زواج سوداناس

كردنة المستعجل



شارك الموضوع :

* قال الكاردينال: (البطولة الإفريقية كان ما خشت في 2017 تاني ما بتخش)!!

* خش اللبن؟

* يا كردنة ما تتشاءم.. وأرجوك ما تستعجل!!

* خلي بالك طويل.. صابر ورابط وما تيأس!

* لو فشلت السنة الجاية عاود المحاولة السنة البعدها!

* البطولة الإفريقية لو ما خشت في 2017 حاول في 2018!

* ولو ما خشت في 2018 اجتهد في 2019!

* الصفر القرني ده ما تستخف بيهو.. في سنة وحيدة ما بتقضي عليهو!!

* الموضوع ده مدور مع الهلال.. من سنة 30 يا كاردينال!!

* انت مش قلت حا تقعد في الرئاسة 25 سنة؟

* يا دوب ليك سنتين في الرئاسة!

* قدامك 23 سنة، مستعجل في القضاء علي الصفر القرني مالك؟

* لو فشلت محاولاتك ممكن تعيدها، لأنك قلت إنك حا تاخد في الهلال (تأبيدة)!!

* لو إنت نفسك قصير.. الصفر عمره طويل!!

* يقولون (للصبر حدود)، والصفر القرني تخطى كل الحدود!

* الميزة الأساسية لصفر الهلال.. هي طولة البال!

* لو عايز تقضي عليهو.. طول بالك عليهو!!

* الشفقة تطير، والصفر لسه باقي عليهو كتير!

* إنت الجوهرة الزرغاء بنيتها في سنتين.. عايز تنهي الصفر في سنة؟

* نصيحة لوجه الله: لو عاوز تنهي الصفر بسرعة.. ما تتعامل معاهو بطريقتك مع المدربين!

* كردنة المستعجل.. لا بصبر علي مدرب.. لا بصبر علي صفر!

* البطولة الإفريقية في سنة ما بتجيك.. لكن في السنة ممكن يجيك صلاح!!

* الهلال والصفر ما بتحملوا فراق.. ومقعد الرئاسة ما بتحمل فراغ!

* بي شفقتك دي احتمال كبير تضطر تسلم مفاتيح الجوهرة للأرباب يا كردنة!

* اسمع الكلام أرجوك يا كاردينال.. سنة واحدة شوية علي الصفر القرني!

* عصرت علي نفسك شديد.. وجهجهت ناس الرشيد!!

* سنة واحدة لن تكفي صهيب الثعلب لاكتساب الخبرة!!

* ثعلبلك ده لو عايز تعلمو صيد حمام.. سنة واحدة ما بتكفيهو!!

* شفعك ديل ما شفع موسم واحد يا كردنة!

* حالياً إنت عندك بشة الكبير.. وبشة الكبير!

* سنة دي لا بتشطب ليك الكبير.. لا بتجهز ليك الصغير!

* سنة واحدة دي بشات ساي تضيع منك!!

* تمر عليك في (بشة عين)!

* لو بتبدأ البطولة الإفريقية من نصف النهائي، السنة شوية عليك!

* كردنة تصريحاته أسوأ من صواميل كشافاته!

* نعلم أن رئاسة الهلال طاردة، لكن ما لي درجة سنة واحدة!!

* بحسب كردنة الموسم المقبل موسم الحصاد الهلالي!!

* بالطريقة دي ممكن المدعوم ما يلقى وقت يلعب في الدوري المحلي!!

* مفروض الاتحاد يعفيهو من اللعب في الدوري المحلي، عشان يحقق اللقب القاري وينهي الصفر القرني!

* قدامه سنة واحدة، مفروض يتفرغ فيها للبطولة الإفريقية!

* لو ما جابها.. فطومة تبقى ناطقة باسم حزب سياسي، والرشيد يقلب الأسياد فنية واجتماعية!!

* الموسم الجايي ده موسم صعب على المدعوم!

* شكلو موسم فراق!!

* كردنة زومتو ضايقة مع الصفر الما بنقدر!!

* ترى هل يعد الصفر عدته لوداع كردنة مثلما ودع من سبقوه في رئاسة المدعوم؟

* كردنة ازدري أهم (موروثات) الهلال بحديثه عن إنهاء الصفر الدولي في عام واحد!

* صفر عمره 86 سنة تودعو في سنة واحدة كيف؟

* غايتو إلا توديهو الحج، أو تعالجه في الأردن!

* صفر شنو البنتهي ليك في سنة واحدة يا كاردينال؟

* الصفر ده لو فتحت فيهو بلاغ.. إجراءات تقاضي ساي سنة ما بتكفيك!!

* لو أصريت علي تصريحاتك دي ما بتنتهي من الصفر، لكن ممكن تنتهي من نفسك!

* النصيحة بالمهلة يا كردنة: ثقافة الاستعجال مع المدربين دي ما تتعامل بيها مع الصفر!!

* القضاء على الصفر القرني ده محتاج تروي وتخطيط ودراسات استراتيجية مكثفة يا كردنة!

* الصفر قاعد من زمن منزول وسبت.. ما بنتهي ليك في جمعة وسبت!

* كردنة لا احترم منزول، ولا احترم جكسا ولا احترم الدحيش ولا احترم قاقا ولا احترم البرنس!

* صفر عاصر كل الأفذاذ.. ما بنتهي ليك بي (هوشة ممتاز)!

* (صفر) السلامة للحول قريب!!

آخر الحقائق

* هناك 28 رئيس سبقوك في الهلال يا كردنة، كلهم حاولوا ولم يستسلموا، مع أنهم لم ينجحوا في تحقيق أي لقب قاري للأزرق.

* الموضوع ده مدور من زمن بابكر قباني، ومتواصل لي زمن البرير يا كردنة.

* صفر قرني.. عاصر بابكر قباني وبابكر مختار!

* صامد ليهو 86 سنة.. شنو البخليهو ينهار ليك فجأة في سنة يا كردنة؟

* عهدنا بالصفر الما بنقدر أنه كثيراً ما يهزأ بمثل هذه الهرطقات، ويخرج لها لسانه الطويل، ويظل صامداً في مكانه، يهزأ بكل من يتوعدونه بالإزالة!

* الصفر القرني قضى على كل من هددوه بالاندثار!

* صامد، وصابر يا عم صابر!

* نسمع في بداية كل موسم حديثاً طويلاً عن أنه سيذهب مع الريح، فيردد في نهايته أغنية محمد ميرغني الشهيرة (لا غيرتنا ظروف، ولا هزتنا محنة)!

* (غيب وتعال.. تلقانا نحن يانا نحن)!

* عاطفة وحنان يا ناس.. وصفر ثقيل ونَّاس!!

* ترررم ترررم ترم!!

* حتى بالنسبة للصحافيين، الصفر عاصر كل الأجيال، وهزأ بكل كتاب الهلال!

* عاصر أبو آمنة وكتب عنه عمر علي حسن وشجرابي ودسوقي وكوركين وسوركين وزامل خالد عز الدين!

* الصفر الشديد.. اتولد قبل عم علي.. والد الرشيد!

* وعندما ظهر إلى حيز الوجود.. كانت فطومة لسه ما مفطومة!!

* أنا طبعاً مفتون شديد بأداء الصفر القرني!

* معجب بيهو أوي، بدليل إني كتبت عنه 15 مقامة صفرية!!

* صموده مشرف، وأداؤه عالي ومستواه ثابت!

* ستة وثمانين سنة.. لا وقع لا اهتز!

* ستة وثمانين عام.. لا تضعضع لا تزعزع لا تراجع!

* لا فتر لا كلَّّ لا ملَّ!

* يا كردنة ما وريتنا البطولة الإفريقية دي حا تخش عليك بي ياتو باب؟

* والبخششها ليك منو؟

* كردنة قال (بنزينا) فشل مع الريال!

* بنزينا وعاجباني!

* سنة واحدة دي لو سجلت فيها (بنزينا) والدون وميسي الأصلي.. لا بتجيب ليك كاس قاري ولا بتنهي ليك صفرك القرني!

* لو ما لحقت نفسك ومددت المهلة حا تلقى الزمن حرق ويجمعوا منك الورق!

* يقولون إن معايشة الأزمة تمهد الطريق للحل.

* سنة دي لو قضيتها دراسة صفر ساي ما بتكفيك!!

* آخر خبر: بنزينا وجازولينا!!

الصدى

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *