زواج سوداناس

بيان وقرار ومقام ومقال



شارك الموضوع :

> كنت اتوقع قراراً قوياً من مجلسنا لا بياناً يشجب ويدين ويندد بالعدوان الغاشم والآثم مثلما يحدث دائماً > جماهير المريخ ملت من حياة قطاع غزة والضفة الغربية > شجب وتهديد ووعيد > وجرافات الاهلة اقصد الصهاينة تقضي على بساتين الزيتون لتقيم عليها مستوطنات جديدة > وتطلع زيت الزيتون على ابو زيت البزرع زيتون زاتو > وبعد ان نندد بالعدوان نغني > لاجلك يا مدينة الصلاة اصلي > عيوننا اليك ترحل كل يوم > واظن الضمير في اليك يعود للعدالة > ثم يرتفع صوتنا مع فيروز حينما تصل الى > الغضب الساطع آت وانا كلي ايمان > ولن يأتي غضب ساطع ولا غضب مغبش ولا جردل زاتو > ويظل الطفل المريخي في مغارة الدونية وينشأ عديم الشخصية لأن الآباء قد فرطوا في اكتساب الاحترام وضاعت هيبة الكيان بالبيان > بيانات تشبه شكل الشفع > تعمل شخيت وتقول كان راجل اقطع الخط ده > ويقطعو ويقول ليك قطعتو داير تعمل شنو > تقوم تعمل شخيت تاني وتقول ليهو اقطع ده عشان أوريك > وبرضو يقطعو وباطمئنان اكتر > لما لما قطع الشخيت الاول ما وجد غير رجوعنا وكسب مساحه > ونقعد بيان في بيان وشخيت في شخيت والشخصية راجعة ورا بعيد > بيان يفترض أن يكون بالعمل > والبيان بالعمل هو القرار > والقرار المايصيبش يدوش ويجيب الجلطة > رفقاً بأطفال المريخ فقد انكسر الخاطر > رفقاً بالعدالة فقد انفرط الساتر > رفقاً بمكانة الكيان او لينفض السامر > لسه نحن بنشجب وندين ونستنكر ونعمل شخيت ونقيف بعيد؟؟ > نحن كنادٍ قيادي ومميز لا يفترض ان نقاتل من أجل حقوقنا فقط > بل نقاتل ونستلم الموضوع اذا اي نادٍ وقع عليه الظلم دفاعاً عن الحق والعدل والانسانية > خلونا من الشخيت ووقفة بعيد والداير الدواس بقع واطه بدون شخيت ولا شخبيت > سيخرج علينا من يقول > نصبر نشوف الاتحاد حايعمل شنو > والاتحاد في اجتماع قام واجتماع فشل ولجنة انبثقت ومجدي في ساحل العاج يكون الموسم انتهي > وتاني نعمل شخيت ونقيف بعيد للموسم الجديد > وتعود الجرافات تقضي على مزارع الزيتون وتطلع زيتو لتقيم مستوطنات جديدة > ونعود لنغني مع فيروز اغنية العجز الكبيرة > الطفل في المفارة وامه مريم وجهان يبكيان > لاجل حاجات كتيرة > ثم نرفع اصواتنا ونردد > الغضب الساطع آت > من كل طريق آت > ولا حاسأتي غضب ولا يحزنون > ويتغير مع الزمن الاسم العتيق > من العرضة الى غزة > ونعمل شخيت ونقيف بعيد > ايها الناس > يا اما رجال نستطيع ان نتخذ قرار يثبت للعالم اجمع اننا كبار > او نقدم طلباً للاتحاد يسلم كأس اي موسم قبل الموسم للهلال في اكبر احتفال > ثم يبدأ الدوري بعده على الاقل نضمن العدالة فيه > ايها الناس > السبب نحنا > لأننا لا نهتم باللجان والاتحادات والانتخابات > لا ليفوز من يحابينا > بل لنضمن عدالة للجميع > وان كنتم الآن تساندون الفريق المدهش > حاتشختوا الواطة كلها في عهده > نسيتوا شوارع مدني التي تعرضت لاطلاق اسم الهلال عليها؟ > هل تتوقعون من عاشق ولهان مثله عدالة!!! >او مجرد مساواة > انها دعوة وبشدة > نناهض فوز المدهش برئاسة الاتحاد مهما كلف الأمر > وان كان لا بد من هلالي ليقود دفة الكرة في البلاد > فالأنسب من المدهش علي قاقرين > على اقل تقدير من اهل الكار ومؤهل ويدرك جيداً وقع الظلم الرياضي على قلب المواهب > وعلي قاقرين مؤهل ليقود الرياضة وزيراً اتحادياً > خلق وأدب ونجومية ودولي، وعلم وثقافة وقيافة وحصافة ومحترم لانه يحترم عقول الآخرين على أقل تقدير > كنت اريد مناشدة رئيس الجمهورية لتعيينه وزيراً للرياضة > ولكن الآن اناشده شخصياً بقبول الترشح رئيساً للاتحاد السوداني لكرة القدم > سعياً للعدالة والمصداقية والشفافية > وإذا قبل مسألة فوزه تكون فرض عين على اي زول يحلم بتطور كرة القدم بتاعتنا > وعندها يكون المدهش حقاً هو فوز دكتور علي قاقرين برئاسة الاتحاد السوداني لكرة القدم لدورة واحدة فقط لنراه وزيراً اتحادياً للرياضة > على الأقل ما بنحتاج نعمل شخيت > المهم > وصلتني رسالة معبرة جداً تقول > ماهي العلاقة بين الصفر والصفارة > اعتقد ان الصفارة هي سبب تمسك الصفر بصفريته > وسيظل الصفر صفراً طالما الصفارة مصرة تظلم وهي تردد انها تخطئ ولكن لا تظلم > وعندما تعترف الصفارة بأنها تظلم > وان اول من تظلمه بحركاتها دي هو الصفر > وقتها يحتمل أن يبارح الصفر موقعه الى الواحد الصحيح بعد أن يقضي في النزاهة والنقاهة تمنية وتمنين سنة جديدة > ايها الناس > بهدف اهلي شندي المنقوض > وضربتا جزاء مريخ نيالا ناس مركوب النمر > وضربة جزاء النعسان الراحت شمار في مرقة > ومهزلة مباراة مدني > نكون فايتين الهلال بتسع نقاط > لكن تقول شنو > يخطئ ولا يظلم > ونحنا لا نعرف ان لكل مقام مقالاً > لا نفرق بين الانسب البيان ام القرار > ونعمل شخيت وبيان وقرار ومقام ومقال لنغني > لاجلك يا مدينة الصلاة اغني > ايها الناس > ان تنصروا الله ينصركم > اها > نجي لي شمارات والي الخرتوم > كان شفت يا والينا > يا دوبك نقطت > الخيران قفلن لينا > والشوارع اتطمبجن علينا > ضبابينا تسل الروح حامن حولينا > ومواسيركم تعاين لينا > لا قادرة تمرق الموية الصابة علينا > ولا قادرة تجيب الموية البتشيل حقها مع الكهربا جبراً علينا > مواسيركم ديل من وين بتجيبوهم يا والينا لينا سلك كهربا ننساك كيف والكلب راقد مطمبج في وسط الطين ويعاين للشارع كلما يشوف بتاع محلية او شؤون هندسية او تجميل الخرطوم او نفايات او عربيه نمرتها حكوميه.. يكورك .. يا ماسورة والى لقاء سلك

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *