زواج سوداناس

هدف اكرا في مريخ نيالا (تسلل واضح) لكن ما فيه شيء



شارك الموضوع :

قلت اسافر – اهاجر ، اطلع من البلد دي ،سافرت واتغربت ، رجعت بعد 15 سنة…قلت افتح صفحة جديدة ..وانسي اي شيء.

• اول زول لاقيتو كان (سيد اللبن) وانا طالع من المطار..قال لي انت قبال تسافر قبل (15) سنة انا كنت عاوز منك حق نص رطل لبن.

• من كراسي :
• قيل في الحسد :

• لم نر في (الخلق السيء) أعدل من (الحسد) ..!!

• فإنه يقتل الحاسد قبل أن ينتقل إلى المحسود …

• لو تأمل الحاسد هذه لكفته آفته التي يشقى بها قبل غيره ..

• تاوقت منك ليّ..مرقت منك ..بفتش ليك جواي ..اتلخبطت علي الحكاية ..ما عرفت رقم تلفونك من تلفوني..
• ايدي الشمال قبال تلاتة يوم ما كانت هنا.
• وقفت بيني وبينك ، شايل لي (شنطة سوداء) ..جادعها في كتفي..انتي كنت بتشكي من تقلتها..
• شنطة هدومي بقت صغيرة على السفر..
• وشارع بيتنا من غير اي مقدمات ، بقى يوديني لي بيتكم..
• رفعت (المرتبة) لقيت ليّ (جريدة) قديمة ..
• كل ما ارفع لي مرتبة بلقى لي (جريدة قديمة).
• ليه الزول بيقيف (مدهوش) بالصورة دي وقت يلقى ليه (جريدة قديمة).
• الجريدة القديمة بتدهش ليها زول؟!!.
• يمكن عشان التاريخ..
• ويمكن عشان الايام ديك – الايام التى صدرت فيها هذه الجريدة – الحال كان غير…
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• فتحت الشباك …
• عصلج معاي..
• مرات الشباك منو وليه بيعصلج.
• من غير اي مناسبة..
• ومن غير مبرر (منطقي).
• او سبب وجيه.
• ومرات الشباك بيفتح معاك من غير اي عصلجة..
• يمشي معاك زي الترتيب..
• وبدون مناسبة ..او مبرر منطقي..
• لكن انا بعرفها …
• لمن الشباك يعصلج معاي من الصباح – اليوم كلو بكون (مخستك).
• بقنع منو.
• او ما يعصلج يلاقيك بوليس المرور في اول شارع.
• ولمن يفتح معاك – اي حاجة بتكون ظابطة معاك في اليوم دا.
• …..حاولت انسى التلفون في البيت…
• عشان اي زول يضرب ارجع ليه المساء واقول ليه التلفون كنت ناسيه في البيت..
• حِجة.
• طيب انا احسن اشيل التلفون ..يمكن احتاج ليه ..واي زول ما عاوز ارد عليه ارجع ليه تاني يوم واقول ليه كنت ناسي التلفون في البيت.
• حيلة قديمة.
• لكن ظابطة..
• زي شاي اللبن..
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• جربتوا الشوق (الصيني)؟…
• بقت يعني على (الشوق).
• الصينين ديل اتوغلوا في كل الاشياء.
• اي حاجة في البلد دي بقت (صينية).
• التلفون ..
• ماكينة الحلاقة ..
• العجلة ..
• غرفة الجلوس..
• غرفة النوم..
• اي حاجة صينية..
• الخروف في العيد – قالوا طلع (صيني).
• انا جبت لي خروف (بلدي) للعيد ..لكن (مرارتو) طلعت (صينية).
• قالوا (العلف) صيني.
• عشان كدا (الشوق الصيني) ما غريب عليكم..
• الشوق الصيني بتنوم عادي…
• وبتاكل عادي..
• وما فيه اي وجع..
• وما فيه اي حنين..
• شعر ساكت ما فيه.
• الشيء الوحيد الظاهر في (الشوق الصيني) ، انو كلامك عن الشوق بيكون بصوت عالي..
• زي موبايلاتهم (صوت) ساكت..
• والشوق الصيني كمان فيه حاجة ما حلوة – زي الموبايلات الصينية.
• الشوق الصيني بشيل (شريحيتن).
• عادي الكلام دا..
• الساعة 4 مساء في كافتريا قانون بجامعة النيلين خالط بي مزاج.
• والساعة 6 مساء في كافتريا علوم في جامعة الخرطوم بتتكلم عن الاشواق والحنين في العيد.
• بالمناسبة الزمن دا اي حاجة بقت (صناعية)..
• التواصل الاجتماعي بقى تواصل صناعي.
• تواصل وسائط.
• العلاقات العاطفية بقت علاقات فيس وواتس ساكت.
• والشوق ذاتو بقى (شوق صناعي)..
• ممكن يلاقيك زول ما تخلي ليه حاجة في الاشواق – ووقت يقول ليك انا منو؟ تقول ليه والله ما عرفتك..
• اشواقكم بقت (صناعية).
• وعشان اثبت ليكم النظرية دي.
• النجيلة (صناعية).
• وفي اطراف صناعية.
• وفي تنفس صناعي.
• بقت على الشوق يعني..
• يبقى (طبيعي) جدا يكون في شوق (صناعي).
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• نخش على الكورة ..وإلّا نواصل في كلامنا دا.
• لو اتكلمت ليكم عن الكورة بقوم اقبل على الكاردينال – كل ما يرجع السودان يشيل مدرب الهلال برة.
• والليلة الهلال عندو مباراة.
• احسن نواصل في مواضعنا دي – ونعرج في النهاية على اهداف المريخ (التسلل).
• قالوا ليك حافز اوكرا في مباراة مريخ نيالا والمريخ العاصمي قسمو مع حكم الراية.
• وحكم الراية شايف الحافز مفروض يكون حقو براهو.
• اكرا ما عمل اي حاجة.
• الهدف في تقرير الحكم قالوا ليك لقوه مسجل باسم الحكم التاني.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• قالوا ليك في الحلة الفوق في (روسي) اشتري ليه (ديك) من سوق اربعة ..ورجع البيت والديك في ايدو.
• الروسي فرحان فرحة عجيبة بالديك..
• الروسي جاب حلتو ..وقطع بصلتو ..وولع نارو.
• ضبح ليك (الديك)..وشداه ليك في النار.
• الديك كبير في السن – يغلي اليوم كلو في الحلة.
• الروسي اخلص ليك اخلاص رهيب في (شوربة) الديك.
• اتقطع فيها.
• سلب ليك (الديك) من الحلة وشلبو ليك..حمرو ليك في (الطوة).
• الديك بعد الحمار بقى زي قندول عيش الريف.
• حاجة ما تخلص.
• الروسي عصر ليمونو وكبه شطتو ..وقعد في التربيزة عاوز يشرب الشوربة ويضرب الديك.
• اول (جغمة) في الشوربة – جرس الباب ضرب.
• الروسي نفط ايدو من الشوربة ومشى على الباب.
• الباب لقى فيه منو؟.
• الباب لقى فيه حاجة كتومة..دفرت الباب ودخلت..قالت للروسي عندنا (ديك) رايح..
• طلع من البيت ليه (7) ايام…وانا هسع شامه لي ريحة (شوربة فراخ) – في الحقيقة كدا قلبي اكلنا ..وجيت اشوف الحاصل.
• حاجة كتومة بتقول في كلامها دا وماشه على المطبخ.
• لمن وصلت التربيزة – فيها الشوربة والديك محمر.
• حاجة التومة قطعت (الشوربة) كلها ..وقالت للروسي ..انا شوربة ديكي بعرفها.
• اصلو الشوربة دي ما غريبة عليّ.
• رمت كورية الشوربة وقبلت على (الديك) في الحلة..ما خلت فيه شيء.
• حاجة كتومة تضرب ليك في (الديك) وتمزمز فيه ..وبتتكلم مع الروسي – قالت ليه انا (ديكي) بعرفو…حتى لو حمرتو وكترت ليه (البهارات) ..ديكي ما بيغباني.
• حاجة كتومة انتهت ليك من الشوربة والديك ..وقالت للروسي وين (القوانص)؟.
• انا قوانص ديكي بعرفها.
• ضربت (القوانص) وطلعت بعد ان قالت للروسي يا دوب كدا عيني ممكن ترقد – على الاقل بعد (الشوربة) دي قنعت من رجعت الديك تاني!!.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• …………..
• و
• الزومة مضايقة..الاهلي شندي كبس على الوصيف.
• الاهلي فاز على الامل امس ..وماشي على المركز الثاني.
• كلنا اهلي شندي.
• يوم الجمعة القادمة رضا وسيحة ح يظهروا ليكم في التلفزيون.
• تفتكروا ح يقولوا ليكم شنو في هدف اكرا في مريخ نيالا.
• رضا ح يقول نطلع فاصل اعلاني ونرجع تاني.
• احتمال كبير نطلع ووقت نرجع ما نلقى رضا مصطفى الشيخ.
• اما سيحة ح يقول ليكم …اللقطة ما واضحة ..والحكم اقرب للحالة.
• او يقول ليكم اكرا لحظة خروج الكورة كان (مجازا) ما تسلل – والفيفا دخلت (المجاز) في التسلل في القوانين الجديدة.
• سيحة لو اتعصر شديد وما لقى طريقة يحلل بيها هدف اكرا – ح يقول ليكم مباراة المريخ ومريخ نيالا نشوفها الاسبوع القادم.
• الاسبوع القادم ليه؟.
• عشان يقوم يلقى ليه اي (حالة) كدا قريبة في مباراة للهلال يعمل بيها موازنة مع تسلل اكرا الذي جاء منه الهدف.
• الموضوع دا نحن حافظنو.
• وعارفين فيه اي شيء.
• عمنا فيصل سيحة في النهاية بيلف ويرجع يقول ليكم الاسبوع القادم الهدف (تسلل واضح) لكن ما فيه شيء (ظاهرة) ، نسبة لرادءة ارضية الملعب.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ………
• السيدة (ل) – زي عاوز اقول ليك ساعتك كم؟..لكن السؤال دا قلتو كتير!!.
• وقرّط على كدا.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *