رأي ومقالات

للأطباء أن يطالبوا بحقوقهم وليس أن يكذبوا علينا ويستحمروا الغلابة.. الشعار الوهم “اضرابنا عشانك يامواطن” لغة ابتزازية للتجييش !!


هذه هي الحقيقة وإن غضب الأطباء ليست لدي مشكلة مع الأطباء لكن مشكلتي مع الاستحمار !!
للأطباء أن يطالبوا بكل حقوقهم لكن ليس لهم أن يكذبوا علينا ويستحمروا الغلابة
الذين يستنكرون علي ما أكتب عن الشعار الوهم #اضرابنا_عشانك_يامواطن هذه اللغة الابتزازية فقط كانت للتجييش !!
أنا على اطلاع تام بما دار بين اللجنة المركزية ونائب الرئيس ومن قبله وزير الصحة لقد كانت اللجنة داخل غرف الاجتماعات تتحدث عن حقوقها ( حوافز مرتبات تدريب ميز أطباء ) وتتحدث للإعلام عن المرضى هذه هي مذكرة التفاهم مع نائب الرئيس حتى نكون واضحين وهذه هي قائمة المطالب التي يجب تحقيقها خلال أسبوع :

*علاج الحالات الحرجة و الأطفال دون سن الخامسة مجاناً ( هذه هي للمواطن لزوم التذويق طيب رأيكم شنو تعملوا بهذا البند أو تخفيض 50% في عياداتكم الخاصة ؟!! في مدرستي الخاصة بقبل أي طالب فقير أو يتيم بتخفيض 75% وبقبل الطلاب من أبناء المهاجرين من سوريا واليمن ومصر بتخفيض 75% وبقبل الطلاب من الأسر النازحة إلى الخرطوم من مناطق الحرب وهي فقيرة بتخفيض 75% وفي مركزي للتدريب بدرب أبناء الفقراء بتخفيض 75% في جميع الدورات التي يتطلبها تطويرهم في تعزيز سيرتهم للحصول على وظيفة في تخصصاتهم وإن كتانت الدورات نادرة وبشهادات عالمية وفي شركة شباب بزنس بندفع الأسرة 15% من تكلفة مشروع الاستثمار وبنديها أرباح 40% أعلى من نسبة مشاركتها ب25% عايزنكم تعالجوا الاطفال الفقراء بتخفيض 50% في عياداتكم الخاصة )

• تهيئة الحوادث بشكل نموذجي في ( 22 ) مستشفي في العاصمة و الولايات بشكل عاجل كمرحلة أولى . البان جديد .. الشعب .. البلك .. التركي .. بشائر ، و مستشفى رئيسي واحد لكل ولاية ((17 مستشفى تمثل 17 ولاية)) وهي : الفاشر .. نيالا .. الجنينة .. النهود .. الدمازين .. الأبيض .. سنار .. الضعين .. كسلا .. القضارف .. بورتسودان .. دنقلا .. عطبرة .. زالنجي .. كوستي .. مدني .. كادوقلي ..( هذه للمواطن بسرونا كيف حتكون في أسبوع وإذا ما تمت أرجعوا في اضرابكم ولو زادوا مرتباتكم ونفذوا مطالبكم في التدريب والحماية )

●توجيه رئاسي بتفعيل تنفيذ قانون الخدمة المدنية من جانب الاعتداء علي الاطباء كموظفي خدمة مدنية و إلزام المستشاريين القانونيين للمستشفيات بتولي جميع اوجه الدفاع عن الاطباء في جميع القضايا التي تختص بالطبيب .( هذا مطلب لصالحكم الزام الحكومة بالدفاع عنكم في مواجهة المواطن الذي أضربتم عشانه !!).

• توجيه رئاسي بالشروع في سن قانون لحماية الطبيب و الكادر الطبي ..( هذا مطلب لصالحكم حمايتكم من المواطن الذي أضربتم عشانه )

• قرار من وزارة الصحة بتعديل عقد التدريب بخصوص الإلزام الزمني للنواب وفق لائحة التدريب القومي لتصبح لمدة (4) سنوات للإبتعاث الداخلي على نفقة الدولة ..( هذا مطلب لصالحكم )

• إلتزام وزارة الصحة بكافة الرسوم للمبتعثين علي نفقة الدولة بما يشمل رسوم التدريب و رسوم الكورسات المشروطة لنيل درجة التخصص و رسوم إستخراج الشهادات للمتدربين على نفقة الدولة ..( هذا مطلب لصالحكم وهذه ستدفعها لكم الحكومة ليس من جيب حسبو عبدالرحمن وإنما من جيب المواطن الذي أضربتم عشانه قال إضرابنا عشانك يا مواطن إضرابكم سيزيد الضرائب على المواطن حتى تستطيع الحكومة الوفاء لكم بهذه المطالب )

• قرار بإضافة نواب الإختصاصين لحافز الكشف الموحد 2% ..( هذا مطلب لصالحكم بالله دي آخرتها زيادة حوافز !!)

• قرار بالإلتزام ببدلات التدريب وفق اللائحة و بدل العيادة 250 ج سوداني ..( هذا مطلب لصالحكم يا حبيبنا الطبيب ال250 جنيه دي حيدفعها لكم حسبو عبدالرحمن من وين من مزرعة البشير في السليت ؟!!)

• وظائف للنواب لتوفيق اوضاعهم في المستشفيات ..( هذا مطلب لصالحكم المطالبة بتوفيق أوضاع وتحسين أوضاع اتقوا الله المرضى يتلوون من الألم وأنت مضرب عايز توفيق أوضاع كم دمعة نزلت وكم نفس زهقت وكم حالة تأخرت وكم مرض إزداد عضالا وأنت عايز توفيق أوضاع قال إضرابنا عشانك يا مواطن بالله !!)

• إرجاع جميع المفصولين و من اتخذت ضدهم عقوبات إن وجدوا بما فيهم اطباء مستشفى كوستي ..( هذا مطلب لصالحكم )

• دعم بمبلغ مالي عاجل لتهئية الميزات و استراحات الأطباء حدد 1.500.000ج ..( هذا مطلب لصالحكم من غير تعليق غير إضرابنا عشانك يا مواطن كم من مواطن تأخرت حالته لأن الطبيب بشاهد كورة في الميز وبعد التحسين وتضربكم المكيفات حيموت المريض قبل ما ميسو يجيب قوون )

• معالجة قضية نواب امدرمان الذين اتهمو بالقتل العمد بفصلها من ملف الجاني ..( هذا مطلب لصالحكم هذا موضوع بيد القضاء لماذا تطالبون فيه بفصل قبل انتهاء دورته في القضاء )

• تبني و دعم مراكز التدريب التابعة لمجلس التخصصات الطبية بالخرطوم و الولايات .( هذا مطلب لصالحكم بالله شوفوا المحن دي ).

هذه هي المطالب كاملة وعلى المواطن أن يحكم هل هذا الشعار كان صادقا أم لا #إضرابنا_عشانك_يامواطن
وسننتظر أسبوع حسبو نشوف ما الذي سيتحقق من هذه المطالب وأنا بحرضكم من حسع إذا ما تحقق الأول والتاني ولو رفعت مرتباتكم وتحسنت بيئة ميزاتكم أرجعوا للإضراب ونحن كلنا معاكم ولو عملتوا كده تبقوا جدعان وسأعتذر عن أي كلمة كتبتها هنا
إن غدا لناظره قريب وحنشوف من الذي سيعتذر للتاني.

محمد علي الجزولي


‫18 تعليقات

  1. والله انك متخلف حقيقه.كل هذه الطلبات سواء كانت مايخص المواطن او الطبيب فهى فى النهايه حقوق وليست منحه.كيف لطبيب ان يعمل فى ظل بيئة افضل منها دكة البهائم كيف لطبيب ان يعمل ومرتبه لايكفيه حق الفطور وووووو.حقيقة انت مافون…وامثالك لايجب ان يكون بواب مع احترامى للمهنه ناهيك ان يكون صحفى حقيقة شئ مخجل.

  2. يستغل اضراب الاطباء والصدي الاعلامي والعالمي الواسع لاضراب الاطباء للاعلان عن مدارسه الداعشيه المدعومه صهوينيا طالما تدعم هذا التطرف المبغوض والتقرب من الحكومه من جانب اخر ويبث سموم حقده وقلبه الاسود المريض
    شفاك الله ايها الموهوم

  3. ليس لدي شيئ ضد الاطباء !!. بل لديك كل شيئ ضد الاطباء ..لماذا تستكثر عليهم ان يطالبوا بحقوقهم ..الا يستحق الطبيب ان يكون له دخل محترم بعد سنوات طويلة من الدراسة و بعد ان سبق جميع منافسيه بما فيهم حضرتك ليتأهل. بالمناسبة كثير من الاطباء النواب الذين يعملون للتخصص يعملون مجانا و يسهرون حتى يستقبلوك في اخر الليل اذا قلقت من نفاخ او تخمة جراء ملء كرشك بشواء او كمونية..لو كان اضراب الاطباء لمطالبهم فقط لحق لهم و لا يلزم اضافة تحسين الخدمات الصحية حتى يتهمهم امثالك بالنفاق..مشكلة الاطباء في بلدنا انهم ضحية للجهلة و مصابي عقدة النقص.

  4. الراجل بقلع حقو براهو ما بينتظر الدكاترة يقلعو ليه. انت اصلا منو؟؟ كائنات وهمية فشلت في حياتها وامتهنت الارتزاق. تقدر تقول انت مهنتك شنو؟

  5. الاستحمار ودا اولاد الناس يقتلو الأبرياء في الجنوب بإسم الدين و هنا قانون التحلل اشتغل

  6. الان وقد استجابت الدولة لمطالب الأطباء بتحسين ميز الاطباء ورفع مرتباتهم وعلاواتهم ومخصاصاتهم..لاغضاضة لنا فى ذلك رغم انهم تحصلوا عليها تحت واجهة المواطن المسكين وبزعم انتزاع حقوقه ولكن الحقيقة انهم يسعون إلى ما ذكرناه اعلاه.
    الان ما هو المقابل؟ نتوقع من الدولة أيضا ان تحاسب الأطباء على التقصير وضعف الكفاءة والأخطاء الطبية والإهمال الطبى وذلك من خلال مراجعات دورية لسجل الأطباء واخضاعهم لامتحانات ربع سنوية تحدد الترقيات او الفصل من الخدمة، ووضع كاميرات مراقبة فى الأقسام المختلفة للمستشفيات وذلك للتاكد من قيام الطبيب لعمله على اكمل وجه وايقاف الممارسات عير الأخلاقية التي تحدث..ايضا يجب وضع قوانين صارمة للمحاسبة على الأخطاء الطبية وتتعامل مع الاهمال والفشل الطبى حتى لاتمتلئ المقابر بالمساكين من ضحاياهم.
    اذا لم تنفذ هذه الأشياء فانا في اعتقادي انا مستوى الأطباء فى السودان سوف يزداد ضحاله وسوء وسوف تكثر الاعتداءات عليهم من جانب المواطنين وحينها لن تستطيع الدولة ان تلوم المواطن ولن ينفع الطبيب شوية الملاليم التى تحصلوا عليها على حساب المواطن البسيط.

    الا هل بلغت اللهم فاشهد

  7. سوف اشرح لهذا الشخص المتخلف لماذا كان الإضراب من أجل المواطن
    عندما يكون الطبيب جالس في الحوادث ولا يوجد جونتيات ويأتي إليه شخص مثلك يشكو من بواسير فعليه أن يدخل أصبعه في مؤخؤترتك بعد أن يكون أخرجها من مؤخرا شخص آخر مثلك
    فلم يرضي ذالك لنفسه ولم يرتضيها لك وطالب بالجونتيات من اجلك
    هل فهمت يا هذا

  8. الطبيب الان صار يبحث عن الوضع الاجتماعي واحترام الناس له…عاوز لمن يجى مناسبة الناس تجر ليهو الكرسى وتقول ليهو اتفضل يادكتور…..وده ما حاصل الان..الكلام ده كان زمان..عندما كان للطبيب هيبة واحترام اكتسبه بالكفاءة المهنية والمقدرة العلمية…أطباء كانوا يعملون في أحلك الظروف ولم نسمع عن خطأ طبى واحد ولم نسمع عن مواطن اعتدى على طبيب…اما الان فحدث ولا حرج. …
    هل تعلم بان حرب الجنوب كانت السبب الأول فى الوفيات في السودان. .اتت بعدها مباشرة الأخطاء الطبية ثم حوادث المرور. …لكنها طبعا من الاحصائيات المسكوت عنها..نظام غطى قدحك…اها القدح ده فى ناس زهجو وملو انهم يغطوهو وبقو يدقو ويجلدوا الدكاترة عينك ياتاجر. ..الخوف من تزايد ضعف الكفاءة وازدياد الأخطاء الطبية لان المواطن لم يحتمل وهذا ما نخشاه على أطباء اليوم.

  9. االفاقد التربوي المدعو أحمد ده قال الدكتور يبحث عن الوضع الاجتماعي كلماتك تظهر مدي الحقد والحسد انت الذي تبحث عن مازكرت اخيرا ليس لك ولكن لمن يحب هذه البلد حقا البلاد تقاس بمعدل الصحه الذي يمثله الطبيب والتعليم الذي يمثله المعلم ولاثنين يضربوا نهار جهارا وأصبح المعلم يخاف من تلاميذه والطبيب يبحث عن وسيله للدفاع عن نفسه اخيرا أن رأينا نسبه الأوساخ والباعوض والذباب سنعرف مدي الضغط الذي يقع علي الطبيب فبدل مانهاجم الطبيب اقضي علي مسبيبات المرض

  10. التعليق على الخبر غير مهم..ولكن الادهى والامر ان يكون هذا الرجل التكفيري هو من يكتب وينصح..والمصيبة الاكبر مدرسته التي يتبجح بها والتي سيخرج منها مئات الدواعش في السنوات القليلة القادمة..يا مسلمييييين احذروا محمد علي الجزولي(عليه من الله مايستحق)

  11. ارجو من الاخ الكريم زول ألا يربط بين مهنة شريفة زادها أصحابها شرفا الا وهى مهنة التعليم،
    … ومهنة شريفة الا وهى الطب دنس شرفها اجيال لاتعرف للشرف معنى ولا للامانة سبيلا ولا للكفاءة والمعرفة والعلم دربا…

  12. دي حقيقة. . كل مطلب زيادة مالية يتم حلبه من الشاه السودانيه اقصد المواطن السوداني .. عشان كده نرجو سحب اي بند مطالبة ماليه ..نحن ماناقصين ..انعل ابوك لابو اهل ابوك ي عمر البشير
    ميتينا طلع كل يوم زيادة .. زيادة ..زيادة
    وانت معديها لينا جعير وكواريك ورقيص ..ترقص في جهنم انت وكل الكلاب المعاك

  13. انت اول شئ مابتعرف عن الاطباء اي شئ انا ماعارف انت فكوك كيف انت وشيخ السديرة افكاركم كلها منحرفة عن الدين القويم اما مدراسك المشبوة دي والله المفروض ولا واحد من الشعب السوداني ولو مجان مايدخلها ..
    انا ماعارف ناس زيك كيف بكونوا موجودين ويتكلموا عن حاجات بتخص الاطباء او غيروو

  14. الاستاذ الكاتب، صاحب الأفق المحدود مع احترامي الكامل لشخصك الذي قد يكون – و الله اعلم – ارفع من شخصي الضعيف.
    تحسين أوضاع الأطباء يصب بصورة غير مباشرة في تحسين وضع المريض، لما الطبيب يكون عندو حافز يركب ليه امجاد بيقدر يصل في الزمن المناسب للمريض، احسن من تديه 1000 جنيه و تفطرو عيشة فيها 4 طعميات و تصدق ليه بوجبة واحدة في اليوم، و تجي تطالبوا انو يهتم بالعيان و يشيلوا فوق راسو، ياخ والله كفار قريش ما كانوا بيعملوا لعبيدهم زي م الدولة دي بتعمل في الأطباء عزيزي المحترم.
    ثانيا، استراحة الأطباء ما عشان في وقت الدوام الواحد يمشي يحضر ميسي ( السمو ميسي ما ميسو)، و إنما عشان في أطباء بكونوا في الدوام و في أطباء بكونوا منتظرين دورهم يجي عشان يمسكوا العيادة، شغل الأطباء دا و شغال المستشفى دا انت- رغم علمك – جاهل جدا فيه، لانو الي مطلب هنا عزيزي صاحب الفم المنفوخ بيصب في مصلحة المواطن بطريقة أو أخرى.
    ثالثا.. .. مافي أخصائي بيجيهو فقير بيطردوا، إلا مأمون حميدة، و عملها مع صحبي و انا كنت معاه و كنا الوقت داك أطفال و هو ما كان وزير صحة، و إنما كان مستشفى الأكاديمي اللي قالوا عليهو خيري طردنا منو بسبب القروش و صحبي عيان. غيرو لحدي الان الى أخصائي مشيت ليهو و معاي زول ما عندو قروش كان بكشف عليهو مجانا، اما الفحص و الدواء دا شغل المعمل و الصيدلية، يعني عزيزي الكاتب بتفكير محدود…. ما ممكن يجوني المرضى في العيادة اكشف ليهم مجانا و اديهم قروش كمان يفحصوا في المعمل و يشتروا الدواء من الصيدلية، لا ما كدا و بس…. كمان اشتغل في الحكومة تقوم تديني 2000 جنيه.
    عليك الله…. استحلفك بالله….. اختبر قبل ما تكتب

  15. انت لو زعلان انو الناس ما بتديك قيمة زي ما بتدي الدكاترة ما تفرغ غلك وزعلك علينا امشي اقرا كلية طب ان ش الله خاص بنادوك دكتور لمن تتخرج…
    والله بنادوك دكتور قبل ما تتخرج كمان…

  16. الشئ المؤسف في الامر هى كمية الجرس والبكاء والتحانيس من جانب الأطباء عشان يشطبوا قضايا الأخطاء الطبية ضد زملائهم وفى نفس الوقت بيطالبو برفع مده عقوبة الاعتداء على طبيب لمده 4 سنوات..

    …يعنى طبيب قتل مواطن وعايز الدولة تسامحو وفى نفس الوقت عايز المواطن ما يعتدى عليهو.

    اى غثاء هذا؟

  17. والله الفهم قسم طبعا

    لما الاطباء يطالبو بتحسين بيئة العمل دي ما ليهم دي للعيان يا استاذ
    بعدين نفرض انو طالبو بحاحات تخصهم هم دا حقهم ولا حق غيرهم؟؟
    من حقهم يطالبو
    اي زول لمن يكون مرتاح في شغلو و مهيأ تماما من جميع النواحي ماديا ونفسيا بحيث
    يكون حاسي بالامان في عملو دا بنعكس على الآداء
    يعني بنعكس على المريض بصورة غير مباشرة
    عليك الله بعد دا خليك ضد الاطباء عشان ما تقول انا ما ضد الاطباء هههههه

  18. انت لو ما حاسي بالامان في شغلك بتقدر تشتغل؟
    طبعا لا
    طيب لمن ما تقدر تشتغل المتضرر الاول منو؟؟
    اكيد العيان
    طيب لمن يكون في قانون حماية الطبيب (طبعا المطلب دا للاطباء حسب نظرك)
    حيكون في امان في العمل مما ينعكس ابجابيا على الاداء )

    طيب لمن يطالبو بتدريب محترم دا لمنو دا مهم للمواطن اكتر من الطبيب لانو كل ما لقى الطبيب تدريب احسن كل ما استفاد منو المواطن )
    ربنا يشفى اصحاب العقليات المعاقة