رأي ومقالات

نيران صديقة


(راجل الشلب مشلوب ) ..هذه العبارة اضحكتني ..واثارت كوامن أسئلة تراكمت في غياهب ذاكرتي طويلا..اذ انني كلما سمعت حكاية امراة (خطف منها زوجها) ..يكون السيناريو المشترك هو كيل السباب لتلك (الشلابة) …هذا وقد تكونت احزاب وقروبات فيس بوك وواتساب لمحاربة كل من تحدثها نفسها بظاهرة الشلب ..اما سيد الناس المشلوب….فهو يجلس متربعا ..في انتظار من تنتصر في المعركة وتفوز بقلبه الرهيف ..الما بقدر علي الهبباي في عز الصيف.
قريبتي ..في زمن التلفون ابو قرص ..رفعت السماعة ..لتفاجأ بسيل سباب ينسكب عبر الاثير (اسمعي هوي يا انتصار ..ابو ذر دا احسن ليك تبعدي منو ..انتي قايله الفكي حقك دا ما عندي خبرو؟؟ انا شيوخي ديل البروبوا الموية ..احسن ليك ..وو) ..قريبتي مقاطعة (لكن ..انا) ..الصوت العابر للاجواء (اسمعي هوي ..انا متصلة ما عشان اسمعك ..انا ضاربة التلفون دا عشان اتفشى ..واقول ..ليك ابعدي من ابو ذر ..دا اخر كلام )..ووضعت السماعة وسط دهشة قريبتي ..التي حكت لي ضاحكة (انا كنت عايزة اقول ليها ما اتفشيتي يا اختي ..انا ما انتصار)..هذه النيران الصديقة ..ألم يكن من الاجدى لها ..توجيهها لي سيد الاسم ؟؟ انت يا ابو ذر ..انتصار دي مني يا اخوي؟؟
اليس غريبا هذا؟؟ نحن معشر النساء ..نشكي مر الشكوى من ظلم حملة الواي كروموسوم وتكتلهم ضدنا ..وعند اول منعطف ..نوجه كل طاقاتنا في كيل السباب لبعضنا ..ونتركهم في النعيم يرفلون حتى انجلاء المعارك ؟؟..لكن البشريات قادمة والاستنارة في طريقها للتطبيق ..اذ ذكرت صديقة لي بان اتصالا اتاها ..ذات مساء ..بادرتها احداهن (اسمعي انتي منو؟؟) ..صديقتي (انت متصلة ..يبقى انتي عايزة منو؟) ..المتصلة (لقيت الرقم دا في تلفون (علي) زوجي) ..صديقتي (يبقى تسألي (علي ) عن الرقم دا حق منو؟) …يبدو انها لم تيأس ..لان الهاتف رن مرة اخرى وكان الصوت مختلفا (اسمعي لقينا الرقم دا في تلفون علي اخوي ..بس كنا عايزين نتعرف بيك) ..صديقتي بهدوء قاتل (اسالي علي اخوك ..هو اقرب ليك مني )..والحقيقة ان صديقتي لم تعرف اي (علي) تقصده هؤلاء النسوة ….لكن النصيحة اعجبتني انها حاولت بقدر الامكان توجيه النساء (للفيل) ..وصرف النظر عن ظله…
الشاهد في الأمر يا بنات أمي ان الرجل نجح عبر الدهور في توجيه الانظار بعيدا عنه ..فقد كان يمسك بالريموت في يده ..وكان طوال الوقت يمثل دور الضحية والمغلوب على امره ..بل وصل الامر ببنات جنسي في تصديق الامر ..حتى تجدهن ما ان يسمعن بقصة (شلب احدهم) حتى يكال العتاب لزوجته (المهملة) التي تركته (كدا) في عرض الطريق .. اليس غريبا ان (كامل العقل ) لا يستطيع العودة وحيدا الى البيت ؟!!!
اها ..بعد دا يا بنات أمي ..كان وصلك الشمار بأن هناك محاولات (لشلب) تمساح الدميرة الما بكتلو سلاح ..ما عليك الا ان تقومي بوضعه على الكرسي الساخن ..واليوم داك لازم يكون في ملاح فرك .. ..خليك حاسمة وواضحة وانت تنظرين في عينيه مباشرة وتضربين بالمفراكة على يدك ..قولي بحزم (دا شنو الكلام السمعتوا دا) .. اها كلمتكن ..وعلى العموم تلفون النجدة تلاتة تسعات لو حدثت اي سيناريوهات غير مستحبة .

د. ناهد قرناص


‫5 تعليقات

  1. يا بت قرناص مالك بقيتي تكرري المواضيع ؟؟؟؟؟

    الكلام ده نشرتيه قبل كده.

  2. المرة دي جنها الواي كرمزوم و ال DNA والحامض النووي تتفسح فينا على كيفا ياخ خلاص عرفناك عندك جائزة نوبل في الهنسة الوراثية … يا اما ادينا معلومات علمية كاملة نستفيد منها يا اما ما تجيبي سيرة الحاجات دي بالاسلوب المتفلهم ده.
    او كدي ادينا رأيك (العلمي فقط وليس الديني أو الاجتماعي ) في ترمب رئيس امريكا الجديد قالوا عندو علاقة جنسية ببنته والسؤال هنا كيف يتم تتبع الواي مرمسوم والاكس كرموسوم في هذه الحالة بالنسبة للمولود اذا حملت منو
    عشان اوضح ليك اكتر اذا لم تستوعبي ترمب عندو بت جميلة جدا صارووووخ و هي بنته الحقيقية وليس بالتبني يعني الكرمسوم حقها ياهو الكرمزوم حقو .. فالراجل ده شنو .. اتخذها خليلة قيرل فرند .. يعني ترمب وا خجيلتو نسيبتو مرتو و عروسو بتو

  3. أن تشلب البنت ابيها من امها
    علي الطلاق دي في علامات الساعة ما لاقتني

  4. القصة انكم فارغات وبتطلعو الفراغ دا في بعض لانكم ماعندكم موضوع هسي هو وينو الراجل البعرس مرتين دا وينا القروش ووينو الحيل عشان كدا بتحاولوا تعملوا موضوع من حياتكم راجلي وراجلي وفلانه وتجيبو ليكم مصطلحات عجيبة وكمان قروبات فاضحة شوفو ليكم شغلة

  5. للدين رأى واضح جدا في مسألة تعدد الزوجات. و التى ممكن تكون حل لعدد لا نهائي من المشاكل الزوجيه و علاج ربانى ناجع للزواج الكاثوليكى وبالتالي شرعا لاغبار عليها. اختزالك القضيه للمفهوم الفطير و الاسلوب الركيك فيه استخفاف بعقول القارئ.