماريخ (الوهمية) – رئيس النادي مالو؟.
دي ما (بدلة) الزول يهرب بيها.
هل كانت هناك حجارة وشماريخ في (المقصورة) برضو.
الشينة منكورة ..وانسحاب الاهلي الذي اراد بيان المريخ ان يعمل منه بطولة – ها هو رئيس النادي ينكره.
رغم ان الهروب كان منقول على الهواء مباشرة.
الحكم درمة قال يفترض ان ينتظر الحكم (15) دقيقة قبل اعلان انتهاء المباراة.
ما عارف درمة جاب الكلام دا من وين؟.
لو كلام درمة صاح ..يعني تاني اي فريق يكون مضغوط او مغلوب او اتحسبت عليه ضربة جزاء ..يطلع ينسحب ويرجع بعد (14) دقيقة بعد ان يرتب اوضاعه وينظم اوراقه.
وياخد ليه شوية نفس.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الامر المضحك في بيان مجلس ادارة نادي الاهلي مدني …ان البيان ذكر ان الحكم اشهر للاعبي الاهلي (11) بطاقة صفراء اضافة الى بطاقتين حمراء.
الناس ديل (الكروت) التى نالوها ما عارفنها.
لاعبو الاهلي مدني نالوا (9) بطاقات صفراء وليس (11) كما ذكر البيان.
مجلس ادارة نادي الاهلي مدني كان يكتفي ببيان نادي المريخ – الحالة واحدة ما في داعي لتضارب البيانات ساكت.
على العموم نذكر ان مباراة الهلال والاهلي مدني شهدت (9) بطاقات صفراء للاعبي الاهلي اضافة الى بطاقتين حمراء للاعبي الاهلي وثلاث بطاقات صفراء للاعبي الهلال وضربتي جزاء له وبيانين واحد من مجلس المريخ والتاني من مجلس الاهلي مدني.
الشيء الغريب ان بيان المريخ طلع قبل بيان الاهلي مدني صاحب القضية.
نذكر ان المريخ عنده هذه الاسبوع مباراة في شندي.
وعنده مباراة في نيالا.
وعنده مباراة في مدني.
وعنده مباراتين في عطبرة.
عطبرة (اتنين).
يلا ورونا فلاحتكم …وخلوا حكاية التستر وراء الاهلي مدني.
الهلال في الولايات تبقت له مباراة سوف يلعبها هذا الاسبوع امام الاهلي شندي ومباراتين في الفاشر امام هلالها ومريخها.
الوضعية دي ما بتتفقوا معاي بترفع الفارق الى (18) نقطة.
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………

و

بيان المريخ ممكن نجد ليهم فيه العذر ..مجلس المريخ كله ما فيه محامي واحد.
لكن ناس الاهلي مدني بيانهم مالوا ملخبط كدا ورئيس النادي (محامي)؟.
حارس مرمي الاهلي قال هرب من (الشماريخ).
ومدير الكورة في نادي الاهلي مدني – لغاية الآن مفتكر المباراة في استاد الهلال بام درمان.
الزول دا ما عارف استاد الهلال بقى تلاتة طوابق.
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
السيدة (ل) – في كتاب المطالعة افتح الدرس رغم اربعة الصفحة رقم 21 يمكن تلقى فيها حاجة عننا.
وقرّط على كدا.