الفاتح جبرا

توبة عبد السخي !!


إبتسم فأنت في هذا العهد الزاهي النضير .. ثم بعد أن تبتسم ابك ما شئت لك من البكاء و (جعر) .. ثم أضحك ملء فيك وبعد أن تتأكد بأنك (جنترتا) ..توجه لأٌقرب (صينية) ثم قم (بالتحلل) الاصغر وذلك بالتخلص من (القميص والفنيلة) أما التحلل الأكبر (من غير هدوم) فأتركه حتى تقرأ هذا التصريح الذي جاء ضمن حوار أجرته (صحيفة المجهر) بعدد أول أمس (الجمعة) مع فضيلة الشيخ محمد عثمان رئيس هيئة علماء السودان ..
سئل معالي الشيخ في الحوار الذي أجري معه (ما رأئكم في موجة الغلاء التي إجتاحت الأسواق والأسعار) فأجاب لا فض فوه :
(موجة الغلاء الحالية هي بلاغ من عند الله سبحانه وتعالى للأمة إلى أن تتوب وتعود إلى الله ، وكما قال تعالى (ولو أن أهل القري آمنوا واتقوا لفتحنا عليهم بركات من السماء) !
الشيخ الموقر يعزي ما يحدث في طول هذه البلاد وعرضها من فساد يزكم الأنوف وإستباحة غير مسبوقه في نهب المال العام أقعدت بالإقتصاد وأهلكت العباد يعزي كل ذلك لبعد المواطنين عن الله ، ويناشد الأمة (يبدو إنو خجل يقول المواطنين) بعد قرابة الثلاث عقود من (الحكم الإسلامي) أن تتوب إلى الله !
الشيخ الموقر لم يعز ما يحدث من غلاء وضنك وكوارث للقروض الربوية العديدة التى أجازها البرلمان بحجج ومبررات (واهية) وسكت عنها الشيخ وهيئته الموقرة (كمثال) ذلك القرض الربوي لتمويل مشروع الرصيرص من الصندوق العربي للإنماء الاقتصادي والاجتماعي بقيمة 60 مليون دينار كويتي والذي تمت إجازتة فى خلال (شهر رمضان) !!
قال الله سبحانه وتعالى: (يَا أَيُّهَا الَّذِينَ آمَنُوا اتَّقُوا اللَّهَ وَذَرُوا مَا بَقِيَ مِنَ الرِّبَا إِن كُنتُم مُّؤْمِنِينَ (278) فَإِن لَّمْ تَفْعَلُوا فَأْذَنُوا بِحَرْبٍ مِّنَ اللَّهِ وَرَسُولِهِ ۖ وَإِن تُبْتُمْ فَلَكُمْ رُءُوسُ أَمْوَالِكُمْ لَا تَظْلِمُونَ وَلَا تُظْلَمُونَ) سورة البقرة، 278-279 .
ليه ما يحصل البحصل لينا ده يا شيخنا الكريم و(حكومتك) تتحدي الله سبحانه وتعالى وتبيح (الربا) وكمان مش كده وبس (في رمضان) !!!!! وأنتم سكوووت !! ثم إذا تكلمتم عزيتم ما يحدث إلى أثام الشعب وذنوبه وبعده عن الله … الله الذي تجاز له قروض الربا في نهار رمضان !!
والشيخ الموقر يعلم تمااام العلم بأنه لا يوجد استثناء في أكل الربا ، كما يعلم بأن القرآن كان صريحاً فيما يتعلق بالمعاملات الربوية وأنه لا مجال لاجتهاد فيها … فلا ضرورة تبيحة ولا يحزنون وهب يا شيخنا أن الضرورة تبيحه فهل نحن في ضرورة وقحط ونحن في بلاد يختفي من ميزانيتها ما يقارب (مليار دولار) فلا يعرف له مكان؟ وهل نحن في فقر ومسغبة في بلاد يتحلل فيها اللصوص عما (هبروه) من مئات المليارات دون أن نسمع لكم رأياً أو نقرأ لكم بيانا (يااخ بااالغتا) !
إذن هي يا شيخنا الفاضل حرب من الله ورسولة كما جاء في كتاب الله فلا تحمل الأمة ما لا طاقة لها به ، وعموما وعملاً بما صرح به الشيخ المبجل وحيث أن مشروع (التوبة لكل مواطن) الذي طرحه (شيخنا الجليل) من المفترض أن يهم (أمنا الحكومة) في المقام الأول إذ من شأنه خفض الأسعار وإستقرار الدولار لذلك حقو (الحكومة) تقبض في (الكرت) ده بأيدينا العشرة وتقوم بتنزيل مشروع (التوبة) إلى أرض الواقع ، وتتأكد تماماً بأنو أي مواطن في هذا البلد الأمين قد تاب إلى ربه وأناب .
بالطبع سوف تكون هنالك عدة عقبات عملية سوف تواجه الحكومة منها .. كيف تتأكد الحكومة بأن المواطن قد تاب إلى ربه ؟ مش ممكن مواطن يقول (تبتا) وهو ما تاب ؟
تفادياً لهذه الثغرة العبد لله يقترح بأن تكون (التوبة) مع (فاتورة الكهرباء) يعني ذي (الموية) ، تمشي تشتري (كهرباء) تقول للموظفة :
– (أديني كهرباء بي عشرين )
– طيب ردد معاي ..
– أردد معاكي شنووو
– التوبة ..
– توبت شنو كمان؟
– كيفن إنتا مش عارف أي مواطن مفروض يتوب لى ربو عشان الأسعار تنخفض والدولار ينزل ذي ما قال مولانا محمد عثمان؟
– لا والله .. هو الدولار بينزل كده؟
– خلينا من الكلام ده .. إسمك منو ؟
– عبدالسخي
– طيب قول معاي .. أنا المواطن عبدالسخي ..
– أنا المواطن عبدالسخي
– أتوب إلى الله
– أتوب إلى الله
– توبه نصوحا
– توبة نصوحا
– خلاس كده بقيت مواطن تائب .. أها قلتا ليا داير كهرباء بي كم ؟
– بي عشرين
– لكن يا عبدالسخى الموية براااااها بي خمسة وعشرين !!!!!!! رين رين رين !!!
كسرة :
• دي حالة يتوبو فيها !!
كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+و+و+و+و+و+و+و+و+(و)+و
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و
• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و)+(و) +و؟


‫8 تعليقات

  1. يا جبرة أنا بالجد سوف احملك مسئولية أى حاجة تحصل على – لأننى و أنا أقرأ مقالك اصابنى وجع شديد فى بطنى و أعتقد أن مرارتى انفقعت من شدة الضحك — و خليك سودانى و أتحمل مسئولية كتاباتك دى ,,

  2. الله يديك العافية يا ود جبرا ضحكتني لمنت بدت نواجذي رغم إني ديامي تعيس

  3. علماء السلطان ..الارزقيه و المصلحجية و المنتفعين ..ماذا تنتظرون منهم؟؟؟؟

  4. شوف يا عمنا جبرا شيوخنا الكرام الأفاضل ديل ما تتكلم عنهم بالطريقة دي بعدين يقوموا يسختوك، لأنهم ديل ناس واصلين وعارفين بيعملوا في شنو وكمية الورع عندهم لو وزعت بين القبائل لزادت عن حاجتها، مش الشيوخ بس دا جميع قبيلة بني كوز يتمتعون بهذه الصفات من ورع وتقوى وصلاح (ادريس) يا أخي شوف وجوههم كيف صافية ونقية من الصلاح ودي ذكرتني:
    واحدة اتصلت بي الواد الورع التقي حسين خوجلي في مداخلة تلفزيونية وقالت ليه إنت يا حسونة وجهك دا ناااااير ونضيف كدي بتستعمل ليه ياتو كريم ولا ياتو خلطة؟
    رد عليها بكل طمأنينة أنه دا لا كريم ولا شئ بس من أثر الوضوء (وضوءهم مختلف عن حقنا طبعاً)
    الملعونة اندهشت وبسرعة بديهة رباطابية قالت ليه طيب وقت دا من الوضوء، يعني علي عثمان دا طوالي شغال تيمم!!!

  5. لعله يقصد بالمواطنين المؤتمر الوطنى وعشان كدا طلب منهم يتوبوا وفعلا لو تابوا وخلوا السرقة والفساد دا البلد بتصلح ، ما اظن يقصد الشعب السودانى بحكاية التوبة بل يقصد بنى كوز ويدعوهم للتوبة واصلا هم بيعتقدوا ان المواطنين هم المؤتمر الوطن بس .

  6. • كسرة جديدة لنج :
    أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و)+(و) +و؟

    كسرة جديدة لنج لها 6 شهور .
    وبعدين بالله اكتب لينا عبد الباسط يقابل ناس الزكاة ( الزكاة بالزين ولا بالذين ؟؟؟؟) عشان يرجع لغربته