أنا بريد البحر..
أنا بريد البحر..عشان كلما تشتهي الضفة قيفه.. بشيل موجو ويغسل مساحات نزيفه.. ومحل تضعف الروح.. ويهد حيلا زيفا.. تجيو لافحة توبا..
ملانات مساماتا لي روحا توبة
تغسل ذنوبا.. تفرتق ضفاير أساها وتتلب على الشط نضيييفة أنا بريد البحر..
وأريدك متل ما بريد البحر.. سمح.. لامن الشوق يفج موج دواخلك.. تطير في فضا الريدة جنحيهو فر.. أريدك.. حنين كلما اتحاوطنو القصايد.. بلاقنو هد الحواطة ودفر.. عشق.. ما لحق غير طرف توب عيونك.. ملا الدنيا فجر براكين جنونك.. هجر ضجة الإلفة في أغنياتو.. وبراك حارب الخوف.. وما كان بدونك.. ولا.. جيت.. خبارك
وكت نحن آمنا بي طيفك.. البينا صد وكفر.. أنا بريدك متل ما بريد البحر.. البحر.. وححدو الكلما جيتو بي جرحي تافق سحاباتو صبن دمع.. وححدو المستحيل في قوانينو.. طول سكتك.. واشتهاي تجتمع.. وححدو الحنسنو الحروف راودن ليلو.. سون عيونن بدور.. واشتهن جيتو.. بققن رقابن شمع وححدو الكلما جيتو مكسورة.. سكت صغار المحار في حشاهو نكت حزني من نبتو.. بالحب حشاهو.. ودرب وجعتي الخايفة أمشيهو طول.. نفض إيدو من نومو صبح مشاهو.. وبراهو الولا بالغلط داس مشاعري.. الولا بالغلط فيني فد يوم طمع ورغم إنو ما بتشبه الريدة زيك.. ولا بتستحق انت ريدي البريدو.. غصب.. فاتحه لي نبضي خشم الحياة الفيك
غصب قلبي فاتح عليك باب وريدو..
غصب رغم انك بتفتح مكامن ابتساماتي للوجعة.. همي بتزيدو.. بسيك.. للهموم التفج قلبي مسرح.. محل شفع البيت يبكوني بفرح.. ومحل أنجرح ..عااارفة ما بقدر أجرح.. عشان.. البحر.. قال وكت عبا جرحك.. نضال.. مهما يهجر ديارك ويغادر.. بجيك حاري قلبك.. حوارو ومسيدو.. بجيك.. وانتي.. وححدك.. من الوجعة ضللو.. بجيك.. وانتي دون الخلق.. كنتي كللو.. بجيك.. للغنا الفي ضراك ما بمللو..
بجيك حااري قلبك وسط حزنو عيدو وعشان بعشقك يا حبيبي البحر..
بريدك.. محل تكفت الغصة حلقي.. ومحل يملأ بردك سحاباتي حر.. بصبك مطر.. مطر قاعدو أريدو.
نضال حسن الحاج
المجهر
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة