الدفرة بالورقة والقلم

• من رأسي :

• (بص الوالي) لو استمر بهذه الطريقة يمكن الموسم القادم نسمع عن شباب ناصر والمريخ (دار الرياضة ام درمان) – كوبر والمريخ (استاد التحرير) – المريخ وابوروف (استاد المريخ) – ام بدة والمريخ (استاد الخرطوم) – المريخ وبري (استاد المريخ).

• وممكن برضو لمن المريخ تكون عندو مباراة امام (الموردة) يقولوا ما بيلعبوا زي ما بقولوا الآن امام (الاهلي شندي).

• انتبه (بص الوالي) يرجع للخلف.

• من كراسي :
• يقول ديفيد اوجليفي في كتابه (اعترافات رجل اعلان) أنه من الخطأ استخدام لغة اطناب في الاعلان..وقال : (لقد استخدمت يوما كلمة (مبتذل) في عنوان اعلان فاكتشفت ان 43 % من ربات البيوت ليست لديهن أية فكرة عن معناها ..وفي عنوان كبير آخر استخدمت كلمة (يفوق الوصف) لاكتشف بعد ذلك انني انا نفسي لا اعرف معناها.

• لقب (المدفور) الذي اطلقته الزميلة (الاسياد) على المريخ يبدو انه وجد حظه من (الثبوت والرسوخ).
• بقيت لو ما قلت (المدفور) ما بتعرف (المريخ).
• طبعا الموسم دا ح نجمد لقب (الوصيف) الذي يبدو قريبا جدا من الاهلي شندي.
• رسوخ لقب (المدفور) ثبت لأن اللقب جاء وسط عدد من (الدفرات) تثبت على المريخ اللقب ، اضافة الى ان (الدفرة) تتوافق تماما مع (بص الوالي) ، اذ تعرف الاشياء بقرائنها ، خاصة في القانون الجنائي.
• بالمناسبة سواقة (الركشات) ما زي سواقة (البصات) ، عشان كدا مزمل ابوالقاسم دا بجيب خبركم.
• احسن يسوق ليكم عبدالصمد..سواقة مزمل دي خطيرة عليكم – بتوديكم دار الرياضة ام درمان.
• دا لو ما ودتكم (ميدان عقرب).
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• اذا تتبعنا للدفرات التى وجدها (بص الوالي) هذا الموسم سوف نجد ان هذه (الدفرات) كفيلة ان تتوج فريق (النسور) الام درماني باللقب رغم هبوطه الرسمي الآن من الممتاز ، كما اشرنا الى ذلك من قبل.
• ازعم ان الدفرات والمساهمات التى وجدها (المدفور) من الاتحاد العام هذا الموسم اكبر حتى من تلك التى وجدها (المدفور) في الموسم الماضي والتى توج على اثرها بطلا لمنافسة يبعد فيها الهلال عن الوصيف المتوج (مكتبيا) بـ (9) نقاط بعد خسارة المريخ امام الاهلي مدني.
• مع البطولة (المكتبية) قدمت للمريخ في الموسم الماضي ودخلت عليهم بالساحق والماحق ، إلّا ان ما قدم للمريخ هذا الموسم اعظم واكبر.
• اختلفت انواع المساعدات في هذا الموسم عن الموسم الماضي لتقدم لهم هذا الموسم بطريقة حديثة ، حيث تبرّمج مباريات المريخ على طريقة خدمة (الديلفري).
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• تعالوا انظروا للخصوصية والخصصة التى حظي بها (المدفور) في برمجة مباريات الممتاز هذا العام.
• رغم اني اكتب من الذاكرة دون رصد دقيق لحالات (الدفرات) التى وجدها المريخ هذا الموسم ، إلّا ان ما تجود به الذاكرة لوحدها يكفي لتورط المريخ في مساعدات كفيلة ان تجعله بطلا للممتاز لمدة (10) سنوات قادمة.
• المريخ في بداية هذا الموسم تم تقديم مباريات المريخ في الفاشر من الاسبوع السابع والثامن امام كل من مريخ وهلال الفاشر لتلعب في الاسبوع الثالث والرابع ، بعد ان ظهر مريخ وهلال الفاشر في الاسابيع الاولى للدورى الممتاز بمستوى ضعيف اغرى المريخ على اللعب امامهما في الفاشر.
• هذه اول حالة (دفرة) تضبط في تقديم مباريات لصالح المريخ وتأخير مباريات المريخ امام الامير والنسور في الاسبوع الثالث والرابع.
• هذا التقديم قابله تأخير اخر منح له المريخ دون كل اندية الممتاز ، اذ تم تعليق مباريات المريخ امام كل من (الخرطوم الوطني) و (الاهلي شندي) و(هلال كادوقلي) و(الهلال) في الدورة الاولى ليلعب المريخ امام الخرطوم الوطني في خواتيم الدورة الاولى وهو الذي يفترض ان يلعب امامها في الاسبوع الـ (11).
• كما تم تأجيل مباراة المريخ امام هلال كادوقلي في الاسبوع الـ (14).
• اما مباراة المريخ امام الاهلي شندي والهلال فقد (دفرهما) الاتحاد العام لتلعب بعد فترة التسجيلات وفترة الراحة ومع انطلاقة الدورة الثانية للممتاز.
• كل هذه (الخرجمة) حظي بها المريخ وحده في الدورة الاولى للممتاز.
• في الدورة الثانية تهرب المريخ من مواجهة الاهلي شندي ولاذ بالفرار من مواجهة الهلال وهو يتعلل باسباب لا علاقة لها بالمباريتين.
• مرة يقولوا ليك (الحوار الوطني).
• الحوار الوطني انتوا لاعبين ضد (الصادق المهدي)؟.
• ومرة ثانية يقولوا ليك ما بنلعب امام الاهلي شندي قبل حسم استئناف (شيبوب).
• طيب الاهلي شندي علاقتو بـ (شيبوب) شنو؟.
• الطريف ان الاهلي شندي نفسه عنده شكوى مضمونة في (الوك) لاعب المريخ الجنوب سوداني ، لم تحسم بعد.
• ولا في زول قاعد يجيب سيرتها.
• الاتحاد العام كان قد قام اولا بخرمجة عجيبة قبل ضغط الاهلي شندي والخرطوم الوطني والتهديد بالانسحاب ليعود ويبرمج مباراة المريخ امام الاهلي شندي يوم 8 اكتوبر..ومباراة الهلال والمريخ يوم 13 اكتوبر.
• يعني المباريات برضو اجلت لصالح (المدفور).
• مع هذا ومع كل هذه (الدفرات) البتوصل الزول (جبل اولياء) ، إلّا ان المريخ مازال ينافس على (المركز الثاني).
• وهو مهدد بفقدان (وصافته) او مركزه الدائم الذي كان دائما خلف الهلال.
• السنة دي خلف الهلال ذاتو ما تحلموا بيها.
• هذا ما جعل المريخ يهدد بالانسحاب تارة لنقل قناة النيل الازرق حفل تتويج الهلال وتارة اخرى لعدم حسم استئناف شكوي شييوب.
• عليكم الله قناة النيل الازرق دخلها شنو بالموضوع؟.
• البعمل فيه (المدفور) هذه الايام …شغل (خوفة) عديل كدا ..و(رجفة) ساكت ما عندها اي اسم غير هذا الوصف.
• فقد ظل المريخ في كل المواسم يتهرب من مواجهة (الاهلي شندي) الذي كان يبحث دائما عن الالتقاء به في ظروف يكون فيها الاهلي غير مستعد او غير معنى بنقاط المباراة.
• هذه المرة – ومن فضل الله علينا ..مواجهة المريخ للاهلي شندي ، تأتي والفريقان يبحثان عن (وصافة) الهلال.
• يعني الاهلي شندي في موقف لا يسمح له بالتهاون ولا مجاملة المريخ كما كان يفعل في مباريات سابقة.
• الموسم دا تشيلوا شيلتكم ساكت..وتبلوا رأسكم.
• الموسم دا صلاح ادريس ما عندو اي طريقة لـ (الحبيب تكعيب).
• تتداوسوا بس.
• مباراة دواس عديل كدا.
• والشاطر يكسب.
• ونحن ما عندنا مشكلة.
• لقبنا حسمناه قبل اسبوعين.
• موقع وصافة الهلال مازال شاغرا …الميدان هو الفيصل.
• المدفور حاول كما هو معروف عنه ان يحسم الوصافة عبر (المكاتب) ، لكن ما وجد اي طريقة.
• ما عندكم طريقة – يوم الجمعة نشوفكم في (الملعب) بس.
• او كمان ح تنزلوا التانية ويبقى ظهوركم فقط في (دار الرياضة ام درمان).
• على العموم دي نهاية (انتصارات المكاتب).
• المكاتب ما بتودي لي قدام.
• هذه الدفرات في البرمجة وحدها …غير دفرات (الحكام) التى سوف نعود لها لاحقا.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ……………
• و
• المدفور شغال بمواضيع فارغة وما عندها قيمة.
• مجلس الهلال عليه حسم ملفاته في التسجيلات.
• الممتاز اتحسم بالنسبة لينا.
• ركزوا في كاس السودان والتسجيلات.
• والحاجات الجانبية دي ما تشتغلوا بيها.
• ولا تزعجوا بيها نفسكم ساكت.
• هذا هو التوقيت المناسب لحسم ملف التسجيلات.
• سالمون مكسب كبير للهلال لو تم قيده في الكشوفات الزرقاء.
• سالمون ممكن يكون من الدعومات المهمة للهلال لكي يفوز الهلال ببطولة الاندية الافريقية في الموسم القادم.
• نسأل الله ان تكلل الخطوات بالنجاح.
• مباراة اليوم امام الخرطوم الوطني نريدها احتفالية.
• بعيد عن التوتر والتشنج.
• الخرطوم الوطني تدخل المباراة تحت ضغط كبير باعتبار ان نتيجة المباراة تجعله قريب من الكونفدرالية.
• عدم مجاراة الخرطوم الوطني ..امر مهم للغاية.
• كذلك انتصار الهلال في المباراة ..امر لا بد منه.
• الخرطوم الوطني فريق بيلعب كورة.
• والليلة يمكن ان نستمتع بمباراة كبيرة ان شاءالله.
• الحسم مهم.
• والفوز ان شاءالله ضروري.
• لكن في كل الاحوال المباراة بالنسبة لينا (ودية).
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• …………
• السيدة (ل) – الحكومة جرت الزمن (ساعة) – انا الليلة جريتو (10) ساعات لمن مغربت من الصباح.
• وقرّط على كدا.