الفاتح جبرا

دي حالة بلد يشترو ليهو يخت (جاثم) بي 4.5 مليون دولار؟ ….


كشف مؤخراً السيد فرح مصطفى وزير التربية والتعليم بولاية الخرطوم عن الحقائق التالية :
• وجود نقص في المعلمين يبلغ ( 6,379 ) معلم في مرحلتي الاساس والثانوي .
• وجود ( نقص) في الاجلاس بلغت نسبته ( %26.5 ) في مدارس الاساس .
• وجود ( نقص) في الاجلاس بلغ بلغت نسبته ( %26 ) في المدارس الثانية .
• وجود (نقص) في الكتاب المدرسي بلغت نسبته (%55 ) في مرحلة الاساس .
• وجود (نقص) في الكتاب المدرسي بلغت نسبته ( %66 ) في المرحلة الثانوية .
• أكثر من (25%) من الطلاب لا يجدون مقاعد .
• أكثر من ( %60 ) من الطلاب لا يجدون كتاباً .

• دي حالة بلد المغتربين بيدخلو ليها مليارات الدولارات سنوياً؟
• دي حالة بلد ثروتو الحيوانية تقدر بـ 103 مليون رأس؟
• دي حالة بلد الأراضي الصالحة للزراعة فيها أكتر من 42 مليون فدان؟
• دي حالة بلد بتصدر أطنان من الدهب سنوياً ؟
• دي حالة بلد فيها الفضة والنحاس والزنك والحديد و الكروم و المنغنيز والجبص والرخام وغيرها.
• دي حالة بلد تقوم بإستضافة الموتمرات القاعدية والدولية والجهوية ، فكل شهر تستقبل ارتال من الوفود من الخارج
• دي حالة بلد يتم فيها تبديد ثروات البلاد في الترضيات وشراء الاشخاص (هسه الحسن ده شغال شنووو وداوم ليهو كم يوم مما جا)؟.
• دي حالة بلد يتم فيها الصرف البذخي على بناء المباني الحكومية وشراء الاثاثات ؟
• دي حالة بلد كل دستوري في البلد سائق ليهو عربية برادو موديل السنة غير العربات الفي البيت؟
• دي حالة بلد كل يوم والتاني مسافرة منها وفود للخارج .. طيارات وفنادق ونثريات
• دي حالة يتبرع فيها ديوان زكاة لقناة فضائية بخمسين ألف دولار
• دي حالة بلد (يتحللو) فيها من مليارات الجنيهات (ولا عقاب ذاااتو)
• دي حالة بلد يستوردو ليها قطارات مضروبة بي 155 مليون دولار؟
• دي حالة بلد يشترو ليهو يخت (جاثم) بي 4.5 مليون دولار؟
• دي حالة بلد (نفرين بس) يسرقو منها ملايين الدولارات واليوروهات ..(الأقطان) ؟
• دي حالة بلد وزير فيها (لا راح لا جا) يشتري ليهو منزل بي 2 مليون دولار (وكمان يملح السمسار)؟
• دي حالة بلد فيها (والي) يعمل ليهو (ورشة عمل) عشان تناقش تصميم وخرطة البيت الحكومي العاوز يبنيهو؟
• دي حالة بلد تبني ليها (سد) بي مليارات الدولارات ويطلع أي كلام؟ (كان تحسنو بيها التعليم)
• دي حالة بلد تشتري لاعبين كورة من بره بي ملايين الدولارات؟
• دي حالة بلد دخلت خزينتا (عائدات بترول) بمئات المليارات من الدولارات؟
• دي حالة بلد يبنو فيها قصر تااااني (القديم مالو؟)
• دي حالة بلد تشارك في الأولومبياد .. تذاكر ولإقامة ونثريات؟ (لا .. وما أحرزو وللا كوز صلصة)
• دي حالة بلد يتقاضى فيه موظف دولة راتبا شهريا قدره ( 18 مليون جنيه )، و بدل عيدين قدره 90 مليون و بدل ملابس قدره 72 مليون وبدل بونص 225 مليون و وبدل إجازة 90 مليون مع قيمة التذاكر له ولأفراد أسرته؟
• دي حالة بلد يروح من ميزانيتها 960 مليون دولار وما تتعرف مشت وين كما جاء في تقرير المراجع العام؟
• دي حالة بلد تتسرق من منازل ومكاتب مسؤوليها الآلاف المؤلفة من مختلف أنواع العملات الحرة؟ (الفي البنوك كم؟)
• دي حالة بلد تنظم فيها الإحتفالات لإستقبال (والى) رجع من إجازتو؟ (طيب لمن يرجع من شهرالعسل كيف؟)

كسرة :
• أكثر من (25%) من الطلاب لا يجدون مقاعد وأكثر من ( %60 ) من الطلاب لا يجدون كتاباً … كان كده الترابة دي في خشمنا !! قال أيه (أمريكا) قد دنا عذابها … عذاب أيه ؟ روووحوا منكم لله !!
• كسرة ثابتة (قديمة) :أخبار ملف خط هيثرو العند النائب العام شنو؟ 81 واو – (يعني ليها ستة سنوات و 11 شهر) ؟
• كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 40 واو (يعني ليها ثلاث سنوات وستة شهور)
الجريدة


‫3 تعليقات

  1. بس كان لقينا قائد جادي كل الامور بتوضح لكن مع بشة دا والله لسة القادم اصعب

    ربنا يهون

  2. دي حالة بلد دي حالة بلد دي حالة بلد
    يتمرد فيها التشادى المجنس يقتل يغتصب يسرق ينهب ويحصل على عفو”رئاسى” ويدخل القصر كبيرا لمساعدى الرئيس لمدة 6 سنوات ثم يتمرد ثانية ثم يلهث رأس الدولة ويقبل يديه ورجليه ويرتاجاه أن يتفاوض معه مع أن هذا الاجنبى المجنس لا توجد لديه ركشة على الارض ناهيك عن سيارة دفع رباعى ورغم ذلك يصر رأس الدولة (العسكرى) على مغازلته ومفاوضته ويريد مكافئته ثانية

    دي حالة بلد دي حالة بلد دي حالة بلد

    تتمرد فيه حركة أرهابية مسلحة يتم أقتسام الثروة والسلطة معها وأستيعاب أرهابيها فى الجيش والشرطة والامن ومنحهم رتب عسكرية من فريق ولواء عميد ….الخ وحتى السفارات فى الخارج يتم أقتسامها معهم ثم تنفصل هذه الحركة وتقسم البلد نصفين ويقوم النصف الثانى الذى يتبع لها بل ويتلقى تعليماته ومرتاباته من النصف الذى أنفصل (بمحض أرادته)ويفعلو نفس الشىء القديم (Copy Paste أنسخ وألصق) يتمردو ثم يلهث رأس الدولة (العسكرى)ويقوم بتقبيل أياديهم وأرجلهم ويترجاهم بمفاوضته ويعرض عليهم أمتيازات جديدة

    دي حالة بلد
    دي حالة بلد
    دي حالة بلد
    اللهم أحفظ وطننا وشعبنا من دروشة هؤلاء ومن شر وحقد أولئك